【獨媒報導】香港足球明星選舉頒獎禮今晚舉行，效力大埔的門將謝家榮擊敗港隊隊友葉鴻輝、伍瑋謙，首次榮獲最佳十一人。《獨媒》問到今次獲獎的意義，謝家榮形容「有少少自我救贖」，而自我救贖正是源於不甘心：「一路都知道自己有咁嘅能力，之前犯咗啲錯誤，喺谷底嘅時候好彩自己無放棄，到今日可以上到頒獎台，對自己嘅意義好大，仲要係港超聯十周年。」
港足U23在2021年10月外出到日本比賽，有球員醉酒鬧事，謝家榮是其中一員，事後與其他涉事球員被禁止徵召到代表隊一年，兼罰款6,000元，職業足球前途接近毀於一旦。不過，杭州亞運因新冠疫情延期一年，謝家榮再次獲得代表港隊機會，賽事期間更表現神勇，替香港取得歷來第四名的佳績，並獲主教練安達臣挑選進入港隊亞洲盃決賽周名單，在對巴勒斯坦的比賽正選上場，今季本地賽事亦表現可人。
感謝林燦彬多年關顧 盼與林樂勤同場披港隊球衣
《獨媒》便問謝家榮，從「自我救贖」到谷底翻身的動力來源。謝家榮表示：「嗯，我諗係自己嗰個鬥志，嗰個唔甘心，唔甘心喺嗰陣時咁樣就要quit職業足球圈，嗰陣時先21、22歲，一路知道自己能力去到邊度，唔甘心係成就自己今日嘅原因。」
在頒獎台上，謝家榮點名提到林氏父子，即車路士足球學校（香港）總監林燦彬及多年戰友林樂勤，尤其希望日後能與後者一起代表港隊上場。謝家榮感謝，林燦彬一直十分關顧自己，事無大小都十分留意，在富力散班的時候亦邀請自己加入愉園，對此感到感恩：「當然低潮嘅時候佢都有鬧我，點解浪費自己，點解要咁做呢？」
祝福安達臣有更好發展 謝家榮：佢都幫助我好多
現年24歲的謝家榮，來季將留在大埔。他自言，一向對個人殊榮不太著緊，但今次上台的時候亦有點緊張，「好想攞呢個獎」。不過，謝家榮認為，個人獲獎是「唔完美嘅完美」：「當然想攞埋聯賽冠軍，不過今季理文表現真係非常之好，有啲無懈可擊，unbeatable，我哋攞到第二，其實已經好開心。」
對於港隊主教練安達臣或會離任，謝家榮稱消息來得突然，感到十分錯愕，但如安達臣有更好發展，便會祝福對方：「希望睇吓有無機會同佢見個面、傾個計。當然佢都幫助我好多，佢揀返我入香港隊，18歲之後上年入返香港隊，佢有份揀我。」
徐宏傑連續兩屆獲最佳十一人 兩周內決定未來路向
另外，理文後衛徐宏傑則繼上屆，今屆第二次贏得最佳十一人。徐宏傑表示，兩次奪獎同樣深刻，因為上屆是首次贏獎，今屆則因為能同時協助理文奪冠，達到加盟球隊時的目標。
徐宏傑今季受到傷患困擾，承認落場的表現仍未做到最好：「呢一季捱住傷去踢，都會覺得值得。」徐宏傑現時與理文仍有一年合約，對於獲內地球會相中，被問到會否「再挑戰自己多一啲」，他稱會認真考慮，「點樣對我未來係最好」：「當然希望挑戰，但我會認真考慮之後，揀一個最岩自己嘅決定。」
現年27歲的徐宏傑在2018年曾到內地搵食，效力中甲球隊梅州客家兩個球季。《獨媒》問到，當年會否尚有未完成的事情，徐宏傑稱「我覺得會有」：「嗰陣上去比較後生、年輕，好多思想都未夠成熟，成日想返屋企呀，掛住屋企人呀。」他預告會在兩星期內作決定，但亦期待為理文在亞冠賽事上場。
記者：麥馬高、劉苑嫻
攝影：周頌謙