鐵路公司今年加價3.09%，但原來個別車程加價幅度可以遠高於3.09%。為咗「修正」屯馬綫「短貴長平」嘅不規則票價，鐵路公司或會「重施故技」，預計包括紅磡及南昌等車站在內嘅票價需大幅加價，以減少與毗鄰車站嘅車費差距。
以配圖由屯馬綫烏溪沙站出發，現時前往該線九龍區嘅成人八達通車費為例：
烏溪沙站 ⭤ 何文田站：$12.9
烏溪沙站 ⭤ 紅磡站：$10.8
烏溪沙站 ⭤ 尖東站：$13.8
烏溪沙站 ⭤ 柯士甸站：$13.0
烏溪沙站 ⭤ 南昌站：$10.4
烏溪沙站 ⭤ 美孚站：$12.9
烏溪沙站 ⭤ 荃灣西站：$13.9
出現咁嘅情況，全因上述車程嘅定價方式各有不同：
- 烏溪沙站前往紅磡站或尖東站車費，屬九鐵早年釐訂嘅車費水平
- 烏溪沙站前往南昌站、美孚站及荃灣西站車費，屬兩鐵合併時「轉乘車程」
- 烏溪沙站前往柯士甸站車費，屬九龍南線通車時，直接對照毗鄰九龍站車費表而定
- 烏溪沙站前往何文田站車費，屬觀塘綫延綫通車時，參照佐敦站車費表而定
點解紅磡站同南昌站車費於屯馬綫中長途車程中會顯得特別平？同樣係歷史因素所造成。
紅磡站於2009年前僅為東鐵車站，受惠於當時九鐵對東鐵實行「交叉補貼」政策，使紅磡站本地線車費水平相對較低。兩鐵合併後，來往紅磡站嘅車費水平，僅有個別車程組合因處理當時西鐵短貴長平問題而被大幅調高外，其餘車費變動不大。
而南昌站為西鐵及東涌綫車站，2003年地鐵釐定東涌綫南昌站車費時，大致參照同區深水埗站車費表。對來往彌敦道以東嘅車站（特別係觀塘綫、東鐵及馬鐵沿線車站）而言，縱使前往南昌站需要兜大圈，但由於南昌站車費與深水埗站相若，車費水平卻與西九龍填海區車站（如奧運、九龍）相比，顯得較低廉。
然而2021年西鐵及馬鞍山綫連成「屯馬綫」之時，鐵路公司並未於減價時藉機微調該線個別中途站車費水平。此使途經紅磡站或南昌站嘅車費水平跟接連嘅車站相比，會顯得唔合理地低，差距可達$2。
西鐵於2009年中由南昌延伸至紅磡後，曾出現「短貴長平」嘅不規則車費。當時鐵路公司花近6年時間，透過大幅調高長途但較平嘅車程車費，以解決問題。呢種「頭痛醫頭、腳痛醫腳」嘅處理手法，於修正屯馬綫不規則車費時，相信會再「重施故技」。
以烏溪沙站起始嘅東向西車程為例，不規則車費情況由紅磡站開始出現，直至到荃灣西站，車費先繼續拾級而上。故此，需要考慮作車費特別調整嘅路段為紅磡站至荃灣西站之間。
舊年拉高車費水平較低組合（如荃灣西站⭤ 何文田站，+6.19%），乃以比起舊年整體加幅(+2.30%)高約4%。由此推斷，今年若要繼續拉高個別車程車費，該些車費組合加幅會為約7%。前往紅磡站及南昌站車費或有機會加價約7%，至分別$11.6及$11.2。而柯士甸及美孚站，車費則可能加價約7%，以跟尖東站現有車費$13.8睇齊。估計最終車費調整目標係：紅磡站車費或與何文田站睇齊；而尖東站至荃灣西站嘅車費水平或有機會再上調。
同樣需要處理由東向西嘅不規則車費，仲包括由屯馬綫城河東一帶車站（石門至車公廟）、以及鑽石山站出發，前往紅磡站或南昌站嘅車費。今年鐵路公司點樣調整上述車費組合，值得乘客關注。
（本文所提及之車費乃假設2024/25年度鐵路票價調整，除特別註明外的大部分八達通票價增加3.09%（即2024/25年度整體票價調整幅度），並以四捨五入方法計算至最接近一角。2024/25年度的車費表仍待落實，其詳情（包括但不限於行程時間及收費等）均以香港鐵路有限公司最終決定為準，車費表公佈後之詳情亦可能與本文章所述者不同。「火車未到站」對任何未公佈的鐵路票價等並不作出不論明示或隱含之要約、陳述、承諾或保證。「火車未到站」亦建議乘客到有關區域作實地考察，以對該車站及其周邊地區環境有更佳了解。）
（本網歡迎各界投稿，文章內容為作者個人意見，並不代表本網立場。）