【獨媒報導】青衣運動場周六上演港超聯賽事，標準流浪1：4不敵大埔，近七場聯賽僅得一勝。標準流浪總監李輝立在賽後揭示球隊內幕，指日本球員神田夢實在上場輸波後不高興，今場遂交予其排陣，包括抽起部份韓國球員，並指對方性格高傲、球隊難以控制：「佢自己認為我啲日本人係得嘅，我唔想啲韓國喺度踢。OK！我又擺起佢（韓國外援），但效果點呢？似乎我哋啲教練都好無奈，自己無嗰個Power 去控制得到隊球隊點去改變。咁唔緊要啦，都季尾啦，盡力去踢囉！」
流浪去季奪得聯賽季軍，今季則載浮載沉，先有王家中轉任技術總監，改由教練團集體領導，再有多名球員先後離隊，上場聯賽更遭東方大炒5：1。球隊今場正選盡遣六外援，包括金旻奎、林堂真、林遼太、神田夢實、上形洋介及伊巴謙。
大埔周三在菁英盃四強出局，今季只餘下港超聯冠軍可以爭奪。今場繼續「六鬼拍門」，包括加比爾、馬高斯山度士、謝臣、馬卡雷拿、比迪高及盧卡斯。
大埔先開紀錄 比迪高射空門擴大紀錄
今場比賽不設視像助理裁判，並在下雨的情況下進行。流浪上半場採取主動，15分鐘，林堂真處理罰球，皮球中楣彈出。17分鐘，林衍廷後場犯錯控失波，馬卡雷拿偷去皮球，盧卡斯左路硬爆入禁區，右腳起腳得手，大埔領先1：0。
27分鐘，林衍廷交失波，盧卡斯接應傳予陳肇鈞，後者交予鍾偉強，鍾偉強起腳省中林堂真，皮球落在陳肇鈞腳下，他再起腳遭盧兆崎用腳擋出，比迪高射空門，替大埔領先2：0。28分鐘，伊巴謙右路傳中，李家豪欲解圍，但干擾了謝家榮，上形洋介「執雞」追回一球，追成較接近的紀錄1：2。
盧卡斯梅開二度 陳肇鈞「埋齋」
下半場換邊，49分鐘，神田夢實放冷箭，謝家榮撲出彈地甩手。53分鐘，馬卡雷拿扭入禁區，橫傳予陳肇鈞，後者左腳射門，盧兆崎幸不辱命撲到。57分鐘，比迪高右路開角球，馬高斯山度士跳頂，盧兆崎又撲到，陳肇鈞補中未能轉化為入球。
74分鐘，比迪高右路攻勢，盧卡斯門前用身體「攻門」，盧均宜護空門。79分鐘，大埔一個長傳，馬卡雷拿爭贏林遼太，盧卡斯接應扭過盧兆崎起腳射入，大埔贏到3：1，個人梅開二度，盧兆崎這時候一臉無奈。87分鐘，馬卡雷拿乖巧地挑高皮球，陳肇鈞冷靜地射入，大埔最後大勝4：1。
賽後揭由球員排陣 李輝立稱神田夢實一直不開心
今場入場人數為312人，盧卡斯成為今場最佳球員，港隊主教練安達臣、技術總監莫寧亦有入場觀戰。在完場後，一眾記者向流浪總監李輝立查詢，談到球隊近況欠佳。李輝立在回應的時候，首句便爆出驚人內幕：「呢場我都叫咗啲教練，盡量俾啲球員揸Fit，神田要揸Fit，咪俾佢話事囉，呢場波陣容佢（神田夢實）編嘅。」一眾記者聞訊後面面相覷。
談到流浪在上場聯賽1：5不敵東方，神田夢實賽後顯得失落，李輝立就指：「神田唔開心就係咁樣，因為啲人佢揀返嚟㗎嘛喺日本。我哋俾佢話吓事，教練都睇佢做法點，呢場亦證實得到⋯⋯真係自己弱點喺邊度，由得佢哋去睇囉。」
李輝立更進一步提到，神田夢實其實一直不開心：「當然佢有佢自己嘅講法，我話好呀，教練，試吓畀佢排陣，咁咪畀佢排陣。」
下場邊個排陣？ 李輝立：喺我嚟講都無乜所謂
《獨媒》問李輝立，神田夢實是否對球隊韓國球員有意見。李輝立指「呢個我唔夠膽講」：「咁多場我哋睇到，佢哋溝通上係有啲問題。喺我哋嚟講，搵球員梗係想搵最好，咁我信任你神田呀嘛，你咪去搵囉。咁結果搵到好唔好呢？我又唔夠膽話佢唔好，但成績就證明到隊波，下半季係唔好。」李輝立提到，由於轉會窗已關閉，已無法作任何改變，期望下周菁英盃四強有改善。
記者問到下場將交由誰排陣，李輝立稱「等佢哋商量囉」：「喺我嚟講都無乜所謂，場場波我哋梗係排到最好、想贏，但你話係咪日本最好呢？大家亦睇到，呢場佢自己排陣⋯⋯你問返啲教練有咩意見好過啦！」
指今季增兵欠理想 李輝立再點名李毅凱違反承諾投理文
不過，李輝立認為球隊踢得不俗，但在上半場兩度犯錯而失球，及後在末段鬆懈再輸兩球。他提到，兩名老將盧均宜、林嘉緯，對球隊十分重要：「呢隊波如果無咗均宜同嘉緯會點？大家都睇到。但我哋又唔能夠要求佢哋踢到五十歲咩，係咪？當佢真係踢到無體力嘅時間，隊波換一個人已經爭好遠，大家用對眼去睇囉，睇吓我哋前線嘅把握力，同埋防守係幾咁脆弱。」
被問到會否用「失敗」形容今個球季，李輝立不認同：「其他球隊好多都有啲⋯⋯仲比我哋更失敗嘅都有！但我哋搞波想盡量搞到最好，搵好嘅球員踢好波畀人睇，但係今年搵人方面係差啲。」他慨嘆多名球員在季初離隊，包括馬相訓、朴鍾範，令球隊措手不及，「走咗都無同我哋交代，無出聲」，連轉會紙至今亦沒有向流浪索取。
李輝立亦點名在季中轉投理文的李毅凱：「大家講明，喂，你本地唔轉得㗎嘛，一路我哋都唔知，你轉咗都無計，但無法子嘅，我唔會阻人發達囉。就算有球會搵任何一個球員，我都可以俾佢走，人望高處呀嘛。」他指尋找外援並不容易，需要傾談合約、轉會紙、工作證及機票：「宜家好彩唔洗隔離𠻹，以前隔離仲辛苦，球員嚟到唔踢得，好挫銳氣。」
至於下季去向，李輝立認為要視乎老闆的意願：「如果踢成咁，老細可能話唔好搞囉，仲諗下年？暫時踢埋呢幾場波先啦。」他指球隊在5月的對手較易踢，期望屆時能有起色，「希望攞分唔好排到咁後」。
指神田夢實性格高傲、球隊難以控制 李輝立：做大佬唔係咁易
《獨媒》指流浪去季成績上升，很大程度因為神田夢實大爆發，惟他今季在入球、助攻的數字均有所不及，並要「做大佬」。李輝立點頭稱同意，認為神田夢實性格高傲，球隊亦難以控制：「呢樣嘢你問得好啱，但做大佬唔係咁易，要擔當得到！我自己踢到最好，你踢得唔好一回事。我搵人返嚟唔好我負責任，都同個會有交代。我信任你畀你做大佬，邊個唔想隊波有個大佬，連教練佢都唔聽，你都知㗎啦，佢有佢自己個性，佢有自己踢法，教練要佢踢邊度佢唔聽，我係咁，我要自由人。可能佢比較高傲啦，喺日本踢過代表隊，嚟到好似睇到我哋低啲囉。」
李輝立最後補充指，認為球員應遵守球會規則：「球員唔應該咁樣囉！任何環境之下，你要遵守球會規則，做到最好囉。我哋好尊重㗎，每一場都當佢做大佬。好似上一場，你呢度唔滿意，嗰度唔滿意，好啦呢一場俾你排陣。你排咗嗰陣俾我先，我叫教練照做。一場波之嘛，唔爭得好遠，如果呢場波你（贏）4：1、5：1，咁咪證明你得囉！咁佢喺香港都想行高啲嘅，想理文搵佢，想傑志搵佢㗎！你踢得好，人哋自然會搵你！」
嘆「黑開有條路」 林嘉緯：首先要互相相信先
作為流浪老大哥，林嘉緯則指球隊在季中輸波後，已出現信心問題，更「黑開有條路」，強調球員依然很搏命，但認為一眾教練、球員必須團結：「搵返我哋自己本身球隊有咩人、有咩優點最大發揮，首先要互相相信先。職業足球員練波要自己落力啲先啦，去到低潮，你要講質素㗎啦，無辦法。」
林嘉緯期望，球隊能好好調整，在下周三的菁英盃四強賽事翻身，但承認士氣「差少少」，重申球隊有能力，但認為要先好自己，又透露個人很大機會在今季季尾後退役。
而今次事件的「主角」神田夢實，他在賽後則脫去上衣，赤腳在草地上跑步加操。
記者：麥馬高、周頌謙