【獨媒報導】港足備戰亞洲盃決賽周進入最後階段，昨晚友賽兩球不敵沙特阿拉伯，一眾球員今日休息一天恢復體力。香港球迷陸續向卡塔爾出發，陪伴港隊出戰今次賽事。茹子楠向《獨媒》表示感謝球迷遠征：「唔單止我哋球員die for Hong Kong，佢哋都die for Hong Kong。專登由香港過嚟，我哋非常感激佢哋，佢哋嘅團結令到我哋更加有火咁去踢波。我唔包保一定會贏，但包保一定會出盡全力，踢好戰術、踢好每一場波，去奮鬥每一球波。」
據初步統計，今次有200名香港球迷到卡塔爾「撐到底」。「魚子」除了感謝一班遠征球迷，亦感激所有在香港看電視、撐港隊的球迷：「你哋嘅支持我哋收到，我哋會努力，會加油。」
傷兵況大幅改善 指與沙特友賽令港隊戰術更純熟
談到今場友賽，茹子楠表示，對港隊傷兵況有大幅改善感到高興：「距離正賽仲有4日，我哋最需要嘅就係球員狀態，同埋傷勢好轉，對球隊好重要。」在前年世界盃分組賽，沙特阿拉伯擊敗後來奪得冠軍的阿根廷，「魚子」就表示與沙特友賽，有助港隊戰術更純熟：「佢哋都係好出色嘅對手，迫我哋啲節奏、決定同傳控都會更加快啲。」
沙特阿拉伯現時世界排名56，屬於亞洲一線勁旅，茹子楠就稱比賽頭20分鐘，已感到對手十分強勁，而且與伊朗不相伯仲：「佢哋嘅build up 能力，佢哋球員同球員之間嘅chemistry 同埋默契度非常之強。令我諗起上年對伊朗嘅比賽，佢哋（沙特）嘅速率同伊朗差唔多。」
「魚子」最後表示，主教練安達臣給了全體球員不少信心，身心均已適應卡塔爾的環境，尤其是時差：「而呢度啲場地嘅草比較薄或者短，但個波嘅去速係非常之快，我哋其實都適應咗。」
《獨媒》亞洲盃採訪開支由逾130名熱心讀者贊助，波事春秋 冠名贊助 ⚽️🇭🇰，以及 Footstop 買波飛 贊助