（圖片來源：港協暨奧委會）
（獨媒報導）香港游泳代表何詩蓓出戰巴黎奧運女子100米自由泳決賽贏得銅牌，連同上屆兩面銀牌及較早前的銅牌，她個人至今贏得四面獎牌，成為香港最多奧運獎牌運動員。在四年前贏得獎牌後，何詩蓓說「多謝自己無放棄」；四年後再贏得獎牌，她就表示：「多謝自己一路相信自己，believing yourself，我今屆比上一屆老咗三年啦，同埋對自己嘅肯定都多咗，多咗好多信心。除咗係因為可能我自己成長咗之外，多謝我身邊好多人幫我，令到我有今日嘅成就，同埋佢哋不斷提醒我嘅實力，同埋令我更加可以一路咁進步。」
何詩蓓在第四線道起步，在50米游出25秒09，最後以52秒33的成績衝線，瑞典、美國選手則分別排第一、第二位。另外，何詩蓓的這面銅牌，亦是港隊今屆第四面獎牌。
現年26歲的何詩蓓，在上屆東京奧運200米、100米自由泳分別贏得銀牌，亦是首位代表香港的奧運游泳獎牌得主。在今屆巴黎奧運女子200米自由泳，何詩蓓贏得銅牌，成為歷來首名運動員連續兩屆奧運為香港贏得獎牌。
（圖片來源：港協暨奧委會）
（圖片來源：港協暨奧委會）
何詩蓓：比賽目標不為獎牌，最重要享受過程
在比賽後，何詩蓓率先接受《無綫電視》訪問，她表示參與奧運比賽不是只為了獎牌，而是希望做到最好：「睇吓自己實力去到邊，其實我都幾滿意個時間，同我best time 都係差好少，獎牌與否，我覺得最重要都係，知道我付出咗最大努力，我好享受成個preparation 同埋成個比賽過程。」
何詩蓓提到，在步出游泳池的時候看到很多「香港旗」：「比完賽嘅時候都見到，無論獎牌與否，大家都好支持我，我每次見到『香港旗』我都揮手，因我想佢哋真係⋯⋯啲人特登喺香港飛嚟睇我比賽⋯⋯所以我都真係好想同大家講多謝！」被問到如何面對壓力， 何詩蓓自詡已游水多年，有一定經驗處理壓力，但在比賽之前仍會尋找不同方法以放鬆，包括喚自己不要只聚焦在成績，而應重視過程。
何詩蓓及後再接受港台、ViuTV及HOY TV訪問，指比賽前已知道戰況激烈：「但係我個focus都係希望可以享受成個比賽嘅過程，享受終於喺奧運，可以有咁多人一齊睇比賽嘅經驗。」
（圖片來源：港協暨奧委會）
（圖片來源：港協暨奧委會）
何詩蓓：「花咗好多好多嘅功夫」保持表現
被問到如何維持穩定兼出色的表現，何詩蓓不諱言「花咗好多好多嘅功夫」：「我知道為咗呢個比賽，過去嗰幾年嘅訓練係，比準備Tokyo更加激烈⋯⋯訓練嘅時間、鐘數、游嘅距離都係比之前更加多，尤其是當你越來越老呢，身體嘅恢復力係越嚟越差嘅⋯⋯除咗恢復力差之外，訓練方面嘅volume 增加咗，真係唔容易嘅。但係我好享受訓練，好享受游水，好享受比賽嘅經驗，係辛苦我都覺得好值得。」
何詩蓓最後感謝港人繼續捱夜看自己比賽，「多謝你哋」，又勉勵電視前欲成為泳手的小朋友加油：「成個journey 可能唔容易，但係如果你有個夢想，你就一路跟住追落去。」
另外，何詩蓓透露在東京奧運後曾想過退役，但最後選擇堅持，「沒有後悔繼續游下去」，而原因不是為了獎牌，而是可以享受訓練的過程。至於會否征戰下屆奧運，何詩蓓就大賣關子，表示稍後才作決定。
（圖片來源：港協暨奧委會）