（獨媒報導）香港動漫電玩節於周五（28日）開鑼，街上多了穿著cosplay（角色扮演）的俊男美女，藝術家程展緯同日則是最後一天「cosplay」大圍站清潔工，他將前往外國考察，回港後計劃再回到大圍站任職。
程展緯表示，自己一直在cosplay清潔工或一個角色，「職場本身就係一個cosplay，每人都扮緊一個工具、一個角色，而呢個角色你好似睇到佢表面嗰浸，睇唔到佢入面嗰啲，入面個生活係點樣。」
「其實返工嘅時空就係咁樣，好多時候都係抽離咗。」
＊＊＊＊＊
初衷為改革外判標書惟仍未達到
藝術家程展緯一直致力為勞工爭取權益，2021年11月開始於大圍站當清潔工，初衷欲改革港鐵與外判公司之間的標書，改善工人的福利待遇。程展緯最初只是打算做一個月「臥底」，但一個月認為仍未為工友爭取成果，結果一做便做了21個月，「覺得要做落去先會有啲變化出現， 社會運動除咗防守戰『有問題改咗佢』之外，另外其中一個（我）想開展啲新既方法。」
他初入職時認為，當時政府改革外判標書，認為公營機構亦會仿效。惟他指公營機構事實上是不願意和勞方對話，自己想製造對話的機會。他任職期間遇上2022年第五波疫情，便就工友就疫情期間防疫措施不足、「防疫抗疫基金」未涵蓋港鐵清潔工等問題發聲。
兩年過去，程展緯表示在外判議題上仍未達到自己的初衷，更好的制度仍未出現。他雖然聽聞港鐵與外判公司之間的標書將有改動，但是好還是壞仍屬未知之數，「呢個標書改動係講緊十幾廿年到宜家，應該呢個地方第一次改動啩，唔知啱唔啱。」
＊＊＊＊＊
藝術畢業市民：程展緯以藝術思想介入已是創作
大圍站大堂空間雖大，但欠缺風扇。最後一日「cosplay」，在大堂的程展緯於攝氏33度下工作，大汗淋漓。自上周大圍站商場「圍方」開業後，程展緯表示車站人流增加，垃圾桶中亦出現了更多被丟棄的膠樽。
不少市民知悉程展緯最後一日上班，特意到場。浸大視覺藝術畢業的市民凌先生是其中一位，他為程遞上一樽飲料，對方隨即把飲料喝光。凌先生稱，自己一直在探索藝術的形式，認為程展緯以藝術思想介入不同的社會角色，令社會知道藝術家原來可以超越單純製作藝術品：「我哋只要思想有藝術創作，或者我哋為咗一啲我哋想講嘅嘢而去點樣介入我哋工作上面，其實已經可以係一件藝術創作。」
程展緯、凌先生
收膠樽鋁罐婆婆探望程展緯「真身」
前來告別，還有收拾膠樽鋁罐回收的陳婆婆。陳婆婆自退休後，便開始於公共場所垃圾桶拾起膠樽及鋁罐回收，至今已13年。她的回收工作只是「為興趣」，收集來的膠樽及鋁罐會運往綠在區區或膠樽回收機。
程展緯在職時，會將被丟棄至垃圾桶的膠樽和鋁罐分類，沖洗後便會收集起來，留待晚上予陳婆婆運走。陳婆婆本身不知程展緯「真身」，只知道該清潔工是一個很有意思和很好的人，正在為某些人爭取權益：「我原先係唔知阿緯係咩人，收尾我都估到佢有啲目的嘅，都係想幫人㗎啫。」
程展緯、陳婆婆
程展緯：職場本身就係一個cosplay
程展緯向《獨媒》表示，自己一直在cosplay（角色扮演）清潔工或一個角色。不過卻指清潔工是他唯一一份不會感到抽離的工作「你宜家見到我好投入係咪？我遇到問題會問，問點解，或者我喺入面發掘到啲咩興趣嘅嘢，所以都享受。呢個時區對於我嚟講，我唔係禁止咗自己，係開展我嘅可能，我見到呢度幾得意。」
他形容，自己在大圍站當清潔工是作為藝術家融入於「生活整體」之中：「老細又唔怕你，我又唔怕佢，大家都你一拳，我一腿，咪過招囉。我又唔係淨係做（勞工）議題，我自己對於垃圾有興趣，對啲（清潔）設備有興趣，撈埋咗一個生活嘅整體囉。啲垃圾桶設計有咩問題，或者有咩有趣嘅嘢，都會試驗到落去。」
21個月的工作中，程展緯曾在工作地點兩次默站，「作為一個勞工你諗深一層，你唔喺到講，喺邊到講？」他最憤怒的一次，是外判公司「永順清潔服務」於2022年2月向他發警告信，指他在非工作時間穿著清潔工制服示威抗議：「同你爭取到抗疫基金，跟住你出警告信話我示威著咗你件衫？佢戇居㗎真係，唔理佢囉繼續著呢件衫，我成日著，等佢自己接受吓。」
＊＊＊＊＊
欣賞港鐵和外判沒解僱自己
來到最後一日，程展緯對港鐵和外判公司沒有解僱自己表示欣賞，「我唔知道因為媒體嘅壓力，或者其他唔同地方嘅角力之間嘅結果，我可以留喺度做到21個月，我又覺得佢本身係有亮刀嘅，無論地鐵都好，佢可以打場硬仗，宜家唔洗㗎嘛，要鋤你咪鋤你囉，要你走咪走囉，最多畀人笑兩個月，但係我見到佢哋未有，呢個空間我係好appreciate（欣賞）。而我覺得最重要、喺呢二十一個月做到啲乜嘢呢？最重要嘅成效就係有個新嘅咁嘅關係。」
「究竟我好過格點樣都好啦，或者我每日返工見到乜嘢就即刻喺IG到講返畀你聽，呢種透明度有啲咩恐怖？你容許員工咁透明去講，我冇隱藏任何嘢，有咩問題？呢到本來就都係原本應該係咁㗎嘛，我哋再角力囉，透明係第一件事，你唔好令到我有恐懼唔夠膽講嘢出嚟。工作本身就係咁，你唔直視啲問題，佢唔會話冇咗。」
上班期間，程展緯收到一位女工友的來電，反映自己遇到與「418（連續性僱傭合約）」相關的問題。程展緯稱自己其實也未必認識相關勞工議題，而這些問題正正可以由工會協助解決。
對於需要暫別，程展緯稱不捨其他清潔工同事，但他指清潔工中有不同的群體，自己離港後並非真的離別，會繼續關心其他在港清潔工。
＊＊＊＊＊
程展緯走到月台其中一個垃圾桶，桶邊上有一個口罩，垃圾桶旁早有標語貼紙，提醒乘客丟棄口罩時應有東西包裹。程展緯認為，港鐵的貼紙告示只是冷冰冰的設計，背後沒有反映清潔工的功勞：「無感，責任論述咋嘛，藝術家見到就唔會收貨。」
「佢一個credit（功勞）都冇畀過執呢舊嘢嘅人，你無端端畀個instruction（命令）我，但係你又畀睇唔到個credit喺邊到，個credit喺個清潔工，要幫你執手尾，（功勞）一句都唔會有，（港鐵）將佢變成一啲冷冰冰既措施。」
「所以佢（港鐵）唔識設計。」
「個語言唔係同人講嘢㗎，呢啲唔係對人講緊嘢。」
「重點就係話你可以透過扔口罩呢樣嘢，令到人諗起疫情嗰時嘅清潔工。」
他始終關注的，是制度問題。「外判公司都好辛苦，喺咁樣嘅運作下面要咁樣做生意，就係成件事去不斷生產一啲好奇怪、好扭曲嘅一種工作地方，呢件事佢都係受害者，」
