（獨媒報導）香港時間周四凌晨上演巴黎奧運羽毛球混雙8強賽，港隊組合鄧俊文與謝影雪以局數0：2不敵韓國的徐承宰及蔡侑玎，無緣晉級。今屆將是謝影雪最後一次參與奧運，二人賽後都哭成淚人。謝表示上月仍受傷患困擾，一直擔心未能參加奧運，感謝教練、隊醫等人幫助，以及鄧俊文一直沒有放棄：「可能過去一個月我喺球場每日都喊，佢受咗我好多，可能身邊嘅人都......我一個月之前可能連唧牙膏都唧唔到，梳頭又梳唔到，我今日可以完成呢個奧運，好多謝所有後面嘅人。」
目前世界排名第七的「鄧謝配」上屆東京奧運取得第四，今屆於小組賽以次名晉級8強淘汰賽，今場對上世界排名第三、應屆世界錦標賽冠軍韓國組合徐承宰及蔡侑玎。
在第一局，雙方開局打成2：2，之後徐蔡配一直領先，更曾連取三分拉開至8：11。鄧謝配未能把握機會追近，逐漸被拉開至9：16。鄧謝配適應節奏後一度連追三分至12：16，但徐蔡配在關鍵時刻連取三分，最終鄧謝配以15：21先失一局。
在第二局，鄧謝配開局出現連番失誤，以1：8落後，之後更連失四分至4：14。雖然鄧謝配之後曾連得四分追至10：18，但對方發揮較穩定，最終以10：21再失一局，局數輸0：2，8強止步。
（圖片來源：港協暨奧委會）
賽後訪問時多番流淚 「好辛苦捱落去」
鄧俊文與謝影雪由2016年起組合出戰羽毛球混雙至今，今屆將是謝影雪最後一次參與奧運。二人賽後接受《無綫電視》訪問均指盡所有努力，無奈速度與熟練度都不及對方，成績並不理想。被問到有甚麼說話想向身旁的拍檔說，帶傷上陣的謝影雪就稱：「多謝佢一路咁堅持。」她說畢便開始落淚，並用毛巾掩面。
鄧俊文之後亦哽咽稱：「我哋有成績好啲、成績好低時候，一路都好辛苦，真係捱落去，雖然今次係8強，但對我哋嚟講都叫對得住自己。」
（圖片來源：港協暨奧委會）
謝影雪：憂受傷致無法參賽 一個月前「梳頭梳唔到」
二人之後再接受港台、Viu TV及Hoy TV 圍訪時心情更激動，二人都淚流滿面。謝影雪表示很感恩可以參加今屆奧運，指自己兩、三星期前仍在急症室詢問醫生是否可以參加奧運，「開頭我都諗住嚟唔到今次奧運，我好感恩亦好享受打每一場。」她又覺得上屆發揮不好，但今次已「盡晒所有努力」，「我對得住自己」。
謝影雪感謝教練、隊友、隊醫等人的幫助：「可能過去一個月我喺球場每日都喊，佢（鄧俊文）受咗我好多，可能身邊嘅人都......」她續稱：「我一個月之前可能連唧牙膏都唧唔到，梳頭梳唔到，今日可以完成呢個奧運，好多謝所有後面嘅人。」
曾自我懷疑 提出換拍檔
她亦特別感謝鄧俊文，指他一直盡力做好自己，沒有怪責過她傷病：「好感恩遇到你，我打完女雙時都覺得自己要退役㗎啦。我遇到你，高高低低咁多年，我又受傷咗咁多次，你都冇放棄我。」她又透露在杭州亞運後亦曾自我懷疑：「我都見到好多人留言話『不如我退役啦，俾俊文夾個好啲』，我自己都懷疑自己，對自己冇信心，問過佢不如搵個好啲嘅拍檔，但佢都堅持夾返我，冇放棄過我。」
（圖片來源：港協暨奧委會）
鄧俊文：無佢無宜家嘅鄧俊文
鄧俊文亦感觸指過去一個月「真係好辛苦」，不論身體及心理都承受很大壓力，亦替對方經歷大大小小傷痛感到辛苦，感謝對方沒有放棄：「如果唔係遇到佢，可能未必有宜家嘅鄧謝配，或者宜家嘅鄧俊文。」
鄧俊文又談到近年成績不佳，差點未能在取得奧運資格：「我哋兩個好辛苦好辛苦咁頂返嚟，打返起信心，雖然今次最後攞唔到獎牌，但我哋真係盡咗最大努力練好、打好每一分，已經算係滿意。」
謝影雪在訪問後如釋重負，並與在場記者擁抱表示：「可以放假啦，哈哈哈！」