文：Nelson
採：Nelson、CHL、小丁
攝：CHL
（埔報報導）每逢長假期，汀角路來往大美督的交通擠塞尤其嚴重，不少居民對此苦不堪言，亦不時埋怨在中途站等不到巴士及小巴。鄰近大美督的龍尾灘預計今年泳季正式開放，署方回覆《埔報》指，預計泳灘使用人數最高為每天約4,000人次，再加上過千伙過渡性房屋的汀角黃魚灘項目正向城規會申請，勢必加劇區內的交通負荷。今期本報訪問了多名社區持份者，讓他們對區內交通盡訴心中情。
龍尾村居民陳女士（駕駛人士）：出市區須兜路往粉嶺避塞車
「新年紅日假期塞得比較犀利，平時星期日唔係成日塞，但明顯多車咗，試過由龍尾村去大埔中心，原本大約15分鐘嘅路程，最後用咗大約40分鐘。星期日人流高峰喺下午5、6點，我揸車出市區會『行後面』，往粉嶺鹿頸方向行駛。
我會專登避開人流高峰時段，食完早餐就早啲岀去市區，因為啲人未入嚟嘛，12點後啲人就開始入嚟。
疫情嚴重嗰陣無晚巿，啲人好早岀返去（造成人流集中於晚市前離開郊區），依家放寬有返晚巿，好返少少。」
龍尾村居民莫小姐：大小巴中途客滿「飛站」
「有時星期六日好多車，特別係假日，通常會遇到塞車，因為只得一條行車線，我哋居民要預時間岀去巿中心。有時喺中途站會等唔到巴士或者小巴，因為喺總站開岀嚟幾乎滿載。
如果係朝早返工時間，我要花多約莫十分鐘行返去總站先上到車。
較早之前，龍尾泳灘大致完工，泳客開始入去玩，有一段時間係日日都塞車。所以都會擔心當龍尾泳灘正式開放，多咗人入嚟，交通擠塞會好嚴重。」
莫小姐
大美督小店員工黃小姐：大美督頓成淪陷區
「返工遲到都算，最慘係試過放工都放唔到，等咗好多架滿咗嘅巴士先有車，爭啲諗住踩單車出返市中心。
以前最多咪預早半個鐘，依家有時要預早一個鐘頭開始等小巴（返工）！ 以前大美督邊有咁多人㗎，依家嘅大美督直頭淪陷咗，以前無乜人，好舒服，有時間可以同啲客傾吓計，不過而家無機會啦。依家好恐怖，真係好恐怖。」
黃小姐
假期排長龍 村長：小巴司機很難做
不少居民及外區的遊客經常抱怨，因太多乘客，在近大美督範圍等不到巴士或小巴，尤其在蘆慈田、龍尾村等中途站的乘客更需走到大美督總站排隊候車。
船灣區議員蘇達良指出，來往大美督的75K巴士及20C小巴已接近飽和，居民在黃魚灘、汀角等中間站已很難上車。那巴士及小巴的班次是否需要增加？蘇議員表示：「加班當然最好啦，但小巴公司面對司機不足問題，也很難加班次。巴士及小巴公司過往也會因應情況作出調配，留意到多人候車時會調配資源安排班次。」
大美督村長黃仁生同樣表示巴士及小巴公司會適時調整班次，但坦言小巴公司也很難做，因不知道中間站的候車人士是等巴士還是小巴，由總站開出的小巴司機很難預計要留多少位，他反問：「難道要小巴開『吉車』到中間站載客？如果是，應在哪個站停下載客？」，「小巴司機怎會理你！他們只是打工，怎會為你想那麼多。」
不過，黃村長建議可於龍尾灘外開設特有小巴站，「吉車」由這個站開岀，專門接載龍尾灘的遊客，亦可照顧中間站的候車乘客。
九龍巴士有限公司回覆本報指，會持續於人潮高峰期於汀角路沿線各站視察，並按實際需要靈活調動車務疏導乘客。20C小巴營辦商進智公共交通控股有限公司截稿前未有回覆。
每逢長假期，近大美督多個車站經常「大排長龍」。（圖為今年4月2日的復活節假期，汀角村站乘客候車情況。）（圖片來源：Facebook大埔群組@Lenny Ho）