圖片來源： KXEnviro - Transport Photos × Archives
南區及西區皆為香港島上人口密集嘅住宅區，喺未有港鐵覆蓋嘅年代，巴士喺出入呢兩區嘅主要交通工具。喺呢個背景下，新巴同城巴得以喺呢兩區半獨市經營，成為兩巴重要嘅客倉，故此西港島綫及南港島綫兩條路線將嚴重打擊兩巴經營。
面對來自新鐵路線嘅威脅，兩巴打算以加強來往西區嘅特快巴士服務作為對策。兩巴喺西港島綫通車前幾年就加強5X、18P兩條路線服務，以及開辦更深入東區嘅18X線，更預備喺鐵路通車後取代5、18等傳統流水或半直通路線成為西區新主幹線。但由於5X及18X兩線對比鐵路特快優勢並不明顯，以18X為例由堅尼地城前往太古嘅車程甚至比鐵路更慢，於是2014年西港島綫通車後兩線客量大幅下跌。前者最終於今年獲建議與7線重組為7X線，而後者於改經中環灣仔繞道後客量稍有起色。至於18P則因為途經鐵路未能直達嘅灣仔北，加上前往北角仍有車程優勢，所以客量下跌幅度未有5X同18X大。但卻因為新巴策劃失當重組18及18P兩線，導致18P失去車程優勢，繼而流失更多乘客。新巴於2021年再次重組18、18P兩線，但重組後嘅18車程比18P更迂迴，明顯地已無力再次贏取西區乘客上新巴。
經西港島綫一役後，新巴城巴以消極態度應對南港島綫通車，未有再提前準備對策應戰。2016年南港島綫通車後，由於鐵路能夠避開經常性擠塞嘅香港仔隧道直達港島北岸，吸引唔少南區居民改為以鐵路進出南區，服務鐵路沿線嘅巴士線首當其衝受影響。服務鴨脷洲嘅94X、95B、590A等新巴路線先後因客量大跌而取消，其他多條路線亦被削減班次，作為海怡半島開山始祖嘅590線最終喺2021年不敵鐵路競爭而取消。當年因為南區有區議員、地區組織等極力爭取下，令南區路線重組幅度較原來建議細，巴士公司改為以客量為由削減班次，但就陷入班次疏落令乘客進一步流失，繼而再削減班次嘅漩渦。隨著新巴城巴近年蝕損嚴重，唔少重組建議於最近嘅巴士路線計劃又再度被提出。
如上文所述，西區同南區兩區都屬於新巴重要客倉，新鐵路綫通車後搶去大量巴士乘客，重挫新巴營收表現。喺兩綫通車前嘅財政年度，新巴錄得1.2億元嘅盈利，但喺西港島綫通車一年後新巴盈利就減少至約1300萬元，而喺2017-2018年度更虧蝕約500萬，之後幾年新巴都未能轉虧為盈。受兩條港島區鐵路綫通車影響，加上當局長期偏袒其他交通工具，新巴城巴喺2010年代中後期起已消極對待港島區，尤其係西、南兩區，發展重心轉移至九龍及新界嘅新發展區、機場（COVID-19疫情前）以及邊境口岸。
（本網歡迎各界投稿，文章內容為作者個人意見，並不代表本網立場。）