鐵路公司剛剛公佈新車費表，並於6月30日（星期日）開始實施。承早前對今年車費調整預測，鐵路公司抱著「同一條線路按車程距離收費」原則，以「短貴加少啲，長平加多啲」，逐步調整屯馬綫東向西車程嘅不規則車費。配圖顯示由屯馬綫烏溪沙站（註）出發、加價前後嘅成人八達通車費：
烏溪沙站 ⭤ 鑽石山站／啟德站：$11.6 → $12.0（+$0.4 / +3.45%）
烏溪沙站 ⭤ 宋皇臺站／土瓜灣站／何文田站：$12.9 → $13.3（+$0.4 / +3.10%）
烏溪沙站 ⭤ 紅磡站：$10.8 → $11.5（+$0.7 / +6.48%）
烏溪沙站 ⭤ 尖東站：$13.8 → $14.2（+$0.4 / +2.90%）
烏溪沙站 ⭤ 柯士甸站：$13.0 → $13.8（+$0.8 / +6.15%）
烏溪沙站 ⭤ 南昌站：$10.4 → $11.2（+$0.8 / +7.69%）
烏溪沙站 ⭤ 美孚站：$12.9 → $13.8（+$0.9 / +6.98%）
正如早前提到，紅磡站車費較低嘅原因乃因過去東鐵本地線於「交叉補貼」政策下，收費水平相對較低。南昌站車費於兩鐵合併前，主要參照深水埗站車費而定；於呢種訂價模式下，前往彌敦道以東嘅車程明顯較毗鄰東涌綫車站為低。今年鐵路公司嘗試修正東向西車程，前往紅磡站及南昌站嘅車費一如預期被大幅提高至少6%，相信最終會分別提高至與何文田站及尖東站相同票價水平。
至於來往烏溪沙站及美孚站車費，雖然鐵路公司建議乘客使用轉三次車嘅「舊路」（即兩鐵合併時已存在嘅路線）而非「一線直達」嘅「新路」（即屯馬綫），但今年上述路程明顯以乘客兜咗大圈嘅「新路」計費。若大家細心留意，呢段車費本來跟來往烏溪沙站及何文田站車程，同為$12.9。往何文田站車費今年繼續按整體加幅（3.09%）四捨五入提高至$13.3，但往美孚站車費則被大幅提高近7%，估計最終都會再被提高至與尖東站相同票價水平。
另外，來往烏溪沙站及尖東站並無如預計般凍結票價，而按今年整體加幅再四捨五入嘅方式，由現時$13.8加到$14.2。而前往柯士甸站車費同被大幅加價超過6%，由現時$13.0加到$13.8，從而將跟尖東站車費差距由$0.8 收窄至$0.4。如維持呢種票價調整操作，相信最快下年兩站收費將會歸一。
註：烏溪沙站、馬鞍山站、恆安站及大水坑站除前往前馬鐵沿線車站外，車費水平相同。為方便說明及閱讀，圖文僅以烏溪沙站車費舉例說明。
延伸閱讀：
馬鐵車站往美孚 轉三次車仲快過一程屯馬綫 卻有機會以兜大圈路徑計費？（2024年5月21日）
屯馬綫短貴長平點解決？ 由東向西車程 紅磡及南昌站料大幅加價
（2024年5月17日）
（本網歡迎各界投稿，文章內容為作者個人意見，並不代表本網立場。）