（獨媒報導）港超聯球隊港會今季成績優異，令不少球迷喜出望外，陣中翼鋒汪雙財是新加盟的華人球員。汪雙財歷年曾效力低組別球隊葵青、花花、晨曦、愉園及九龍城，有球迷給他「低組別球王」的美譽。本身任職懲教署的汪雙財，今季以業餘的身份踢港超聯，工餘時間就是訓練及比賽，幾乎為足球奉獻所有，他接受《獨媒》訪問，感謝港會令他能夠一圓港超夢：「無論球隊最後成績係點，對我嚟講都係好神奇嘅事。」
現職懲教署 每周兩晚收工去練波
29歲的汪雙財，現任職懲教署二級懲教助理，過去大半年，每周有兩晚下班便參與訓練，周末則為港會比賽。
汪雙財性格樂天，熱愛運動，從籃球、足球、排球到田徑，直至與同學踢葵青區隊，他才揀定了足球。財仔在青衣長亨邨長大，港隊女足前鋒張煒琪是他的鄰居：「街場見識過佢好勁㗎，我完全好渣，唔識踢波。」
中二那年成績不好，汪雙財留班一年，同一年踢葵青U15，他覺得自己跑得快，愛射門，決定要做前鋒，足球成為他的最大安慰。財仔獲葵青提拔踢乙組，同期的有廖偉業、張德誠。在考中學文憑試前一年，汪雙財第二次代表香港學界隊到蒙古比賽，隊友有李嘉進、劉浩霖，外出比賽自然感到高興，更高興的是覺得球技有所進步。
李志堅邀踢橫濱FC 婉拒因感欠出場機會
考完文憑試，財仔已心思思想踢職業足球。那是2012年的事，前東方主教練李志堅當時執掌橫濱FC，相中了汪雙財，連合約都幾乎傾得七七八八，就只差簽約，財仔拋下了一句：「算啦，我唔踢啦。」
這是汪雙財第一次與職業足球擦身而過，他當時覺得讀書比較重要，二來就是上陣機會：「我覺得去到會無得出場。嗯，同埋我個人唔悶得，會想同識嘅『波友』一齊玩，去到可能會唔慣。」隊友廖偉業則簽了橫濱FC，嘗到職業足球的滋味。
隨葵青踢初級組銀牌 首次大球場踢波畢生難忘
最後留在葵青踢丙組，汪雙財形容有意外收穫。葵青不但獲得升班資格，在初級組銀牌四強賽事，更以射12碼擊敗東方晉身決賽。在決賽，葵青在香港大球場不敵元朗，但這已叫汪雙財一輩子難忘：「可以喺大球場踢波好開心，如果我真係走咗去橫濱，未必可以攞到咁多嘢返嚟。」
翌季升班乙組，葵青在初級組銀牌四強硬撼和富大埔，擊敗對方再次擠身決賽，決賽在旺角場對晨曦，雖然最終大敗，汪雙財就取得士哥。記者不禁說「你記性很好」，財仔忽然嚴肅起來：「我經歷唔多呀，因為我嚟嚟去去，好深刻嘅經歷呢都好記喺自己心入面。」
在文憑試後升讀香港專業教育學院，讀到第二年，迎來人生抉擇。汪雙財未畢業便去投考懲教，並獲得取錄。財仔在家中排行最細，對上有三個姐姐，家人一直認為踢足球無保障，「佢哋覺得，踢波玩下就算啦」。「嗯，其實好大掙扎，自己好鍾意踢波，但都知道喺香港踢足球搵唔到食，又唔想屋企人擔心。」
加盟愉園感成長 未隨隊升班再與職業足球緣慳一面
在2014年，汪雙財以21歲之齡，入職成為二級懲教助理，同一個球季，他在葵青「大爆發」取得22個入球。「其實當時只係想試吓，點知一見就收咗。我唔except佢請，畢竟咁後生。」在加入紀律部隊後，劉志強找汪雙財轉投晨曦，他自言是踏出第一步，第一次到陌生的地方踢波，球隊最後以不敗姿勢贏得甲組聯賽冠軍。
翌季老闆唔搞，晨曦星散，愉園開出2,000元一場的「車馬費」，邀請汪雙財、王景華、馬文俊及譚志傑過檔，協助球隊升班。在愉園期間，汪雙財看到一眾後輩張俊軒、袁世傑的表現，忽然有感自己「大個了」：「一班後輩都係16、17歲，佢哋啲波唔會差得過你，只係諗法未成熟。嗯，開始覺得都差唔多，教吓人都OK嘅。」
兩年來替愉園拿下乙組冠軍、甲組冠軍，愉園在2019年升班港超聯，汪雙財未有隨隊，這是他第二次與職業足球緣慳一面。「宜家一路做嘢，一路踢波，都叫對得住自己。」
曾考慮停薪留職踢職業 汪雙財：都係諗吓算啦
如果升班便要簽約，每早參與訓練，財仔坦言有一絲動搖。不過，他形容這是一場白日夢：「我有諗過唔做嘢一年，懲教其實係容許停薪留職，但年資就要重新計算，但都係諗吓算啦。」
後來就是球迷都知道的事，2020年新冠疫情肆虐，愉園班主陳志實拖欠職球員薪金，至今仍未找數，每名球員均遭欠下五至六位數的血汗錢。汪雙財嘆氣說：「唔知叫好彩定唔好彩吧。」
隨著愉園升班港超聯，汪雙財、王景華、馬文俊及譚志傑一起轉投花花，同樣是協助球隊升班。踢了半季，球季因疫情腰斬，汪雙財及後選擇離開球隊，在2021至2022年球季重返晨曦。原來他不滿有球員在半場教練檢討期間食煙：「我覺得好差，作為踢波嘅球員，你係咪要呢啲時間，都要攞支煙出嚟食？」
結果又回到丙組，汪雙財同意低組別比賽的球場的質素較差，部分球員不太會踢足球，但指不少球員都用心用力。財仔認為，在香港要踢低組別賽事不容易，除了要抽時間，同要克服場地困難，球隊資源亦較少，球隊當時「一周零課」：「去到何文田配水庫，嗰個都係球場，周圍都凹凸不平，根本唔應該用嚟比賽！」
自我期許高 球迷送「低組別球王」美譽
去季應教練駱韋年邀請，汪雙財加盟另一區隊九龍城，同樣要協助球隊升班。不過，球季因疫情再次腰斬，九龍城在季尾舉行的聯賽盃不敵觀塘，僅奪得亞軍。財仔反思認為，表現明顯退步，先是球隊進攻重擔落入許宏鋒、彭超然身上，入球亦未能達到雙位數。
球迷給他「低組別球王」的美譽，在愉園贏盡低組別冠軍，汪雙財一直都有很高的自我期許：「踢波不嬲都係想做好自己，我唔係要入好多好多波，但要認真，唔想hea 住咁過。我希望球隊係有目標，爭冠軍、升班，唔想無所事事咁完咗個球季。」
汪雙財是很有紀律的球員，一直努力做運動，跑步、健身，全因不想變成肥仔：「我已經踢Sunday league，所以更加唔想漫無目的，一個禮拜日就咁浪費咗，對自己有要求。」
浩運跟操獲賞識 永記處子戰出場一刻
在2020年效力晨曦期間，由於球隊「一周零課」，財仔便跑去跟母會葵青訓練，在朋友介紹下又到乙組的浩運跟操，期間認識了教練Rich Le-Gallez。誰知道，這成為了汪雙財足球生涯的轉捩點。教練在去年暑假WhatsApp 汪雙財，問他是否有興趣到港會試腳。財仔還記得當時正跟女友睇結婚場地，他收到訊息後「等一等，有啲緊要嘢」：「嗰陣其實唔知自己踢唔踢到，唔知工作個度俾唔俾的，但覺得都要試咗先。」
士為知己者死，財仔即時回覆「可以」：「既然有人睇得起你，咪試吓囉。」如是者，汪雙財加入了港會，薪酬與九龍城一樣，港會新加盟的華人球員還有吳子聰、蕭嘉明。
效力港會，汪雙財獲得了踢港超聯的機會，這是夢未以求的事。財仔既開心又興奮，他先向懲教署入紙申請，很快獲得署方批准，大前題是不影響工作。
2022年9月4日，汪雙財迎來港超聯處子戰，他為港會正選上陣，自言永遠都會記住出場的一刻。財仔還記得，那個下午天氣很熱，步入更衣室後更不住的讚嘆：「原來咁好㗎，波衫、戰術板有人擺好晒，呢啲係前所未有，你知啦甲乙丙要一腳踢。」
真正的挑戰隨之而來，港會第二場賽事對傑志感到差距，球隊只有零星的攻勢，汪雙財的印象更深刻，好像小朋友和大人踢波。畢竟是港超賽事，除了比賽，訓練的強度亦不可再與低組別同日而語，「要好認真咁練，先可以叫做拍埋唔會輸蝕」。
工餘時間獻足球 感謝妻子成後盾
港會現時每周訓練三課，是港超聯唯一一支半職業球隊。汪雙財每周的例假都用作踢波，每周總有兩晚，下班就會趕到球場訓練，工餘時間均獻給足球。
財仔感謝妻子成為其後盾，「其實好辛苦，佢份工都好辛苦，有時凌晨都要返工，仲要兼顧好多家務，好多謝佢無條件的支持我追夢。」除了妻子，財仔的父母亦會看直播，有懲教署同事更對他說「因為你先睇港超咋」。
港會今季成績優異，在訪問之時，球隊仍在與標準流浪爭奪港超聯第四名。汪雙財在球場上要做好防守，更要學習保留體力。他對自己今季的表現不太滿意，認為能做得更好：「有時太急，以前甲乙丙慣咗一攞波就去，我知自己體能都未有90分鐘。」
承認曾感後悔 神奇之旅搏盡先算
「喺超聯要更專注，著重團隊配合，我哋係弱隊，攞到控球權就好珍貴，更要用好個波。喺超聯要全套都做得好好，你扭過咗，再做好埋傳中，先叫合格。喺下面（低組別）自己扭囉，扭失咗無人鬧你，呢球唔掂呀，下球再嚟過囉。」
說到足球便眉飛色舞，財仔真情剖白，承認未踢港會之前，其實有一點後悔，後悔與職業足球擦身而過：「始終想試，但又無機會踏上職業呢個舞台。」「嗯，今季其實係一個巧合嚟，無一隊波可以咁樣半職業，多謝港會圓咗我呢個港超夢。」
「無論最後成績係點，都係一趟神奇之旅。」汪雙財表示，個人去向來季未有定案，透露不排除港會或會「大搞」成為全職球隊：「搏盡踢埋今季先，走得幾遠得幾遠，入多幾球。」
記者：麥馬高、周頌謙
延伸閲讀：