【獨媒報導】流浪上月出戰亞冠盃外圍賽，事後遭亞洲足協紀律委員會指控違反紀律和道德守則，罰款8,000美元。亞洲足協指有主場球迷在比賽期間使用「F**k You」字句打氣，及有球迷攜帶啤酒入場等。流浪總監李輝立回覆《獨媒》時表示「當買個教訓」，但就質疑亞洲足協的做法矯枉過正，及球場保安未有做好相關工作。
亞洲足協報告截圖
根據亞洲足協的報告，流浪共有三條「罪狀」，包括被指有主場球迷在比賽期間使用「F**k You」字句打氣，屬於不當行為。另外，流浪亦被指未能確保球場安全，有一名球迷在比賽期間進入球場草地範圍，及有球迷攜帶8至10罐啤酒進入球場，保安未有嚴格搜查球迷的袋。
李輝立感無奈 指應視乎粗口的傷害性
《獨媒》就今次罰款向李輝立查詢，對於「講粗口」的指控，他認為是矯枉過正，對此感到無奈，並指在英國的足球比賽「成日都F**k off㗎啦」。他認為亞洲足協應視乎粗口的傷害性，才決定是否作出懲罰。不過，李輝立明言香港球迷質素「好曳」，點名指理文、大埔球迷「好得人驚」，自己曾在球賽遭對方問候，又指有球迷「X老母X到想食人」。
李輝立認為球迷如愛惜球隊，便不應「害我哋」，承認講粗口影響球隊形象，「所以你見到我都唔再組織球迷會」。李輝立重申，球迷不應將政治帶入球場，「要尊重呀嘛」，舉例指有球迷常常喚球證廖國文為「黑警」，明顯屬不當行為。
李輝立：保安應負最大責任 場監亦可以做得更好
至於有球迷在比賽期間進入球場草地範圍，及攜帶啤酒進入球場。李輝立就指保安應負最大責任：「佢哋收足總唔少錢，但點解唔做好啲嘢？」他認為，球場保安明知有不少以激進見稱的越南球迷，更應「睇實啲」。另外，李輝立指場監的工作亦有改善空間：「唔好淨係捉埋啲細微細眼嘅嘢，呢啲都要睇吓啦。」
流浪在去季港超聯取得季軍，今季首三場賽事錄得1勝2負，包括上周不敵傑志。李輝立就指流浪球員李毅凱、林衍廷參與亞運，球隊實力有一定影響，指曾向足總提出周日賽事延期，但因對手理文反對作罷：「佢哋兩個話想踢，咁晉到級都係開心事嚟嘅。」李輝立表示，已要求上場告別的基藍馬再踢多一場，應對球隊人手不足：「佢無練㗎啦，但佢話為咗個會都OK。」
另外，黑山前鋒卡丹奴域早前已離開球隊，李輝立稱對方不懂英語，在球場外亦未能與隊友溝通，而且生活上不習慣，只能離隊。他透露是對方要求解約，「佢要嘅我哋都俾足」，並慨嘆尋找好外援不容易：「咁辛苦做咗好多嘢但無作用，會好失落。」他表示，流浪仍在物色來自日本、韓國的前鋒，但仍要待當地聯賽完結才有進一步想法。