【獨媒報導】港超聯球隊理文以全季不敗的成績，成軍七年來首次奪得冠軍，球隊今晚舉行慶功宴。理文來季將會出戰亞足聯冠軍聯賽二級聯賽，會長李文恩表示，將會保留七成的原班人馬，並正在遊說頂級華人球員加盟球隊：「我哋係想搵一啲比較再頂級嘅華人球員嚟幫手，因為亞洲賽其實都好難踢。」
霍啟山：希望更多有心人支持香港體育
理文周一晚上在九龍灣福臨門舉行慶功宴，球隊一眾職球員都有參與，更邀請了歌手李幸倪、洗靖峰、張馳豪及女子組合Lolly Talk 任表演嘉賓，李幸倪更承諾來季將會入場睇波力撐理文。
足總主席霍啟山亦有出席，他在致辭時先祝賀理文首次奪冠，指稱謂要建立一支有實力的球隊需要很多時間、心血。霍啟山表示，希望可以有更多有心人可以支持香港的體育，大讚在李文恩身上感受到熱心、專業、思想及「好有諗法」，日後能加強合作。
保留七成原班人馬 李文恩：代表香港參與亞洲賽不能失禮
在接受記者訪問前，李文恩先手持港超聯冠軍獎盃拍照，其家人都有出席支持。對於來季將出戰亞足聯冠軍聯賽二級聯賽，李文恩表明，不會為亞洲賽訂立目標：「雖然係初哥，未必會set 咩目標，畢竟代表香港啦，出到去唔好失禮先。」
談到組軍情況，李文恩表示，將會保留現時陣中約七成球員，並透露已向2至3名本地球員招手，對象均為中後場球員，並希望今周內落實華人球員班底：「始終我哋中後場⋯⋯喺過去會畀人哋笑，當然阿凱加盟之後好咗。」他表示，球隊今日下午召開會議，數據反映下半季的防守較上半季進步，出戰亞洲賽需要更多的球員：「踢波最緊要都係球員質素，我哋搞掂咗本地先，希望可以遊說到2至3位球員加盟我哋。」
外援「唔睇過去、只要當打」 心儀西班牙後衛
記者追問心儀對象是否港隊成員，李文恩喚記者「大家估吓啦」：「我驚影響到遊說佢哋過嚟，所以我唔敢講太多。」不過，他承認球員踢亞洲賽的壓力較大，更曾聽聞有球員說：「你亞洲賽你大晒呀，我未必想踢㗎喎。」李文恩表明如要為球員支付轉會費，「都係一個考慮因素」：「因為我哋唔想話好多外援，其實我哋都想本地球員，同外援平衡返啲。唔想話簽10個外援返嚟去踢，其實太多外援都好難管理。」
在外援球員方面，李文恩就開宗明義稱，球隊只會向歐洲球員招手，但不限於效力歐洲聯賽的球員，「前中後」三線都會增兵，預計約有7名外援球員：「我哋唔會搵本地踢開波嘅外援，我哋希望係搵一啲宜家喺高水平聯賽踢緊正選嘅球員，唔係睇佢過去嘅經歷，而係睇佢近呢一兩季，呢個係非常之重要，因為係要當fit、當打，先會叫佢哋過嚟。」另外，李文恩再次確認，球隊已向安尼亞、保利臣提出新合約，另同時透露了一些端倪，笑言球隊對西班牙後衛情有獨鍾：「前面就歐洲南美都有傾緊，中場同後防就一定歐洲。」
再到韓國季前集訓 盼避開澳洲球隊免舟車勞頓
對於傑志在來季提出年青化，李文恩則稱「我哋都年青化」，指兩隊在昨日煞科戰的正選球員年齡其實不相伯仲：「唔係話為咗年輕化而年輕化，希望係一個傳承。唔係話年輕化無用，但一定要平衡返。」
《獨媒》則問李文恩，理文來季會否繼續到外地集訓，他表示「一定會」，而去年季前在韓國集訓的效果不俗，稍後亦會再到韓國進行季前集訓：「因為亞洲賽好有機會對韓國隊伍。以前我哋鍾意去泰國，中國都去過，最好係韓國，因為比賽強度高好多。」
至於來季期望，李文恩稱希望理文能衛冕港超聯冠軍，繼續代表香港參與亞洲賽。李文恩亦重提球隊今季在足總盃四強不敵深水埗出局：「其實係一個好大教訓，因為背後有啲嘢準備得唔好，要再做好啲，衝擊多啲冠軍。」不過，他重申球隊會將注意力集中在亞洲賽，並明言不希望在分組賽與澳洲球隊同組，因為需要較長時間舟車勞頓，球員亦會較疲累。
先後感謝母親太太支持 如分組賽出線將加碼
另外，在慶功宴開始前，李文恩先感謝母親「用行動嚟支持你個仔今日有啲作為」，並再感謝太太，笑言自己平時「淨係睇波同鬧阿達」，工作上有賴對方支持：「攞冠軍只係開始，仲有好多歷程要經歷。」
在慶功宴期間，李文恩與母親向一眾職球員頒發100萬元獎金，並表明如球隊在亞洲賽分組賽出線，將會加碼派發獎金。
理文球員張熹延、鄭兆均等上台合唱《青春頌》