早前提到鐵路公司以「同一條線路按車程距離收費」嘅原則，處理屯馬綫不規則車費問題。來往前西鐵新界西北車站（屯門至錦上路站）及東鐵沙田區車站（大圍至大學站）車費，比起前往屯馬綫另一端、同處沙田區嘅前馬鐵車站（車公廟至烏溪沙站）仲平。預計今年由前西鐵車站出發、前往顯徑及大圍站嘅車費將繼續大幅調高，以先解決「短貴長平」問題；而前往沙田至大學站嘅車費，或因「漣漪效應」而要與大圍站一樣「被加價」。
以配圖由屯馬綫屯門站（註）出發，現時前往該線尖東站至石門站嘅成人八達通車費為例：
屯門站 ⭤ 尖東站/紅磡站：$21.8
屯門站 ⭤ 何文田站：$21.3
屯門站 ⭤ 土瓜灣站/宋皇臺站/啟德站/鑽石山站：$21.8
屯門站 ⭤ 顯徑站/大圍站：$20.6
屯門站 ⭤ 車公廟站/沙田圍站/第一城站/石門站：$21.8
以由西向東車程而言，屯馬綫西段前往該線於九龍區最後一站鑽石山，車程時間比往昔經美孚及太子站轉車為短。屯馬綫作為西鐵及馬鐵連成一線嘅路線，若繼承其「按區計費」訂價方式，由新界西北出發經屯馬綫直達九龍中部車程，尖東站至鑽石山站或被視作同一收費區。
而屯門站前往紅磡、何文田及土瓜灣站之間嘅車費差距，舊年鐵路公司以「短貴加少啲，長平加多啲」方式，由屯馬綫全線通車時嘅$1.1收窄至$0.5：前往何文田站嘅車費大幅提高超過3%/$0.7，前往尖東、紅磡、土瓜灣至鑽石山站嘅車費僅微升0.46%/$0.1。估計今年加價後，屯門站前往尖東站至鑽石山站收費應能歸一。
來往屯門站及何文田站嘅車費，若按整體加幅（3.09%）四捨五入後，或由現時嘅$21.3加$0.7至$22.0（按此方式計算的加幅為3.29%）。前往尖東、紅磡、土瓜灣至鑽石山站嘅車費，則有機會為拍齊前往何文田站嘅車費（預測為$22.0），由現時$21.8微升$0.2至$22.0 （按此方式計算的加幅為0.92%）。
但屯馬綫大圍及城河東一帶，舊年並非完全「短貴加少啲，長平加多啲」，而係一齊加$0.7。由屯門站前往鑽石山站以及前往車公廟站嘅車費，現時雖同為$21.8；但再考慮「按區計費」訂價方式，若由新界西北前往更遠嘅沙田區，收費跟前往九龍區車站一致，則難免會「收少咗」。推斷來往屯門站及顯徑站至石門站沿途各站，最終或有會「開多一格」收費區。
基於本文前段估計，來往屯門站及鑽石山站車費有機會提到至$22.0。若考慮先處理「減少不規則車費」，則來往屯門站及顯徑站與大圍站嘅車費，或有機會同由現時$20.6，大幅提高$1.4至$22.0（按此方式計算的加幅為6.80%）。前往車公廟站至石門站嘅車費，或直接按今年加幅由現時嘅$21.8，加$0.7至$22.5（按此方式計算的加幅為3.21%）。
過去東鐵奉行「交叉補貼」政策，本地線車費水平相對較低。大圍站作為東鐵及屯馬綫轉車站，當大圍站因「修正屯馬綫車費」而被大幅加價，毗鄰嘅東鐵車站（特別係沙田區車站）車費水平倘若較大圍站為低，於「漣漪效應」下或需一同被加價。
現時由屯門站前往沙田站、火炭站、大學站及大埔墟站嘅車費，分別為$20.6、$20.8、$21.4及$23.0。若僅直接按今年加幅加價，得出嘅數字分別為$21.2、$21.4、$22.1及$23.7。但倘若由屯門站前往大圍站嘅車費如前段推測，大幅加價至$22.0 ；前往更遠嘅沙田至大學站，車費按理唔應該比大圍站為低。
就現時跨區車程而言，沙田站收費與大圍站大致相若，而大學站收費與大圍站有約$1差距。若要避免由屯門站前往東鐵沙田區車站出現「短貴長平」情況，唯一選擇就只有將屯門站前往沙田站至大學站車費，跟前往大圍站車費一樣大幅調高到至少$22.0。
「來往新界東西不如搭巴士啦！」「城隧車快靚正！」誠然，針對來往屯馬綫兩端車程，現時已有唔少點對點、走線相對直接嘅巴士路線；亦有部分乘客選擇跨交通轉乘模式，先取道最直接嘅巴士往來新界東西，再轉乘鐵路前往實際目的地。站長從來都鼓勵乘客搵自己最適合嘅路線搭車，而唔係乜都選擇鐵路。儘管如此，兩鐵合併後理應「一體化」嘅車費結構，其票價規則應該有序可依，方能對廣大乘客公道。
註：屯門站、兆康站、天水圍站、朗屏站及元朗站除前往新界西北區內車站外，車費水平相同。為方便說明及閱讀，文字僅以屯門站車費舉例說明。
（本文所提及之車費乃假設2024/25年度鐵路票價調整，除特別註明外的大部分八達通票價增加3.09%（即2024/25年度整體票價調整幅度），並以四捨五入方法計算至最接近一角。2024/25年度的車費表仍待落實，其詳情（包括但不限於行程時間及收費等）均以香港鐵路有限公司最終決定為準，車費表公佈後之詳情亦可能與本文章所述者不同。「火車未到站」對任何未公佈的鐵路票價等並不作出不論明示或隱含之要約、陳述、承諾或保證。「火車未到站」亦建議乘客到有關區域作實地考察，以對該車站及其周邊地區環境有更佳了解。）
（本網歡迎各界投稿，文章內容為作者個人意見，並不代表本網立場。）