（獨媒報導）港超聯鐵定下周六揭幕，升班馬北區今日在上水鳳溪小學舉行季前拜神儀式。對於球隊多達8人從晉峰來投，副總監何國泉就指只是「咁啱得咁橋」，稱在6月才開始組軍，是在球員無合約下才作邀請，「你冇合約咁我咪去傾，我覺得呢個係良性嘅嘢，可能人哋會覺得點解我拉走晒啲人，但係我從來都冇諗過，我其實好遲好遲先至搵佢哋。」
班費逾700萬 獲均業建築冠名贊助
上季甲組聯賽季軍北區，今季首次升超將以「均業北區」名稱出戰，並以北區運動場為主場。球會主席朱浩賢指班費逾700萬，「比初初預算overbudget好多」，幸好獲得均業建築7位數字的贊助費，並指球隊贏輸不重要，只希望踢出漂亮足球。
球隊人腳改頭換面，以蔡仲賢為首的教練團離開，隊中大部份球員亦離隊，只有助教鮑家耀、守門員張桂華及前鋒蘇啟浚留隊。新主教練則由前傑志助教梁志榮擔任，守門員教練則是上季在晉峰退役的何國泉。
主席朱浩賢（右）
晉峰8人轉投北區 何國泉：咁啱得咁橋
球隊大軍名單共29人，其中8人由晉峰轉投，包括林駿杰、湯振雄、葉卓文、劉君正、林樂勤、陳鴻耀、黃偉國及李昀洛，另有羅港威、朱偉鈞、周家樂等港超兵助陣。5名巴西籍外援分別為馬圖斯、韋法頓、肯迪、伊泰路及柏度。北區與晉峰更狹路相逢，被安排在開鑼日尾場分高下。
5名巴西籍外援
負責組軍的何國泉被指向晉峰挖角，他稱：「我諗人哋點樣睇就無可避免，因為其實有啲嘢都係咁啱得咁橋，我本身一路都冇諗過離開（晉峰），可能因為有啲合約傾緊，有啲細節好耐都未傾掂，北區就邀請我做呢個位置。」
球隊副總監何國泉
稱球員無合約才邀請
何國泉續稱，在6月初才知悉負責組軍，花了逾兩星期找到心儀的本地球員，強調球員的用波能力及態度最重要。他指，部份晉峰球員在球季完結後仍未有傾妥續約，「其實整整有成一個月時間，理論上你要傾約續約一早已經傾好，咁啱個啲都係未傾好細節，個啲又係我鍾意嘅球員，我咪嘗試邀請佢哋過嚟囉。」他強調職業足球不時都有此情況，「你冇合約咁我咪去傾，我覺得呢個係良性嘅嘢，可能人哋會覺得點解我拉走晒啲人，但係我從來都冇諗過，我其實好遲好遲先至搵佢哋。」
何國泉又表示，在答應加入北區前，有詢問晉峰總教練何信賢意見，「唔係話我自己走就走」，強調與對方關係仍然友好。
新主教練梁志榮
梁志榮稱不希望被大炒
第三度執教港超聯球隊的梁志榮稱，加盟是因為自幼在北區長大，加上受何國泉誠意打動，「日日都打電話嚟問我諗成點」，認為機會難得。對於球隊風格，他稱希望是用波為主，但有時都需要主力防守，「唔希望俾人大炒啦，呢兩年都有情況5球、7球、8球、10球。」
他又笑言足總「玩嘢」，透露本身賽程是先對冠忠南區，經修改後才改為晉峰，「一見到就覺得係咪特登㗎，係咪想造啲話題玩下嘢？」他補充指，其實沒有特別，始終都要對上晉峰，「球圈咁細，唔好話邊個扯走邊個啲球員，佢有能力搵到你啲球員，大家都係想球員好啫。」
葉卓文
葉卓文：加盟因北區爽快
由晉峰轉投的葉卓文亦表示，自己等待續約很久，「咁邊度有offer先，或者offer好啲，肯傾爽快嘅，呢個都係考慮因素。因為做球員都唔想等，即我要求你等你依樣嗰樣，既然呢度咁爽快就應承。」
對於首戰就要倒戈，他指很感謝何信賢，但轉會後都不能念舊情，「落到場都想贏嘅」。他坦言晉峰陣容不差，但無奈最終成績不似預期，希望轉會後可幫助球隊有力與上游球隊競爭，「以前好似未出場已經輸緊，甚至乎炒4、5球，過到嚟我唔想係咁。」