作者：文職小薯
依家啲人時興用消費，做政治表態。
數返上個禮拜：我去黃店飲咖啡打卡用咗70蚊、去阿布泰買足貼同湯丸用咗100蚊、訂蘋果同端傳媒用咗30蚊，去睇咗一場（差啲比藍絲影大頭相嘅）放映，又比咗100蚊。
諗返場運動最盛嘅時候，我自己都拍爛檔，前前後後出咗成幾千蚊印文宣，仲用咗900幾蚊周街掃白絲帶，買去比班罷工醫護。嗰時搭?撞到鄰居，佢哋都會問我「有無咩物資要買呀」，完全都唔計較錢。
當然，有好多人打散、餐搵餐食，唔係個個都係我呢啲有閑錢嘅小資。不過其實我份糧都只係剛剛好喺香港入息中位數，我諗我都反映好一批人（尤其是係文職小薯）嘅消費力同習慣嘅。
講咗咁耐終於到重點：咁點解工會會費就唔值錢，一年幾十蚊、百幾蚊都仲有人嫌多？？？
大家諗返下個運動期間，如果你或身邊人有落水，你會知道：設計一份文宣係時間，寫一份文稿係時間，開一個TG group聯絡人係時間，搜刮啱用嘅物資係時間，時間背後全部都係錢。
一場半場行動，大家可以用革命熱情頂硬上，硬食咗啲代價佢。
工會呢？工會係一個將個運動恆常化嘅載體，即係佢除咗要喺運動低潮期，keep住做上面堆嘢，仲要租會室、開街站、訂場搞活動同記招、做整理會員列表等行政嘢、做吃力不討好嘅聯絡工作⋯⋯
呢啲全部都係時間同錢，但係為咗養住大家團火，工會人都一一照做。請大家睇見工會人嘅無償付出，工會加會費，天經地義！