【獨媒報導】的士司服務質素近日成為市民討論話題，對於「黑的」情況，有「的士大王」稱號的伍海山稱「做生意都係為咗搵食啫」，指的士司機收入較低才鋌而走險，但強調害群之馬只是一撮人：「宜家一般情況，我哋個收入都係比一般地低，做『黑的』都係想搵多啲錢啫。如果其實個價錢去到某水平嘅，我估大部分人都唔會以身試法。」
伍海山是泰和車行董事伍熀的兒子，正競逐出任香港的士小巴商總會理事長，外界稱其為「的士大王」。伍海山日前接受民建聯立法會議員梁熙訪問，談到「黑的」問題。伍海山指知悉山頂纜車、蘭桂坊都是「黑的」黑點：「都有啲不法份子，喺度做啲濫收車資行為。」伍海山認為，「黑的」源於的士司機收入較低，才以身試法。至於怎樣才是理想收入水平，伍海山則稱，要由專業人士計算包括能追上通脹：「宜家我哋都相差幾遠㗎。」
梁熙Facebook截圖
促業界加強溝通技巧 「交更」時仍接客致「拒載」
被問到的士服務質素越來越差，伍海山表示，涉及司機與乘客的溝通問題：「業界不斷喺度提醒，前線司機去做好啲服務態度啦，或者加強個溝通技巧啦。」
不過，伍海山指有的士司機「交更」的時候仍接客：「睇吓係咪順路，其實佢就唔諗住做生意嘅，佢有陣時問吓⋯⋯有陣時都會影響到乘客，明白嘅，個感覺唔好嘅。有陣時啲前線同事想做多啲生意，如果順路就做埋佢啦，但如果問咗唔啱路嘅，可能又造成一個拒載嘅感覺，但其實佢嗰刻就係諗住返去交更嘅。」
梁熙Facebook截圖
年輕人不願入行 伍海山指司機收入偏低、未能追上通脹
談到的士業目前的困難，伍海山認為業界面對人手不足：「前線司機比較缺少，同埋經營成本比較貴，尤其保險比較貴。」他提到，現時的士第三保一般為3至4萬元，如曾發生意外更高達10萬元，指業界已加裝防撞系統減少意外。伍海山又指每年意外率接近，但索償額卻越來越大：「可能要係保險業界，同政府諗吓點樣令到個索償額比較合理啲囉。」
對於年輕人不願入行，伍海山承認，有部分人選擇駕駛網約白牌車，加上現時的士司機收入偏低，尤其收入未能追上通脹：「可能有啲⋯⋯我哋宜家前線個收入都係偏低嘅，始終我哋個收入都受到咪標價錢影響，其實我哋每次申請加價，喺個統計上個收入，都係其實距離個中位數一大段。」
梁熙Facebook截圖
研規管網約平台 伍海山：有責任與合法營運牌照商戶或車輛合作
政府正研究如何規管網約平台，以期只有的士及持許可證的出租汽車可透過平台提供服務，料下月將公布及交代未來路向。被問網約白牌車一旦合法化，對的士業界的衝擊。伍海山就認為，「政府今次都係想正視問題」，平台有責任與合法營運牌照的商戶或車輛合作。
伍海山最後表示，個人認為網約平台屬時代發展，能提供良好的中介：「如果政府有一個方向，或者法規喺度，自自然然我估大部分的士都會進入個平台去做服務，可以解決好多宜家面對嘅問題。」