運輸及物流局尋日於長沙灣社區中心舉辦首場《跨越2030年的鐵路及主要幹道策略性研究》公眾論壇，出席人數約50人。最多與會市民表達對將軍澳綫南延線以及將軍澳-油塘隧道（將油隧道）嘅關注，亦有部分意見擔心發展各項運輸基建對環境及生態影響。政府強調呢次研究主要係希望為未來人口增長及新發展區先行安排運輸設施，從而提高運輸系統嘅容量同承載力。至於點樣跟其他新發展協調、如何避免各個項目之間互相「搶人才」，政府則表示會再跟其他決策局同部門協調，具體發展優次需要考慮建造業人手同公共財政資源等因素。
不論係現場與會者，抑或網上參與市民，最多人問都係點解要發展將軍澳第137區同第132區。除擔心將軍澳南部嘅發展將加重區內交通負擔，而填海同重置各項厭惡性設施更影響生活質素。部分日出康城居民反建議9個連接第137區鐵路嘅替代方案，並建議改為由油塘直接連往第137區。運輸及物流局首席助理秘書長梁少江表示，建議嘅將軍澳綫南延線如由地面嘅康城站直接南延至位於第137區嘅地底車站，能夠共用現有康城站嘅設施，避免因修改現有康城段走線而影響營運中鐵路運作。如果唔興建呢段延線，第137區居民對外交通需求將完全依賴道路網絡，會增加路面交通負擔，故此鐵路接駁相當重要。局方目標係在唔影響現時將軍澳綫坑口及寶琳段班次嘅情況下，透過提升現有信號系統及增購列車，從而讓將軍澳綫康城段（及往後第137區段）加密班次，梁先生認為康城居民其實能於呢個項目中受惠。
將軍澳綫南延線亦會增加現有路線嘅負擔，與會者亦對寶琳站能否增設第二個月台、順勢規劃百勝角站、乃至追問《鐵路發展策略2014》中提出北港島綫嘅最新進度。運輸局梁先生則稱任何牽涉營運中鐵路嘅建議需要小心考慮，如果增設百勝角站「需要睇下點樣接駁將軍澳綫」。至於北港島綫，梁先生表示走線途經中環及灣仔繞道、東鐵綫過海隧道，再加上港島北岸地底管線比較複雜，正研究點樣克服技術困難。被問到當未有北港島綫時，點樣避免北角轉車站進一步成為樽頸，梁先生則稱「港島綫都會提升信號系統」，屆時港島綫班次能夠提升，從而能夠改善北角轉車站擠塞情況。
中鐵線方面，與會人士比較關注設站位置以及與其他路線連接。有東北葵居民認為該區巴士服務未能滿足居民需求，經常出現超載情況，希望能夠有鐵路服務，甚至希望能同時於象山、石籬同石蔭設站。亦有部分意見認為中鐵線九龍總站止於九龍塘，將再次加重該站轉乘負擔，建議應將中鐵線延伸至宋皇臺站甚至前啟德機場跑道區一帶，以取代幾年前擱置嘅「九龍東環保連接系統」。局方回應指，若於中鐵線增設更多中途站，需要研究技術可行性同對載客量嘅影響，考慮於能夠服務最多人口嘅位置設站；至於延伸至啟德嘅建議，則表示現時政府已於區內規劃「多元模式接駁系統」，足以應付啟德發展區嘅交通需求。至於中鐵線會唔會跟北環線主線「直通運行」，梁先生表示「錦上路站仲有屯馬綫，需要考慮埋點樣同佢做個轉乘」。
連接前海及洪水橋嘅港深西部鐵路，與會人士比較關心過境安排，以及對生態及鄉郊所造成嘅影響。路政署鐵路拓展署總工程師陳家豪先生表示，港深兩地早前已成立「專班」討論呢條鐵路嘅規劃事宜，亦有討論過境安排。生態方面，運輸局梁先生強調政府非常注重生態，過去亦有穿過濕地興建鐵路嘅經驗。而任何基建項目需要進行「環境影響評估」，所有工程需要符合法例規定先可以進行；而局方亦一直跟地區人士保持聯絡。
而與洪水橋站交匯嘅「洪水橋至港島西鐵路」，雖然並不屬於呢次研究嘅範圍，但與會者亦對點樣處理屯門西部交通需求表達關注。有市民希望能夠同時推展從「東大嶼鐵路」分拆出嚟嘅「屯門西部海岸鐵路」，亦希望能夠增設更多中途站。運輸局梁先生強調東大嶼鐵路會途經小欖，而小欖站可以擔當連接屯門同荃灣嘅角色。
就整體規劃而言，唔少出席人士關注係咪仲需要興建更多交通基建，以及東西發展及交通配套失衡。局方表示，因交通基建由規劃到落成需時至少二十年，所以需要及早部署並預留容量，從而能夠適時提供新發展區所需嘅交通配套。
篇幅所限，本文已盡量將第一場公眾論壇針對鐵路項目嘅主要討論內容及回應進行整理。公眾論壇尚有討論三項新主要幹道項目，包括北都公路、沙田繞道以及將油隧道，惟本文未及整理有關討論。若站長尚有空間的話，先再出多個Post講埋佢。
（本網歡迎各界投稿，文章內容為作者個人意見，並不代表本網立場。）