【獨媒報導】前香港足球代表隊成員梁子駿下月舉家移民英國，他今日在甲組聯賽替中西區上陣，完成在港告別戰。現年37歲的梁子駿育有兩子，他接受《獨媒》訪問時指，去年已有離港的決定，赴英是希望為下一代可以有更好的教育：「嗰邊嘅教育制度確實完善啲，呢個係無可否認。我又無咁多錢俾佢哋讀國際學校，唯有將佢哋帶去英國。」
本港近年出現移民潮，本地球圈亦不例外，前職業球員潘耀焯、杜瀚滔先後離開香港，到英國落地生根，香港U23前主教練張健峰亦將離港赴英。梁子駿去年已到英國生活一年，並曾參加當地的業餘足球聯賽，「其實已知道嗰邊環境大概係點，今次係帶埋屋企人返過去。」
一對兒子分別7歲及6歲，梁子駿指疫情令兒子在學習上有一定限制，包括課外活動減少、要上網課，「移民呢個決定都唔係倉促，係經過深思熟慮，等小朋友有好嘅環境讀書，好嘅平台學習同玩。」
長洲長大 南華試腳獲相中後扶搖直上
本身是「水上人家」，父母從事海鮮生意，在小學之前，梁子駿的生活都在長洲的漁船上渡過。父母是澳門人，所以他曾在澳門居住，後來「上岸」一家繼續住在長洲，至20多歲才搬出九龍。
梁子駿很早已立志要做職業足球員，後來朋友喚他去南華試腳，一試便獲顧錦輝相中。然後便扶搖直上，成為香港足球代表隊各級青年隊、奧運隊成員。他歷年曾效力流浪、愉園、東方、淦源、飛馬、晨曦、南區及夢想FC等多支球隊。
直至2019年，梁子駿效力的夢想FC退出港超聯，他便宣布退役，告別職業足球。在退役後，梁子駿曾作不同嘗試，開過凍肉公司賣牛扒、賣日本刺身，又試過做全職足球教練，「哈哈，自己唔係坐定定工作嘅人。」在新冠疫情下，由於在進入中國水域亦需要隔離，家人亦暫時停工。
「大家都知近年香港發生咗一啲事情，負能量多咗，產生埋怨。自己就覺得，同踢波一樣，唔會永遠都順境，亦唔會永遠都逆境，睇下你會唔會堅持落去，同帶埋身邊嘅隊友一啲正能量，如果你有正能量，你去邊一個地方都生活快樂。」
將落戶劍橋 最不捨父母
「試下唔係壞事，睇下個世界有幾大。」梁子駿一家將落戶英國劍橋，他承認今次的決定掙扎了好一段時間，最不捨的是父母，「嗯，始終都係為下一代讀書好。」他將先安頓小朋友，再想想未來的方向，「其實係滿心期待，去新環境，小朋友都好興奮，感染到我都好興奮。」
近二十年的職業生涯，梁子駿自言回憶多於遺憾，一直享受職業足球員的身份，「踢咗十七、八年，嗯，我比其他球員都好，可以立足咁耐，享受到踢波嘅生活。當中難免有失落，好似輸波，但攞一個冠軍已可以蓋過所有唔開心。」
入行的時候正值港足冰河時期，梁子駿還記得，球場試過只有50名觀眾，球迷少得聽不到任何掌聲，「靠去捱、去堅持，慢慢睇到球市有起色，再多人睇返同關注。我總會覺得，足球可以將人與人之間嘅距離拉近。」
效力淦源浪子回頭 勉年輕球員勇於追夢
在班霸南華出道，17歲的梁子駿已入選港足代表隊，「嗯，嗰兩年雖然係上位，但我形容係跌落去。始終成名得太快，可能有啲衝昏頭腦，年少氣盛吧。」
商人羅傑承在2006年入主南華，梁子駿未有留效，轉投流浪。梁子駿自知「狀態真係唔好」，少年的他愛夜生活，直至效力淦源才浪子回頭，好好安定下來，「嗰陣時已係2008年吧，叫定性點。我會話，如果你踢後備，不如唔好踢啦，要踢就要爭正選，就要有所犧牲同堅持，先會有所成長。」在2010年，梁子駿終於首次成為「大港腳」。
直至25歲才代表香港隊上陣，是否「太遲」？梁子駿就表示，的確曾有這個想法，「但呢個係我成長經歷，如果我無前一段咁樣，可能更早就離開咗球圈，每個人嘅人生唔同，呢個就係我嘅人生吧。」擁有的，失去的都是人生。
不過，梁子駿承認，在香港踢足球並不容易。他鼓勵年輕球員要勇於追夢：「唔好怕辛苦，唔好怕捱，努力學習，一定會有適合自己的地方。」
感謝中西區安排告別戰 期待英國新生活
今場甲組聯賽，中西區硬撼愉園，主教練馮振霆在賽前將隊長臂章交給梁子駿，朋友在賽後則為他送上鮮花。另外，數名前南華隊友楊正光、梁智駒及謝敏榮亦特地前來探望老朋友。其實在移民的消息傳出後，一班前隊友已紛紛發訊息問候梁子駿，「哈哈，我都多朋友㗎。」
離港在即，完成在本地足球的最後一哩路。梁子駿形容心情平靜，十分期待在英國的新生活。他尤其感謝中西區足球隊上下，「以我咁嘅年紀，仲可以有告別戰」。面對別離，梁子駿的笑容依然可掬，「無任何遺憾，最後一場仲可以踢正選、做隊長，享受嘅！」
記者：麥馬高