（獨媒報導）中國香港足球總會昨日宣布，由於港隊在電競亞洲盃遊戲程式中名稱不正確，即只有「Hong Kong」，而沒有「Hong Kong, China」，所以退出賽事。足總會長貝鈞奇在電台節目表示，退賽是要免除不必要紛爭。主持引述網民意見，周日香港隊對國際邁阿密的表演賽中，不少宣傳品都寫上「Hong Kong Team vs Inter Miami」：「有無問題呀？」貝鈞奇就稱無問題，因只屬口頭上的宣傳，而且表演賽與國際正規賽事的性不同：「Hong Kong Team 係口頭上面宣傳，唔係官式。」
貝鈞奇今早在商台節目《在晴朗的一天出發》提到，足總高層在昨日了解事件，指香港選手周一（29日）在抵達多哈後，發現遊戲程式內的名稱「有問題」：「遊戲上面展示只係香港，而唔係中國香港，我哋都要正視呢個問題。」
貝鈞奇指名稱屬敏感議題 用「香港」名義不適宜
然而，主持指出，該遊戲程式使用「香港」的名稱一段日子，貝鈞奇認為：「姑勿論game 一段日子，呢啲都係牽涉到比較敏感嘅嘢。喺一國兩制，我哋都用中國香港嘅名稱，假如稱呼『香港』俾人感覺可能，宜家大家出席國際會議，我哋足總都係用中國香港嘅，如果用咗『香港』，似乎係不適宜。」
冰協在去年外出比賽，發生播錯國歌事件，引起軒然大波。港協暨奧委會及後要求，各個體育總會必須在名稱冠以「中國香港」正名，即以「中國香港」名義參與國際體育活動。貝鈞奇同指出，該事件擾攘了很久，足總今次亦是按港協暨奧委會的指引及程序，才退出賽事。
主持：其實會唔會好大爭議呢？ 貝鈞奇：我相信會㗎！
在節目中，主持質疑主辦單位及遊戲開發商都不是存心整錯，而官方名稱、港隊參賽名字亦顯示為「Hong Kong, China」，只是遊戲程式未能顯示。貝鈞奇認為，退賽是為免引起不必要糾紛、爭議性事情。主持不禁問道：「其實會唔會好大爭議呢？」貝鈞奇稱：「我相信會㗎！你知道，無論點都好，大家都會議論紛紛，會產生好多⋯⋯」
主持及後表示同意：「最近好多有人投訴就成立，有啲人真係無腦啦，心胸又狹窄。」貝鈞奇稱「係呀」，指開發商未及修改遊戲程式，為了原則性問題所以退出：「我哋始終⋯⋯如果畫面上不斷地出現咗嗰個⋯⋯因為佢都直播嘅，出現香港，俾人感覺上不適宜。」主持續問到：「會唔會其實我哋覺得有問題，全世界都唔覺得有問題？」貝鈞奇認為：「全世界點樣睇法另一回事，香港方面，我哋中國香港都有個原則性嘅，按照指引去辦事。」
被問到是否遊戲開發商Konami 未及更改，而不是出現錯誤。貝鈞奇就重申：「無必要呀嘛！香港就係香港，中國香港就係中國香港！」至於能否在螢幕以後期加入「Hong Kong, China」的名為，即俗稱的「掩眼法」，貝鈞奇表示要待香港選手回港，「可能係做唔到呢樣嘢」。
周日香港隊對國際邁阿密宣傳圖
貝鈞奇 ：Hong Kong Team 係口頭上面宣傳，唔係官式
主持引述網民質疑，指在周日香港隊對國際邁阿密的表演賽中，不少宣傳品都寫上「Hong Kong Team vs Inter Miami」：「有無問題呀？」貝鈞奇就稱無問題：「Hong Kong Team 係口頭上面宣傳，唔係官式。」主持立即表示：「人哋遊戲版面嗰個，咪係口頭囉。」貝鈞奇認為性質不同，指如在遊戲中長時間出現「香港」是不適宜：「有啲性質嘅嘢大家要明白，一個係表演賽，一個係官式。」
主持反問：「表演賽就得呀？」貝鈞奇認為，表演賽與國際正規賽事不同，「呢個係國家對國家」，但主持不同意，認為應一視同仁跟足規矩。貝鈞奇續稱宣傳物品由主辦單位負責：「我哋香港隊加油，唔通香港球迷自發嘅，都唔會話中國香港隊！」
另一主持稱：「遲啲可能要呀，真係唔知呀。」貝鈞奇強調並非要刻意，主持再反駁稱：「啱呀！會長！我絕對認同你呀，人哋主辦方都唔係刻意令到我哋錯㗎嘛！」貝鈞奇重申：「但錯咗嘅話，如果我哋唔處理得好，引起好多不必要紛爭、爭議嘅話，我哋足球總會點處理呢？」
足總會長貝鈞奇（資料圖片）
主持嘆有人「唔用腦諗嘢」 貝鈞奇同意
主持最後慨嘆：「就係香港有一班唔用腦諗嘢人呀嘛。」貝鈞奇回應說：「當然啦！我哋好多人用腦啦⋯⋯用腦嘅話，想深一層。」主持指現時香港大球場亦名為「Hong Kong Stadium」，或要因此易名。貝鈞奇以上海為例：「佢唔會話中國上海Stadium㗎嘛？佢哋係上海體育館。」他再三重申如使用「香港」，足總或會遭攻擊「點解唔留意呢啲嘢」，自去年播錯國歌事件後，各個總會便需要更謹慎：「奧委會都會懲罰我哋，你哋無去執行喎！」
另外，港協暨奧委會昨日回覆傳媒查詢時表示，知悉中國香港足球總會已按指引中既定程序處理事件，並已指示總會須於一星期內提交事件報告，現階段沒有其他補充。