【獨媒報導】新一季港超聯下月開咧，冠忠南區今季班費維持800至900萬元，以爭取「上半版」為目標。談到去季僅排聯賽榜第五，會長陳文俊嫌球隊太心雄，認為「我哋自己要知自己事」：「舊年開季球員太過心雄，當正自己係一隊強隊，當正可以同傑志、理文打，我覺得唔係囉！我哋切切實實係一隊中游球隊，甚至乎中間偏下少少，如果你狀態唔好嘅話，我哋要自己調整返心態囉，打好每場波係重要，唔好心雄。」
巴西前鋒加盟僅兩日離隊 陳文俊：我哋廢事問太多
冠忠南區周一早上在黃竹坑遊樂場足球場開操，球隊今季有蔡子濤、杜馬思、古安奴、梁祐維及史提芬彭利拿等離隊，外援方面保留基斯、積遜、川瀨浩太、佐佐木周及李小恆。球隊上周四公布新加盟球員名單， 簽入亞哥斯達、宋柱浩、恩奴、莊晉及陳嘉昊，25歲巴西前鋒達施華在兩日後因家庭問題離隊。
對於球隊人員變動，陳文俊形容變化不大，屬「正正常常」，及以年輕球員更替，承認達施華離隊則令人感到愕然，惟不會急於尋找替補：「我哋唔係超級班霸，搵球員錢好重要，佢收我咩錢好重要，市場上面你話外援其實大把有得揀，重點係咪啱budget。」談到達施華離隊，陳文俊稱對方主動提出，並且是私人原因：「我哋廢事問太多，佢話想走咪俾佢走。」
史提芬彭利拿不獲續約 陳文俊稱「純粹嚟個變化」
陳文俊及後與一眾新球員合照，他笑言「我都第一次見佢哋」。然而，陳文俊承認球員人數不足，指如沒有傷病、停賽「都頂得下」，會物色更多球員。
至於史提芬彭利拿不獲續約，陳文俊指「純粹嚟個變化」，希望球隊能夠年輕一點：「如果我係有錢球會一定留返佢，多個本地球員有乜所謂啫。你知我每年條數個range 900萬，計條數，一係要呢個，一係就唔要呢個，如果你話有950萬、1,000萬，我簽埋肥彭都無所謂。」
對上季成績感失望 盼貫徹「平平穩穩」宗旨
南區前季贏得菁英盃冠軍，去季則四大皆空，在港超聯僅排第五。陳文俊表明對上季成績感到失望，歸咎球隊高估自己的實力，尤其以作客理文、傑志失分成為關鍵，加上港隊比賽長達七星期，南區表現起伏。
陳文俊透露，早前曾對領隊貝可泓、主教練楊正光表明要「自己知自己事」，引用去季作客理文的例子，指南區當時領先2：1，但球隊卻希望贏到3：1，卻不是維持2：1的比分至終局：「贏波好重要囉，當然啦係人都想打漂亮足球、壓迫性，我都想！但你要計計自己，唔係話妄自菲薄，你自己嗰個人腳，係咪可以有能力做全場壓迫，打足90分鐘呢，反而贏一場波開心啲呢？」
對於迫搶、傳控踢法為現時足壇主流，陳文俊認為要「切實啲」、「唔係潮流興咁打就要咁打」，以打麻雀作比喻：「要自己諗，我呢一手牌係咩牌先？我呢手牌係講緊清一色對對胡，我梗係做清一色對對胡，我呢手牌平糊牌咪平糊牌，我係三番牌咪三番牌囉，最好我呢鋪十三么𠻹啦。我哋搞波平平穩穩咁，呢個就係我哋嘅宗旨。我係咁多錢就喺嗰度搞，有驚喜咪驚喜囉，無咪平平穩穩囉。」
陳文俊稱少兩隊是好事 不應盲目追求球隊數目
在香港U23、晉峰及深水埗先後散班及自降後，新一季港超聯由11隊減至9隊，《獨媒》問到陳文俊的看法，他認為是好事，「講得衰啲，第一嗰隊同最尾嗰隊有得打下」，重申不應盲目追求球隊數目。
陳文俊解釋指，香港球場數目有限，每支球隊每周都要向康文署「攞場」，形容不是容易的事情：「希望球迷體諒，無得揀。舊年點解要3點鐘打兩場，撞晒期？其實被迫嘅，香港好多球場無得打夜波，2點鐘打又曬死人，我只能夠講，無奈又無奈。」
楊正光指部分比賽將作微調 劍指聯賽頭三
南區今季續由楊正光出任主教練，球隊目前只有22名球員。楊正光表示，希望能在短期內簽入一名外援前鋒、一名本地中前場球員：「雖然人腳比起上季少啲，希望以質素搭救啦。」
楊正光亦稱球隊去季改變踢法，球員需時適應，今季會貫徹進取的踢法，但會在部分比賽作出微調，尤其在防守上作出改善。談到今季目標，楊正光就劍指聯賽頭三，並晉身其中一項盃賽決賽：「球隊係要攞好成績。」
鞠盈智加入教練團 以成為職業球隊主教練為目標
另外，今月將37歲的鞠盈智去季退出港隊，今季加入南區教練團，兼任球隊助教。他指出任教練的感覺新奇，正在努力適應，今季將減少上場，主力協助年輕球員，又謙稱教練經驗仍不足：「做球員好簡單，諗自己、做好自己就得。做教練就要諗咩方式幫到球員，我要慢慢學習。」
鞠盈智最後表示，如無意外今季將是自己職業生涯的最後一季，他目前持有B級教練牌照，但必定會繼續進修：「未來可能有機會做香港隊主教練呢。」一眾記者哄堂大笑稱「會寫㗎呢句」，鞠盈智稱會以成為職業球隊主教練為目標：「呢兩年都有呢個想法，始終慢慢都覺得年紀大，未來都係行教練呢條路。你都知我哋，其他做唔到，廿幾三十年都係踢波，除咗踢波唔識做其他嘢，做教練會好啲。」
記者：麥馬高、周頌謙