【獨媒報導】在賀歲盃過後，港超聯周六上演新界打吡，均業北區作客大埔，在下半場大部份時間踢少一人下，最終淨呑對手五蛋。北區主教練梁志榮在賽後慨嘆，球員太容易放棄是大敗主因：「如果你無放棄，我唔信會輸多五球。」細榮明言，不希望再看到出現類似比分：「你唔可以放棄！講真，你做緊職業足球員，你出緊糧，你打緊份工！譬如教練咁，輸緊5：0同你一樣坐喺度？唔可以囉！」
北區今季新升班港超聯，陣中部分球員曾效力晉峰，「細榮」有點勞氣說：「可能喺佢哋之前嘅足球生涯，覺得輸一球係輸，輸兩球又輸，輸三球又係輸，一路輸六、七、八球都覺得無乜嘢。」
大埔盡遣六名外援 卡爾特納任正選
大埔今場由謝家榮把關，盡用六個外援名額，包括加比爾、馬高斯山度士、馬卡雷拿、盧卡斯、比迪高及蔡立靖。北區則有林駿杰任正選守門員，正選有5名外援，包括柏度、韋法頓、馬圖斯、肯迪，及曾效力晉峰、新加盟球隊的西班牙中場卡爾特納。
上半場大埔先開波，兩隊互有攻勢，26分鐘，林樂勤與肯迪撞牆，後者起腳遭謝家榮接實。30分鐘，陳肇鈞回傳盧卡斯，盧卡斯禁區頂勁射高出，北區主教練梁志榮在場邊十分勞氣。
謝家榮連番撲救 陳肇鈞完半場前先拔頭籌
33分鐘，林駿杰開龍門球，但遭比迪高截獲皮球，梁志榮不禁搖頭，馬卡雷拿右路發難，陳肇鈞門前未及接應。39分鐘，肯迪半單刀，謝家榮先封出。馬圖斯補中笠射，謝家榮勉強托出底線。
上半場補階段，李家豪右路傳出，林駿杰單手打出，皮球落在卡爾特納背部，陳肇鈞第一時間起腳，為「綠戰士」半場領先1：0。
比迪高罰球直射入網 加比爾、馬高斯山度士補中
下半場換邊，北區換入王力威、伊泰路，但開波不足30秒，柏度掃跌盧卡斯，球證鄧慶富出示紅牌。48分鐘，比迪高處理直射入網，他在入球後與羅振庭以打坐姿勢慶祝，大埔領先2：0。
59分鐘，比迪高罰球斬入禁區，陳肇鈞頂中楣，加比爾補中，替大埔錦上添花贏到3：0。63分鐘，大埔又一次罰球，比迪高照板煮碗斬入禁區，盧卡斯跳頂，門前一輪混戰，馬高斯山度士門前無人看管下「執雞」，比分改寫成4：0。這時候，有大埔球迷高叫「新界無打吡，北區返屋企」。下半場補時階段，鍾偉強左路出波，盧卡斯門前撞射，大埔5：0大勝北區完場。
朱浩賢勉勵球員 梁志榮指踢少一人之前仍發揮正常
今場入場人數為582人，曾效力德甲球隊賀芬咸的巴西外援比迪高成為今場最佳球員。在賽後，北區副總監何國泉、教練鮑家耀一度指罵球證，不滿判決。主席朱浩賢就勉勵球員：「雖然今日咁嘅成績，但都睇到大家好努力。下一場唔好有咁嘅情況出現，呢兩場算得係咩！」
在上月菁英盃分組賽，北區同以0：5不敵標準流浪，在三星期內再錄得大敗。主教練梁志榮認為，北區球員今日在踢少一人之前，仍發揮正常，在落後下卻出現放棄的情況。
「細榮」表示，不希望再看到出現類似比分：「你唔可以放棄！講真，你做緊職業足球員，你出緊糧，你打緊份工。譬如教練咁，輸緊5：0同你一樣坐喺度？唔可以囉。你都要負返你責任，專心做埋，一日未吹完場，你都唔可以放棄。」
梁志榮：如果你無放棄，我唔信會輸多五球
梁志榮認為，球員在比賽期間絕對不能放棄：「你唔擔保突然之間可能入返三球、四球，呢啲係你唔會估到，但你一放棄就所有嘢都無，做人一樣！佢哋太容易放棄，嗰樣嘢成日都出現。」
「細榮」又指出，北區球員未有主動防守、集中力亦欠佳，才讓對手多次「執雞」，認為踢少一人絕對不是藉口：「如果你無放棄，我唔信會輸多五球。」
與理文、傑志積分差距收窄 李志堅：一場一場波打啦
大埔主教練李志堅表示，球隊在下半場踢多一人的情況下，才能連續攻入多球：「如果下一場對佢（北區），我都話俾你聽，都係要認真當同級對手咁打。」不過，他認為兩名下半季加盟的外援，盧卡斯、比迪高都有助球隊爭取好成績。
被問到與理文、傑志的積分差距收窄，大埔會否希望衝擊港超聯冠軍。李志堅認為理文、傑志都是很強的對手，大埔在上半季亦不敵該兩支球隊，「一場一場波打啦」，而今季是重組後的首個球季，只會盡力而為，「往後嘅日子先重要」。
此外，兩隊領導層包括大埔會長吳彬彬、副主席葉志雄，及北區足球會主席朱浩賢、秘書長姚銘等，在開賽前逐一與球員握手及合照。
記者：麥馬高、周頌謙