（獨媒報導）多個商場直播世界盃，昨晚（11月22日）卡塔爾世界盃B組首場賽事由「三獅軍團」英格蘭迎戰伊朗，最終以6比2大勝。數百人出席荃灣如心廣場活動，不過大多數人不是英格蘭或伊朗球迷，而是歌手洪嘉豪的歌迷。
除洪嘉豪外，前港足隊長、港甲東區球員陳偉豪，以及曾獲香港足球先生、港超聯標準流浪球員盧均宜均現身派對，陳偉豪笑言「今日啲人唔係撐英格蘭，係撐洪嘉豪」。洪嘉豪一出場，全場響起歡呼。洪稱陳偉豪及盧均宜為自己的偶像，「我真係有入場睇佢哋㗎」。
盧均宜（右二）、陳偉豪（右一）
被問到心儀隊伍時，洪嘉豪笑言「好坦白講，伊朗其實我係一個都唔識」，稱自己有看英超，今日也撐英格蘭。洪又表示「麥佳亞呢個嘢就曳啊、真係曳啊，又唔知點解佢喺度喎，都係出嚟搞笑啦，同我哋一樣啦」。三人先與眾人玩射龍門遊戲，再坐在後排咕𠱸上觀賽。洪嘉豪專心觀賽，但有坐在前排的歌迷就較難專心，不禁頻頻回頭拍攝洪嘉豪。
球迷稱要睇「麥麥送」
歌迷包圍商場下，仍有零星英格蘭球迷散落各處。穿上英格蘭後衛、利物浦阿歷山大阿諾特球衣的林先生一邊飲啤酒，一邊觀賽，神情肉緊。他指因為在家不能歡呼，所以到商場感受熱鬧氣氛。他又笑言今日是為了看麥佳亞「送波畀對面入」，「麥麥送啊嘛」，但認為麥佳亞今晚的表現已比想像中好。
記者提到在卡塔爾球場反而不能飲啤酒時，林先生愕然道「真係咩？差好多氣氛喎！」對於現場較少英格蘭球迷時，他笑言「其實點解今日有洪嘉⋯⋯洪嘉豪？」但讚道一眾歌迷也有為賽事歡呼，氣氛不錯。當英格蘭在90分鐘射入第6球時，他興奮地振臂高呼。
完場後，洪嘉豪冧一眾歌迷道，「好開心，因為有大家一齊啊嘛」，盧均宜就說「都開心伊朗入到波」，陳偉豪則指下半場的陣容才是正選，包括自己最愛的曼城球員科頓。大會最後抽出三位觀眾，送上由洪嘉豪、盧均宜、陳偉豪簽名的英格蘭球衣。
