【獨媒報導】大埔今季強勢出戰港超聯，劍指挑戰冠軍，陣中兩名主力兼港隊球員陳肇鈞、謝家榮均選擇留隊。應屆香港足球先生陳肇鈞確認，曾接獲多間中超、中甲球會邀請，但在考慮後決定留港，為大埔爭取好成績：「我去到呢個年紀，都無再諗呢啲嘢，疊埋心水留喺度。我唔係淨係為一份好大嘅糧，想做一個幫到其他人、或者感染到其他人嘅一個人。」
現年31歲的陳肇鈞，去季鯉魚翻身，先替香港隊在亞洲盃決賽周射入賽事歷來第1,000球，並替大埔贏得港超聯亞軍，兼當選香港足球先生，氣勢一時無兩。
陳肇鈞：大埔已昇華 足以挑戰任何球隊
陳肇鈞今午出席大埔征戰新一季港超聯啟動禮後，對記者透露獲多間中超、中甲球會斟介，但在與大埔商討後決定留隊：「諗咗好耐、好多樣嘢，好多方面嘅諗法，放完假坐低同球會傾過，除咗佢哋好有誠意，我諗係佢哋方向好啱我。自己睇咗咁多年波，Feel 到隊波狀況係最成熟，大家知道需要啲乜嘢。」
去季在港超聯攻入9球的陳肇鈞，他形容「仲有啲嘢未喺香港完成」，包括未能為大埔贏得任何冠軍，認為球隊今季已昇華足以挑戰任何球隊：「我哋宜家呢刻行出去，唔會輸住嚟踢，當考慮到呢啲因素，大埔對我嘅將來嚟講係最適合。佢最配合到我，我最配合到佢哋，最終就係咁樣樣留低咗。」
棄外流機會 陳肇鈞：會諗吓係咪有啲對唔住自己
《獨媒》問陳肇鈞，放棄今次外流機會，會否感到可惜。陳肇鈞稱：「我會諗吓係咪有啲對唔住自己，但宜家唔諗啦，啱啱個moment 會諗吓，係咪要外闖一次。諗諗吓，好似呢一度嘅發展適合啲我。」他又笑言，留港可以與一班相熟的記者在一起：「因為我去到驚同傳媒溝通唔到，我普通話唔好。」
《獨媒》追問陳肇鈞是否替大埔贏得冠軍後，便會考慮外流。陳肇鈞想了想說：「嗯，我講真，去到呢個年紀，我都無再諗呢啲嘢，可能疊埋心水留喺度。我唔係淨係為一份好大嘅糧，想做一個幫到其他人、或者感染到其他人嘅一個人。」他希望能為培訓年輕球員，及為大埔在社區工作出力。
《獨媒》再問陳肇鈞，對於留隊是否掙扎了很久，陳肇鈞坦白承認，又指曾與領導層坐下商討：「佢哋俾好多空間我，最尾留低係無悔，佢哋知我好開心，可以見返一班隊友。今季行出嚟，大家唔洗多講，都知道要乜嘢，想俾一個message 傳媒，我哋想做得更好，但（上季）攞第二，但喺足球度無人會記得攞第二、第三，我哋今年希望再做好啲。」
曾獲其他球隊斟介 謝家榮：區隊吸引力比較大
至於守門員謝家榮，他去季首次當選香港足球明星選舉的明星十一人，在杭州亞運替香港力挽狂瀾。據了解，謝家榮早前獲其他港超聯球隊，以重金邀請加盟。
謝家榮向《獨媒》確認，曾收到其他球隊的斟介，但最後選擇留隊。他提到，今季是在大埔的第三個球季：「覺得喺大埔呢隊球隊建立咗啲嘢，有一班好好嘅球迷，主場氣氛亦都好好，區隊對我嚟講吸引力比較大。」本身住在大埔區內多年的謝家榮，他表示大埔早已是自己的首選，加上看到球隊競爭力逐漸提高，所以希望能為球隊爭取更好成績。
盼為大埔爭好成績 讚領導層有誠意
記者追問：「所以有亞洲賽踢都唔諗啦？」謝家榮就表示：「因為我覺得大埔都有機會，其實差少少。做球員都好想去一隊競爭力高嘅球隊，我見到慢慢向呢一步進發。」他透露在收到其他球隊的邀請，形容過程「未至諗都唔諗」，但在坦誠與大埔領導層、教練商討後決定留隊：「最後協調到，都滿足到我嘅嘢，亦都feel 到佢哋嘅誠意。我都想繼續喺呢度，幫大埔攞到成績，上屆亞軍好開心，但都希望攞返個牌。自己始終都係大埔長大，會有歸屬感。」
謝家榮表示看到球隊今年組軍，深感老闆、領導層及教練都十分有誠意，「見到嗰決心同野心係有喺度」。他最後強調，大埔今季絕對有能力衝擊冠軍、亞洲賽資格，「自己都好期待」。
記者：麥馬高、周頌謙