【獨媒報導】港隊原任主教練安達臣周三辭職，表示收到難以抗拒的聘約。足總及後宣布，由原任助教盧斯爾任暫代主教練，並由司徒文俊則出任助教，在餘下兩場世界盃外圍賽賽事中領軍。足總主席霍啟山今日宣布，足總已委任東方主教練盧比度，兼任港隊助理教練。霍啟山指盧比度具經驗，希望能藉對方協助支援港隊：「呢個應該都係好事嚟！」
重申亞洲盃決賽周後已提續約 向安達臣開出符合條件合約
在足總盃決賽中，由盧比度帶領的東方，在加時擊敗深水埗奪得足總盃冠軍。在頒獎後，足總職員向記者表示，霍啟山欲對傳媒交待一些事宜。霍啟山見記者時稱，足總原與安達臣仍有一年合約，在亞洲盃決賽周後亦已提出續約：「呢幾個月都一路同佢商討條件，我哋最後都係俾咗一份符合佢嘅要求三年條件，等佢落實。」
然而，安達臣最終辭職，結束兩年半的港隊主教練生涯。霍啟山表示，足總將盡快按照程序招聘新任主教練，表示已邀請了盧比度加入教練團：「我哋邀請咗東方嘅教練盧比度，加入我哋呢兩場嘅操練同比賽，作為呢個副教練，希望可以支持到教練團，同時間支持到我哋嘅港隊去應付。」
會否坐正？ 霍啟山指屬「兩場限定」
被問到在兩場外圍賽後，盧比度會否繼續出任港隊教練，甚或「坐正」主教練一職。霍啟山則稱，雙方的合作只限兩場世界盃外圍賽賽事的操練、比賽，即只屬「兩場限定」：「同時間我哋足總會盡快啟動招聘流程，到時如果有適合人士，我哋都歡迎佢嚟報名，希望搵到適合嘅教練，繼續帶領我哋嘅港隊。」
至於為何邀請盧比度，霍啟山指對方具經驗：「大家都係比較認同佢嗰個技術，呢方面都係想喺現時嘅情況，再俾多啲支援我哋教練團⋯⋯同時間我哋港隊啦，呢個應該都係好事嚟！」
與東方合約下月尾完結 盧比度：願意犧牲假期幫港隊手
至於主角盧比度，他日前連續兩屆成為香港足球明星選舉中的「最佳教練」，實力備受肯定。他在賽後見記者時亦對傳媒表示，自己即將成為港隊助理教練：「我希望幫助港隊，希望盡我所能幫助主教練，我願意犧牲我啲假期幫手。」盧比度形容，能執教港隊是很好的經驗，但現階段會先專注於如何幫助港隊：「即使係助教，我都可以學到好多嘢。之後點？我宜家唔會諗住。」
盧比度指出，足總在數日前透過聯絡東方，邀請他成為助教。至於會否在足總公開招聘後，參與應徵港隊主教練，盧比度稱與東方的合約在下月尾完結，目前傾向繼續留隊，但亦表示如果有機會亦不會拒絕：「每個教練都希望可以執教代表隊，但我宜家唔會諗下一步，我同東方仲有約。」
被問到會否沿用前港隊主教練安達臣的戰術，盧比度則指「直到今天也沒有跟任何人傾談過」：「盧斯爾係主教練，佢負責落決定。我會盡力將我嘅知識同埋意見俾出嚟，但我唔會做任何決定，只會盡我能力去幫忙。」
記者：麥馬高、劉苑嫻
攝影：周頌謙