（獨媒報導）港超聯球隊大埔今早開操，球隊今季班費維持700萬元，以爭取聯賽前五為目標。曾帶領大埔奪得港超聯冠軍的李志堅，今季重掌帥印出任主教練，他冀望能重新建立球隊。李志堅又表示對大埔有情意結，指自己亦在大埔青年隊出道，並曾居住在大埔：「大埔俾我嘅感覺不嬲都係良好嘅，好團結呀，好有氣氛呀，希望可以再同佢哋一齊行。」
大埔去季主教練李恆匯、守門員教練陳家麒先後移民離隊，今季由李志堅出任主教練。被問到是否小休復出，李志堅就稱自己一直在球圈中，去年5月才與東方處理好合約，「無曝光囉，可能覺得我再喺度，但我覺得唔係」。
球隊今季教練團成員有多個變動，李志堅指出，秘書長陳平原本對他表示，呂志興、葉佳及李瀚灝均會出任助教，但三人最終因有其他崗位而作罷：「對我嚟講就辛苦啲，佢哋始終比較熟悉，我會容易啲掌握，呢一方面最大分別。」
右為李志堅
僅20名球員有微言 李志堅：千祈唔好仆親囉
不過，大埔今季陣容就僅得20名球員。李志堅提到，其親自簽入兩名巴西外援及陳肇鈞，但承認球員數目不足：「20個裡面包含咗青年球員，你講緊有3個守門員，你可以想像到。如果20個球員都係好當打嘅，梗係可以啦。每個位置千祈唔好仆親囉⋯⋯」他強調，自己放眼職業球隊所需，不應用其他球隊作比較，必須有足夠的調配。
對於邀請陳肇鈞加盟，李志堅形容為互相幫忙，市場上能協助球隊的本地球員不多：「我都見唔到有咩球員，我都好多謝Philip喺我哋呢個條件嚟幫手。」
曾帶領大埔奪得聯賽冠軍，今次崔護重來，李志堅就認為每個人均有不同階段，稱會慢慢建立球隊：「16年去嘅時候大家都未必諗到19會攞冠軍，所有嘢我認為係要累積。心裡面諗好enjoy 件事，我希望主教練身份多啲，無其他角色。梗係想有成績啦，但急唔嚟，一步步嚟。」
大埔主席林奕權
今季未獲和富社企冠名 林奕權認對贊助有影響
大埔今季以爭取聯賽前五為目標，《獨媒》問到具體情況，及會否有壓力。李志堅稱「其實係要有目標嘅」，希望能加強競爭力：「上年我哋第七，今年講第五都應該嘅，唔會講第六㗎嘛，球員又好球隊又好，自己又好都要諗法嘅。」
主席林奕權則稱球隊今季班費700萬元，對於僅得20名球員，他強調仍有空間讓李志堅爭兵，但希望能有一定質素：「等教練慢慢揀心水，都係可以商量嘅，如果有好球員，就會盡量集中。」另外，和富社企今季未有冠名贊助大埔，球隊會以大埔的名義出賽。林奕權就稱不清楚原因，並承認對贊助有一定影響，指和富社企的冠名贊助佔班費約100萬元：「影響梗係有啦，全力睇吓搵吓其他贊助囉，你幫我賣下廣告囉，哈哈。」
陳肇鈞
陳肇鈞回巢 強調與李志堅是好朋友、信球隊具競爭力
陳肇鈞在2018至2019年球季曾效力大埔，更替球隊拿下聯賽冠軍，去季則效力晉峰，今季重返球隊跟隨李志堅。陳肇鈞對記者表示，自己一直與李志堅保持溝通，形容二人已不是師徒關係，而是最好的朋友。他透露曾收到其他球隊邀請，但考慮到出場機會，及與李志堅的合作，便沒有考慮其他選擇：「同佢重遇係超級開心。」
下月便三十有一，陳肇鈞指自己現時已較成熟，能與隊內年輕球員，及外援拍住上，相信會扮演領袖的角色，「今年係可以做到一番好成績」，強調不論效力爭標或中下游球隊，「都係咁樣踢」、「尚係有好多貢獻可以俾到球隊」。陳肇鈞深信球隊具競爭力，李志堅在2019年便以兄弟班替球隊拿下冠軍：「有堅sir喺度嘅話，每一隊波都係有競爭，佢絕對唔會容許一隊波越嚟越下沉，佢只會係向上。」
隊長陳曉鋒
「綠戰士」今季有保連奴離隊轉投理文，球隊簽入兩名巴西球員，即後衛馬高斯山度士（Marcos Santos）前鋒馬卡雷拿（Michel Renner），並續從理文借入翁煦濤。李志強調外援對球隊很重要，所以用了不少時間、較謹慎地揀蟀：「最低限度佢仲喺比賽裡面，兩個都仲打緊嘅，起碼出到場。」
錢兆琛
錢兆琛回歸 透露今年初曾發電郵予湯加足總
另外，守門員錢兆琛亦從南華回歸大埔。錢兆琛稱獲譚朗明邀請回巢，「試多次，睇吓改進咗仲係咪差咁遠」，稱在南華期間已專注改善技術。錢兆琛的母親是太平洋島國湯加人，對於一直有傳會入籍湯加，他對《獨媒》透露今年年初在中間人協助下，曾發電郵聯絡湯加足總：「一定想玩吓嘅，但都係叫等消息，不過嗰邊唔係好完善。啱啱開頭啦，所有嘢都未發展。」
大埔在8月2日將到韓國，進行為期八日的集訓，與當地球隊舉行三場友賽，包括K2、K3及半職業球隊。
張志勇
張志勇現身練習場 替前東家處理強積金
球隊今早在大埔廣福人造草足球場開操，曾效力大埔的張志勇同現身練習場，他對《獨媒》表示已轉任保險經紀，更替前東家處理強積金：「我同大埔搞MPF呀，現時主力係宏利！」他形容現時工作十分充實，今季亦不會踢低組別球隊，稱「踢波踢咗十幾年都攰」。
多名高層包括大埔足球會會長葉吳彬彬、大埔足球會主席林奕權、副主席陳笑權、大埔體育會主席蔡錦光、秘書長陳平，及大埔民政事務處專員陳巧敏等亦有出席開操儀式。
