【獨媒報導】新巴於1998年9月1日起營運92條路線，比原本招標嘅88條路線為多。當中主要原因係部份原計劃取消嘅路線因為地區意見關係而獲得保留，並包括喺新巴專營權內。同時新巴亦開辦幾條新路線，代替於新舊專營權交替時被取消嘅路線，包括至今仍客量高企嘅8P線。當時，政府打算將中巴80線交由城巴接辦，但因與8X重疊而不被城巴接收，並隨中巴專營權結束而取消。新巴有見及此開辦8P線在替代，與城巴柴灣區皇牌線之一嘅8X線競爭。8P憑藉比8X更快捷嘅優勢成功爭取居民支持，一個月後就由繁忙時間服務提升至全日服務。8P嘅成功加強咗新巴對東區東廊特快路線嘅信心，促使於1999年以相同模式為筲箕灣、西灣河開設2X線。
為咗展示改善港島區服務嘅決心，新巴一方面開辦新路線，另一方面加強原有中巴路線嘅服務。以18線為例，新巴接手後一個月內就將路線提升至每日全日服務並且大幅加密班次，一改中巴輕視該線嘅態度。之後更以「捷徑王」名義包裝宣傳，令18線特快形象深入民心，成功吸引更多乘客，成為新巴喺西區同城巴競爭嘅皇牌。隨住更多新車到付並投入服務，越來越多路線改為以全空調巴士運作或提升空調巴士，對比中巴時期港島巴士服務明顯地得到改善。
除咗提升原有路線服務，新巴亦積極拓展其路線網絡。先有喺1998年11月開辦694線，兩年後成功中標682線，兩者皆於短時間內提升至全日服務，成功開拓港島東來往新界東嘅過海服務市場。此外，新巴亦透過公開投標程序成功奪得將軍澳南及西九龍填海區兩組新路線嘅經營權，不但令路線網絡不再焗限於港島及過海路線，更打破九巴喺九龍及新界嘅壟斷。時至今日，雖然新巴開辦咗唔少新路線亦進行過各項路線重組，但整體網絡格局仍維持2000年代初模樣。
（本網歡迎各界投稿，文章內容為作者個人意見，並不代表本網立場。）