【獨媒報導】港超聯周日下午上演深水埗主場鬥香港U23的榜尾大戰，深水埗憑朱偉鈞一箭定江山，今季「雙殺」香港U23。對於餘下賽事的搶分機會，香港U23主教練司徒文俊賽後向《獨媒》坦言：「攞分幾時都希望，但我哋連對深水埗都攞唔到分，對其他球隊可能困難。」他又強調不希望球隊因為分數而踢得保守，否則會失去意義，「係咪要為咗攞1分，全部10個塞晒喺後面齋守踢走佢？我唔想變學界波囉。」
黎格爾熱身時受傷 U23黎培基復出
香港U23賽前踢完12輪後仍未有分落袋，深水埗亦僅在首循環以2：1擊敗香港U23「開齋」。今場主場出擊的深水埗繼續由奧力斯把關，羅港威與朱偉鈞作攻堅，捷西斯上仗領紅須停賽，由韓將沈云燮客串中堅，尼高拉斯則頂替熱身時受傷的黎格爾任正選。
香港U23則由龐焯熙把關，中場黎培基復任正選，3名超齡球員為羅曉聰、黃浩然及袁世傑。
朱偉鈞早段先開紀錄
開波5分鐘，深水埗首次埋門即入波。沈云燮處理左路角球，朱偉鈞攝前柱頂入，攻入加盟後第一球。9分鐘，朱偉鈞左路快放入禁區傳中，劉浩霖對住出迎封位的龐焯熙射高，龐焯熙之後多次喝斥隊友「醒啦」、「喂集中啦」。林樂賢亦向隊友提場：「冷靜啲，攞個波落嚟就唔難踢㗎啦。」
雙方之後互有攻守，但未能再添紀錄。最接近一次出現在40分鐘，尼高拉斯被陳潤潼踢中後勉強底線傳入禁區，但朱偉鈞控向身後，再橫傳予黃靖揚射門又一飛沖天。郭嘉諾事後向尼高拉斯稱：「踢中㗎，做咩唔跌低？」
司徒文俊追到更衣室投訴球證
半場期間，香港U23主教練司徒文俊及守門員教練陳振宇因不滿球場證黃偉倫判決不公，邊行邊向球證投訴，更一度追至更衣室門外稱「傾下計」，需要旁證及助教冼家裕調停。
羅港威疑似手球未吹罰
換邊後雙方陷入膠著狀態，56分鐘，袁世傑接應林樂賢傳送單刀，但被奧力斯撲到。香港U23亦先後換入李樂謙、何家智及林智豐加強攻勢。82分鐘，波比解圍「撻Q」，何家智推大位起腳但未中龍。補時階段，羅曉聰斬入禁區，羅港威禁區頂控波彈高打中手，但球證未有表示。最終深水埗以一球小勝，亦是球隊今季首次主場贏波。
今場入場人數為711人。深水埗亦特別安排嘉年華活動及NowSports主持關珮姿（KK）擔任賽事主持。
司徒文俊：百分之一百hand ball
香港U23主教練司徒文俊賽後表示球隊表現不差，值得有分落袋。他指形勢是「五五波」，「人哋把握到，我哋把握唔到，就係咁簡單。」他又認為球隊問題不在於技術，而是球員的心理及臨場判斷。
對於羅港威疑似犯手球，司徒文俊就稱：「我好肯定百分之一百係hand ball，我好肯定。因為個波好明顯，港威大髀控向上彈到隻手，遞高隻手再返下，我唔明球證有咩理據唔吹罰囉。」他談到球證執法尺度不一時更一肚氣稱：「佢哋係裁判嚟，公正㗎嘛，佢哋睇唔到？佢哋係盲嘅？定係有啲因素令佢哋唔吹罰？我唔知道。」
郭嘉諾：目標全季10分
深水埗主帥郭嘉諾賽後亦有讚賞香港U23，認為對方在落後仍很有心機，「當盃賽決賽咁踢，我俾full respect佢哋。」他強調球隊未完成使命，目標是全季有至少10分，「Tomorrow is another day. 唔好諗住話搞掂咗今季要做嘅嘢。」
郭嘉諾又指賽前已向朱偉鈞設立入波目標：「我話，你今場波一定要入波證明自己。」至於當選今場最佳球員的朱偉鈞則歸功是全隊功勞，認為自己及球隊每日都在進步。
記者：周頌謙