（獨媒報導）《施政報告》提出立法規管劏房，合資格劏房將改稱為「簡樸房」。當局稱已有政策框架和時間表，房屋局局長何永賢今早（20日）在電台節目表示，若社會覺得登記期只需要一年，最快2026年底已能開始執法。
不過節目主持笑言，「『告別劏房』呢樣嘢變咗唔係真係冇咗劏房，不過合資格嗰啲叫簡樸房，仍然有啲分間單位喺度」，財政司副司長黃偉綸回應指「準確嚟講，係告別劣質劏房。」何永賢則形容，簡樸房也是一種「產品」，社會上總有人有需要，所以有人提供是好事：「佢（市民）可能有物業，但有段時間兩夫婦有少少拗撬，其中一個話唔想一齊住、要搬開一陣，又要搵啲地方係方便，個社會上總有呢啲需要。」
當局暫定的時間表，是今年12月到立法會交代政策，並開始兩個月諮詢，明年提交相關草案。立法工作完成後，再設12至18個月的登記期，及後另設12至24個月的寬限期。黃偉綸稱推行政策不能操之過急，因要視乎公屋單位數量。
黃偉綸：料租金大增可能性不高、不會讓任何劏房戶無家可歸
對於有劏房戶擔心劏房改建成「簡樸房」後業主會加租，黃偉綸就稱租金價格是視乎供與求，當局有信心透過增加公屋單位來減少需求，相信租金大幅攀升的可能性不高，但會密切關注，「好多嘢總係要喺現實中尋答案」。他指歡迎社會關注政策，「但我哋覺得個問題係處理到。」
黃又表明，當局「唔會讓任何人因為我哋政策而無家可歸」，重申現時有不同政策可協助，「我哋收地，一啲寮屋（住戶），經努力後都係處理到。」
當局沒有限制一間簡樸房的入住人數，黃解釋指如果定得太實 「現實考慮未必做得到」，例如可能有夫婦住戶想生育小孩，或者有親戚要暫住一段時間。他又稱，明白市民理想是「住大啲」，但「佢住得分間單位都會有很多局限」，政策已平衡不同因素：「覺得目前呢個平衡攞得幾好。」
黃：會立即開展政策、對下屆政府延續性要有相當信心
《施政報告》亦提出將居屋綠白表比例由現時四比六調整至五比五，主持問是否有增加居屋時間表？黃偉綸稱會「立即起步」，主持和應「因為過咗現屆政府，唔知下屆政府點諗嘢」，黃立即反駁稱不同意：「每個政府都會有當前，有長遠嘅嘢，要有信念係方向如果正確、社會認受嘅嘢，係會繼續落去⋯⋯造一條鐵路，你諗吓規劃要幾耐？唔會隨便停，對延續性要有相當信心，否則好多嘢討論唔到。」
主持回應指，「唔會隨便停，但睇返過往廿年，有啲嘢突然停咗、冇咗，因應好多不同環境，例如資助房屋咪停咗。」她認為，現屆政府須有決心「開展咗」，才能延續下去。黃和何立即疊聲回應，著主持「放心」，黃又安撫她「我同你睇法係一樣」，主持回應指「我邊有你咁叻」。
舉報濫用增社會矛盾？何：應以「愛惜公物」的心看待公屋
至於舉報濫用公屋獎勵機制會否做成社會矛盾，何就強調公屋是寶貴資源，市民應以「愛惜公物」的心去看待：「我哋最唔想見到，有啲公屋單位可能開幾枱麻雀，喺度『抽水』，咁你都唔想啲隔離鄰舍咁雜，將個公屋環境住到咁嘅樣⋯⋯鄰里關係我哋梗係好看重，我哋時時推動幸福感，希望家庭同社區建立關係，但我哋希望係一啲好嘅關係，我哋唔想見到啲鄰里將個公屋用到好澩嫪，我哋都喺度啞忍。」
何又重申要獲得獎金，需合乎很多條件，並指提供獎金是因為「我諗人性要少少帶動，希望攞到多啲準確資料。」