過往幾個月，足球運動喺香港引起過兩波熱潮：一波係，香港隊因於亞運、亞洲盃嘅展現出傑出表現，而帶起嘅「港隊熱潮」；另一波係球王美斯所在球隊—國際邁阿密，宣布來港掀起嘅「美斯旋風」。
當然，相比起「港隊熱潮」，「美斯旋風」來得更突然、偶爾。而香港（忽然）球迷帶來嘅衝擊，呢點可以喺入場人數上反映：近年港隊主場比賽入場人數平均數千人；呢兩日邁阿密公開操練及表演賽各自有38,000人入場，大部分門票要價四位數，仲未計炒上天嘅黃牛。
無奈真金換唔到真心，美斯、蘇亞雷斯全場一分鐘都無上場。如此一來，賽前我最擔心出現嘅畫面：香港球迷噓港隊，出現喺碧咸同美斯身上。
講真今次撐唔落美斯，就算唔上場，出嚟行個圈講兩句西班牙文都好呀。好多球迷比幾千蚊入場只係為咗睇美斯。國際邁阿密擺明做得閪，少少PR都唔願做、做唔好。難怪球迷感覺自己成為水魚，抗議比較激烈亦可以理解，抵屌！但作為12年美斯球迷，人生第一件波衫係2011/12年巴塞隆拿主場球衣，背後印上「Messi 10」。如今睇見「美斯旋風」演變成「美斯風暴」、自己偶像牌都俾人踢爛，無疑係心痛嘅。
相比起球迷行為，更令人震驚嘅係政府嘅回應。晚上政府連出兩篇傳媒稿，「表示極度失望」、「主辦單位欠球迷一個解釋」。唔講以為碧咸做間諜、美斯偷睇國防機密，將戰狼外交延伸到足球上，「應急反駁」國際邁阿密？
不少香港球迷熱切期待，更有許多遊客專程來港觀賞，美斯未能上陣表演賽，亦未應要求在場內親自向球迷說明原因，政府和一眾球迷感到極度失望。主辦單位及國際邁阿密CF的處理手法未能回應一眾熱烈支持美斯的球迷的期望，尤其是一眾專程遠道而來的旅客。
政府新聞公報
剛才提到入場人數，政府視表演賽為體壇盛事，宣傳鋪天蓋地，動用一切輿論機器去話俾人聽：美斯嚟香港喇！
如今俗套啲講，搞柒咗event，就將責任推卸到他人身上。「君子求諸己，小人求諸人。」國際邁阿密原定最後一日參觀啟德體育園，而家去都唔使去了，恭喜政府求仁得仁。經過今日之後，相信唔單止「說好香港故事」嘅如意算盤打唔響，咁樣公開煽動市民對主辦單位、球會嘅不滿，碧咸、美斯都或許從此「Goodbye，Hong Kong！」
更甚者，政府更揚言要扣減贊助款項，即係回水。見球迷嗌回水嗌得開心，政府跟機嗌埋一份？咁樣係同球迷站在同一陣線？但合約有如《大公報》所言，寫明美斯任何情況下、哪怕受傷都必須上場嗎？顯然無，否則係違反合約。球迷表露真實感受係一回事，一個政府發言係另一回事，必須慎言。稍有不慎，即令香港700萬人蒙羞，成為國際笑柄。
如果政府真係要「與球迷站在同一陣線」，點解琴晚場波無盡力調低門價？點解平時球迷連想買一件港隊波衫都買唔到？點解因為遊戲程式顯示唔到「Hong Kong」後面嘅「China」，就要電競選手退出亞洲盃？
牌品好自然人品好。港府真心想為香港足球好，可以做嘅事有很多。但絕不包括繼續以政府名義諉過他人，輸盡威望，更令以後喺國際盛事選址上，香港被列在不友好名單之中。
（本網歡迎各界投稿，文章內容為作者個人意見，並不代表本網立場。）