圖片來源：香港巴士大典
自從城巴於1993年奪得中巴28條路線專營權後，港島巴士服務就進行兩強鼎立嘅戰國時代。新巴接手中巴專營權後，港島巴士嘅競爭程況有增無減。城巴當時已經全線提供空調巴士服務，對比車隊中大部份為二手熱狗巴嘅新巴而言佔盡上風，新巴除加訂新車盡可能加快空調化步伐外，亦透過加強服務應戰。新巴大幅加強與城巴路線相近嘅服務，例如早前提及過嘅18線就獲提升至每日全日服務，用作迎戰城巴10線。新巴8、23等路線亦曾加密班次對抗城巴服務範圍相近嘅路線，更加唔使講一眾紅隧過海線。此外，兩巴亦爭雙開辦類似路線，最經典莫過於城巴開辦690P線後，新巴就聯同九巴開設同樣服務寶林嘅691線特快班次抗衡。新巴當年更有意染指機場巴士服務，打算開辦來往小西灣及機場嘅路線，迫使城巴延長A12線至柴灣堵截。
兩巴競爭所帶來嘅好處乘客好快就感受到。唔少港島區路線都比以往更加頻密，尤其喺兩巴服務範圍相近嘅路線，大大縮短候車時間；新巴接連開辦唔少新路線並火速提升為全日服務，為乘客提供比既有服務更快捷或直接嘅選擇，相信唔少住喺東區特別係小西灣嘅街坊對此感受極深。再加上不斷增加空調巴士比例等措施，令港島乘客感受到巴士服務嘅改善，新巴嘅載客量反映該公司經營策略上嘅成功。根據新世界集團1999年度年報，新巴載客量一年內增加大約兩成，真正做到「爭取乘客上新巴」。交通投訴組嘅投訴數字亦反映乘客整體而言滿意新巴服務。
但針無兩頭利，兩巴大幅增加各條路線嘅表列以及額外班次，加上開辦重疊嘅路線，令路面上行走嘅巴士數目大增。由於港島道路網絡屬較早期規劃，路面空間有限且因城市已發展而難有增長，兩巴嘅「車海戰術」意味路面上行駛嘅巴士數目大幅增加，加劇港島北岸嘅擠塞問題。最終迫使當局更嚴格限制巴士公司車隊增長，同時管制喺繁忙路段行駛嘅巴士架次，兩巴競爭亦因而有所緩和，並將資源調至新發展區提升服務。
（本網歡迎各界投稿，文章內容為作者個人意見，並不代表本網立場。）