疫後經濟下行，旺區人流不復再，好多店舖面臨生存危機。來到復活節長假，好多人繼續選擇上大陸消費或者外遊，令唔少本地商戶叫苦連天。面對咁嘅環境，點樣先有出路？
除咗啲嘢貴、性價比低，更底層嘅原因，係城市失去咗獨特性。過去香港作為經濟城市，地產主導嘅遊戲規則，不利於小店生存。重建將舊區拆得就拆，霓虹燈又無哂，由倒模嘅大型商場同連鎖店取代。漸漸所有野都圍住商場而轉，由地鐵站用天橋一站式駁埋，連街都唔駛落。係好方便好有效率，但久而久之，我地陰乾咗本地嘅街道文化同特色。到處一式一樣，又難怪啲人走哂返大陸去日本。
本地經濟要自救，就必須喺新嘅大環境之下搵返自己嘅獨特性。
街道先係一個城市嘅獨特性所在。喺條街先見到香港嘅真實面貌，感受到嗰種隨機性同多樣性，始終係商場無法取代。相比之下，商場雖然都係人聚集嘅空間，但通常都好人工化同商業化，缺乏街道嗰種自由流動同社區互動嘅氛圍。
城市散步同 "City walk" 嘅興起係有原因，因為大家都開始追求體驗。你見宜家啲遊客鐘意影街牌，想行街多過行商場就知咩事。個世界已經變咗，條街從行程變成目的地。街區嘅氛圍、街道嘅文化同歷史，喺街舖搵到嘅「隱世」同獨特發現，通通都係「打卡點」、短期夜市同商場等倒模嘢俾唔到嘅體驗。
外國都面對緊類似問題。自從疫情開始，城市退潮。啲人見有得彈性在家工作就搬哂出市郊，唔再成日喺市區活動。唔少城市街舖執笠、空置率高企，當局就開始搞街道活化。
紐約市自疫情期間，已經舉辦「開放街道」（Open Streets）計劃，將某啲街道暫停行車、變成臨時公共空間。因應室內用餐限制，當局又開放「街道餐廳計劃」（Open Restaurant Program），畀餐廳用行人路同路邊空間作為戶外用餐區域。疫後呢種安排已經恆常化。
其後，當局委託嘅顧問報告指出，呢兩個計劃幫助咗好多商戶喺疫情期間免於倒閉，並且大大增加消費，甚至鼓勵新商戶喺呢啲地方開業。報告所觀察嘅五條開放街道當中，商戶 2022 年夏季嘅營業額，比疫情前高出兩成水平。報告亦發現，呢兩個計劃成功保住 10 萬個就業機會。
事實證明，人流先係關鍵。要喺谷底翻身，我地就要將街道塑造成公共空間，圍繞人嘅尺度同需要去設計。當條街大部分空間都比車行哂，啲人梗係覺得唔舒服不宜久留。行人優先嘅街道改造，能夠真正美化街道景觀同吸引更多人流，令人樂意駐足停留、休息同享受城市嘅氛圍。當人想喺條街度逗留，自然願意消費。
商家要生存，需要 think out of the box。政府想搞返好經濟，都係一樣。要重新塑造街道嘅吸引力，大膽嘗試先有出路。
文 / Justin Yim
（本網歡迎各界投稿，文章內容為作者個人意見，並不代表本網立場。）