【獨媒報導】亞洲盃決賽週即將揭幕，港足力爭晉級淘汰賽。在港足26名球員外，效力港超聯球隊東方、吉爾吉斯後衛高素巴耶夫（Tamirlan Kozubaev），亦會參與亞洲盃賽事。高素巴耶夫接受《獨媒》訪問，表示最愛香港大自然，尤其是石澳泳灘：「喺香港，想要海就有海，想要山就有山，係一個好平靜、輕鬆嘅城市。如果你想要高樓大廈，呢度又有好多⋯⋯仲有購物中心，基本上可以搵到你想要嘅一切。」
港人對中亞國家可能較為陌生，吉爾吉斯政府早前便與香港特區政府達成協議，特區護照持有人經瑪納斯國際機場入境及持有回程機票，可免簽證前往當地旅遊，最長可逗留30 天。
外表強悍、家庭優先的鐵漢 每年返國與家人團聚
從吉爾吉斯到香港，共有4,223公里的距離。現年29歲的高素巴耶夫，過去10年間輾轉效力過11間球會，在2022年3月4日加盟東方，成為球隊後防主力至今。高素巴耶夫外表強悍，相處下來便知道感到其敦厚，而且更是溫文有禮。東方隊友都叫他Tamir，在訪問當日前的訓練，Tamir 便與巴科爾打成一片，梁冠聰更叫他做「Super Star」：「我係足球員，對於我嚟講每日就係比賽，每日嘅每場比賽都係挑戰。」
在職業生涯期間，高素巴耶夫曾效力立陶宛、塞爾維亞、馬來西亞、印尼、俄羅斯、哈薩克球隊，早已說得上四海為家。不過，家庭對這名鐵漢來說，比一切優先。Tamir 每年都會回國與家人團聚，珍惜和父母相處的時光：「屋企人好重要，而我一直喺出面踢波，周圍住，當你適應新環境嘅時候，又可以認識到新朋友，對於我嚟講係好好嘅事。」
點解會嚟香港踢波？高素巴耶夫前年在哈薩克球隊效力的時候，接到經紀的邀請，獲悉東方主教練盧比度對他感興趣，在了解球隊的歷史及狀況便決定來港「搵食」：「東方有好好嘅球迷，悠久嘅歷史。」Tamir 亦不吝嗇對Chino 的讚賞：「我鍾意同佢（盧比度）一齊工作，佢嘅戰術、訓練方式，我對佢好滿意。」
感恩東方像大家庭 球員間互相支持
東方今季以老帶新，班底由具經驗的本地球員、外援與年輕球員組成，在訓練中有講有笑，球員之間相處融洽。說到東方的隊友，高素巴耶夫便不住的微笑：「東方就好似一個大家庭，有時候你未必會喺其他球隊感受到呢樣嘢，你會覺得自己係一個團隊入面，係好嘅感覺，大家互相支持。」
前年亞協盃賽事以賽會制形式在泰國舉行，高素巴耶夫仍記憶猶新，原來他當時確診新冠，經過隔離及康復後，趕及上陣，邊沉思邊說：「竟然喺泰國見到嚟支持我哋嘅東方球迷，我唔知講咩好⋯⋯實在太神奇，球迷咁遠都嚟支持你。」
謙卑敦厚 虔誠的穆斯林
「足球就係生命，有時你會輸，有時你會贏，有時你會打和。有時你狀態會上升，有時又會下滑。喺生活中都係一樣，但係東方總係互相支持，呢個感覺真係好好。」
每次比賽落敗，球員都難免感到沮喪，高素巴耶夫巴耶夫亦不例外。在早前的世界盃外圍賽，吉爾吉斯遭馬來西亞連入三球反勝4:3，Timar 已不欲多提：「好沮喪，我講唔到落去⋯⋯我需要忘記佢，永遠都冇可能再踢到好似個場咁。」
Tamir 是虔誠的伊斯蘭教徒，與其他穆斯林一樣，每天進行五次祈禱跪拜。他逢星期五在訓練後都會去清真寺：「我相信所有嘢都係嚟自真主，佢俾我哋嘅嘢都係最好，如果輸波，對我哋嚟講都係一個經驗，係我哋要學習嘅嘢。」
愛到石澳泳灘 為女兒放棄行山
一般來港的外援球員，喜愛夜蒲的總會去中環蘭桂坊、尖沙咀諾士佛台消遣，高素巴耶夫則予人純樸的形象。Tamir 與妻子、兩名女兒居住在紅磡，閒時喜歡去海邊和行山減壓。他堅持每早8時起床，原因只有一個，就是希望在訓練前先送女兒上幼稚園，然後才到將軍澳足球訓練中心參與球隊練習。
Tamir 有時會從康城站步行到訓練中心，有時則會坐隊友的順風車，訪問當日便是黃浩然的「副駕」：「係啊，每日生活其實都差唔多，每日都去一樣嘅地方。」比賽、訓練、與家人散步，在異鄉的日子裡，家庭就這樣成為高素巴耶夫最大的動力，一切平凡但滿足。
高素巴耶夫自小在重山疊巒的環境下長大，來港後因為女兒而鍾情泳灘：「我唔可以成日去行山，因為我有兩個女，細嗰個得1歲，佢唔可以喺山上面坐超過10分鐘。」Tamir 又笑言女兒「坐唔定」，所以乘搭巴士亦成為「不可能的任務」：「 如果你想搭巴士去某個地方，你至少需要一個鐘，但佢唔可以坐多過10分鐘。由我屋企出發去到尖沙咀，佢已經喊咗。」
相對吉爾吉斯較貼近大自然，高素巴耶夫愛到香港的海灘，尤其是石澳：「以前我住過一啲地方同城市，你可以見到山，但搵唔到海；又或者你可以搵到海，但見唔到山。但喺香港，想要海就有海，想要山就有山，係一個好平靜、輕鬆嘅城市。如果你想要高樓大廈，呢度又有好多⋯⋯仲有購物中心，基本上可以搵到你想要嘅一切。」
要真正說好香港故事，其實從來都不是自吹自擂。
讚祖連奴非常有實力 誓領吉爾吉斯晉級
談到港超聯，高素巴耶夫最欣賞前傑志球員兼黑山國腳丹恩奴域，他們更曾經是鄰居，而且關係十分不俗，來自中亞國家土庫曼的明加索夫，及港足新成員祖連奴，在Tamir 眼中都是非常有實力的球員。相比起其他曾經效力聯賽，Tamir 認為香港足球較注重整體戰術，球員沒有太多的個人主義：「如果你要話香港足球有啲咩可以改善，我諗我宜家俾唔到建議，或者之後啦！」
職業足球競爭激烈，從來都是有能者居之，每支球隊球員進進出出是平常事。高素巴耶夫自21歲便成為代表隊成員，至今共44次代表吉爾吉斯國家隊上陣。在2019年亞洲國家盃決賽周，吉爾吉斯在小組賽擊敗菲律賓，以最佳第三名晉級淘汰賽，在十六強不敵阿聯酋出局，Tamir 在四場賽事都正選登場。
吉爾吉斯現時世界排名98，Tamir 將第二次代表國家出戰亞洲盃決賽周，他坦言接到電話的一刻依舊感到自豪：「呢種感覺同你喺球會踢嘅時候好唔同。當你為國家隊效力，你會感受到更大嘅壓力，更重要嘅係，一年內你最多可能為國家隊踢5至8場比賽。」而今屆同組對手都不是泛泛之輩，包括沙地阿拉伯、阿曼及泰國。高素巴耶夫明言要踢出上屆的水準：「呢個係最低要求吧，至少要晉級。」
足球、家庭及信仰，就是高素巴耶夫的全部。
高素巴耶夫：我鍾意香港，鍾意香港嘅生活
至於港隊與吉爾吉斯，誰的實力較高？高素巴耶夫則表示不清楚，因為兩隊還未有機會交手：「香港隊入面都有優秀嘅球員，有球員喺中國踢波，我知道中超嘅水平都唔錯。不過，吉爾吉斯都有球員喺歐洲踢波。咁如果你問我⋯⋯我哋比賽嘅話，我梗係覺得吉爾吉斯贏啦，呢個國家嚟㗎嘛。」對的，高素巴耶夫就是做好自己，謙厚而且不妄語的球員。
在過去的日子，高素巴耶夫在每支球隊的日子都說不上長，那他希望留在香港多久？Tamir 則表示，要取決於球隊及自己的表現：「如果我踢得好，球隊自然希望我留低，如果踢得唔好就冇人要我，足球世界就係咁。但係我想講，我鍾意香港，鍾意香港嘅生活。」
記者：劉苑嫻、麥馬高
攝影：周頌謙