講起鐵路精品，大家首先諗起印有路線圖嘅文件夾、吉祥物造型毛公仔、床品套裝，定係玩具火車、退役列車扶手、甚至鐵路模型？唔少鐵路迷希望香港好似其他國家及地區咁，推出更多款式、造型精緻嘅模型或者周邊產品；但點解出嚟出去都係得筆記簿、鎖匙扣、文件夾呢啲「換個皮膚就出得」嘅產品呢？展望未來，有無其他精品款式值得香港嘅鐵路公司考慮？
近年鐵路公司積極舉辦鐵路迷導向嘅活動，以迎接新鐵路通車、舊款列車退役乃至周年誌慶。但負責活動籌劃嘅團隊，其實與紀念品銷售嘅團隊分屬唔同部門板塊。前者雖然知道香港鐵路迷對鐵路精品嘅期望，包括更多模型（特別係N比例列車模型）、發聲裝置、或從退役列車拆出嚟嘅部件；但後者所考慮嘅不單止係鐵路迷口味，更要考慮產品銷情、回報等因素。
唔少鐵路迷期望推出嘅產品，所需研發及生產成本所費不菲，由構思到推出市面時間分分鐘以年計，但受眾或許僅局限於鐵路迷或收藏者。
兩三年前正值東鐵烏蠅頭列車退役期，大家提議可以仿效運用退役飛機金屬外殼，將列車外殼改造成行李牌或匙扣等。但呢類產品若於香港進行加工，計及人手及安全等成本，平均每件可達三位數。若將被拆散嘅退役列車運往中國大陸進行加工，工人成本固然低過香港一大截；然而於法規下呢類金屬僅被視為廢鐵，面對各種環保及出入口相關管制非易事。再者，呢類產品受眾有限，成本之高意味售價唔會平得去邊，計唔掂數唯有作罷。
相比之下，實用嘅周邊產品如文具、日用品等，生產成本及時間相對容易掌握，而產品受眾更包括一般乘客甚至訪港遊客，本小利大。如此情況下，鐵路公司較傾向「打安全牌」，推出較多大路嘅實用性產品。
近年鐵路公司推出大量針對親子嘅鐵路產品，畢竟家長最願意為小朋友洗錢。吉祥物毛公仔、卡通造型回力車仔，比起造工精緻嘅模型，成本或許相若但潛在客群更廣。銷量更有保證。與此同時，追求效益嘅香港人為小朋友買玩具，不單求好玩，更要小朋友玩完之後可以學到嘢。「寓興趣於知識」嘅益智遊戲，如鐵路主題學習卡牌、安全乘車主題嘅桌遊因而應運而生。
既然鐵路公司主力推出大眾向、親子向嘅鐵路周邊產品，鐵路迷導向精品係咪因而難登新產品考慮之列？咁又未必。相信零售相關同事唔係無諗過，而據知獲授權推出香港鐵路公司精品嘅經銷商，都曾經向相關部門推銷過唔少天馬行空嘅產品構想。
就算「搞手但求打個和」，主力靠「大路產品」嘅盈利，以對沖鐵路迷導向精品嘅研發及生產成本。但鐵路商品銷售規劃都要平衡成本、質素，以及預計銷量等因素，實在好考呢班同事嘅眼光及前瞻性。但更教大家頭痛嘅係：香港鐵路精品市場大極有限。
與日本、台灣等地相比，香港鐵路路線及車款有限，衍生出嚟嘅精品款式未必如其他地方精彩。對香港鐵路特製精品最感興趣嘅，絕大多數都係香港人。國際玩具品牌未必對推出香港鐵路精品感強烈興趣，最有空間推出本土產品就剩下香港為基地嘅玩具公司。
在商言商，若特製精品難以外銷，生產量多極有限，除返開每一件嘅生產成本唔慌低。諗完成本再要諗埋訂價，點樣先至有利可圖？訂得太貴的話，潛在消費者未必個個買得起；但若訂價太低但手工參差，雖則購買門檻低咗、產品容易回本，但消費者會對產品留下負面印象，贏咗盈利但輸咗商譽就唔值得了。最終，生產商就要從產品精緻度、合適產量、成本控制及確保銷量等因素下作出取捨。期望日後嘅鐵路精品除咗考慮回本外，造工亦唔好過分馬虎或有明顯錯漏。
近年鐵路公司比過往更積極接觸鐵路迷群體，但營造屬於呢個地方嘅「香港鐵路文化」畢竟要靠唔同持分者，仍有漫漫長路。當鐵路博物館腹地有限難以大幅擴展，「站見」鐵路展唔一定可以「長見」，而交通博物館嘅構想繼續只聞樓梯響之時；鐵路相關周邊產品，相對容易對外推廣香港鐵路文化。而造工精緻或別具特色嘅產品，更容易讓消費者留下深刻印象。
一路都同鐵路公司相關部門反映，有啲海外銷售多年嘅產品如N比例模型，只要佢哋肯出自然有人買。產品出得靚少少，大家自會「食過翻尋味」繼續捧場。大家又有邊啲鐵路產品Wish List？不妨留言分享下。
延伸閱讀：
P.NUT Creations 花生検車区 - 鐵路模型舖展示港鐵列車零件 幾時賣埋香港N-Scale?（2023年4月5日）
當退役烏蠅頭列車零件於鐵道模型店活現 屬於香港嘅N-Scale列車模型幾時先會見到？（2023年4月2日）
站長隨筆：入鐵模坑真的很興奮？香港又可以出N-Scale列車模型嗎？（2021年9月17日）
（本網歡迎各界投稿，文章內容為作者個人意見，並不代表本網立場。）