【獨媒報導】港足周日（14日）出戰亞洲盃分組賽首場賽事，在先失一球下，憑陳肇鈞下半場初段入球一度扳平，但之後再失兩球，以1:3不敵阿聯酋。對方兩次經VAR 覆檢獲得十二碼成為賽事焦點，港隊主教練安達臣賽後將矛頭指向今場的球證團隊，認為球隊表現很好，但就不幸地被球證決定了賽事，亦不解球證的決定：「喺歐洲呢啲判罰根本唔會發生！」
《獨媒》記者麥馬高、周頌謙 卡塔爾直擊
安達臣：球證決定了賽事
安達臣出席賽後記者會時高度讚揚球隊表現：「我哋踢得好有活力、高壓，製造咗好多機會，不過就好唔好彩，被球證決定咗場波，有啲50/50的時候，佢兩次都判咗對方得益。」港隊三個失球中有兩個均為十二碼，兩球都是經VAR 覆檢後才被判罰，其中第一球是周緣德被敵隊球員省中左手，安達臣坦言對球證判決感失望，指初時見到今場球證Muhammad Taqi 是新加坡籍，以為東亞球證會令我們有1％運氣，又認為周緣德不是想打走皮球：「我都唔明點解佢會咁判，不過佢有權嘅。」
陳晉一：仍未消化被罰十二碼
港隊失的第三球則緣於陳晉一被指踢中艾哈辛尼（Yahya Alghassani），同樣經VAR覆檢後被判罰十二碼。「一仔」賽後向記者坦言：「嗰球十二碼，宜家自己都仲未消化到，落到球場一下半下⋯⋯自己都明白個判罰，叫做自己take 個責任，希望學習到唔好再犯。」
陳晉一又表示對輸波感到失望，「我哋賽前已經知道好難打，對手喺排名各方面都比我哋好，但係呢幾個禮拜集訓、友賽，我哋覺得我哋可以喺度爭取啲嘢。」他稱球隊會檢討犯錯，亦希望「keep 住做我哋叻嘅嘢」。對於港隊闊別56年再出戰亞洲盃決賽周，「一仔」就稱今場比賽節奏快、強度高，對方的技術水平及體能均在香港之上，但認為：「我哋能力可能不及其他人，但係唔代表我哋嚟呢度就好容易俾佢攞三分。」
安達臣形容判罰是「不幸」，陳晉一就認為：「與其話唔好彩，不如我哋再做好啲，我覺得我哋可以證明到有一戰，佢哋都唔係踢得好舒服，希望令之後兩場對手知道唔係咁易贏到我哋，我哋都有能力入波。」
被問到如何評估晉級機會，「一仔」指沒有想得太遠，「逐場逐場嚟」，並稱伊朗與巴勒斯坦的世界排名都比香港高，前者更是奪標分子之一：「每一場對我哋港隊嚟講都係決賽。」
李毅凱：已盡最大努力，搏到無悔
今場擔正踢中堅的李毅凱亦就一場內兩次被VAR覆檢判罰十二碼指：「第一球Oli (周緣德）唔好彩省到隻手犯手球，冇辦法。第二球，我同一仔剷波，好多人睇到都係正常唔會有十二碼輸，但球證判咗就係判咗，呢個都係球賽一部份。」
被問到港隊是否不值得以這個比數落敗，阿毅就指球隊上下今場已盡最大努力，嚴格執行安達臣的逼搶指示，「所有都做得好好，踢到拼勁出嚟，搏到無悔啦，但呢兩球十二碼⋯⋯當係一個好好嘅經歷啦，下一場再做好啲。」
對於在今屆賽事領軍港隊防線，並與後起成功爭取正選的周緣德拍檔，阿凱坦言有新鮮感，希望帶動到其他動友越做越好，每一場都有進步，有力與強隊抗衡。
《獨媒》亞洲盃採訪開支由逾130名熱心讀者贊助，波事春秋 冠名贊助 ⚽️🇭🇰，以及 Footstop 買波飛 贊助