（獨媒報導）自政府強推宣誓條例，又放風會追討被DQ區議員薪津，超過250人自動請辭。曾表明決定宣誓留任的元朗瑞華區議員林進，亦因覺得「為啖氣被罰過百萬唔值得」，於三個月前辭任。
辭去工作後，林進未有停步，搞代購、環保街站，努力延續社區工作。上月，他宣佈成立「同行搬屋」，明言要「支援仍在堅持的同路人」。
《國安法》通過以來，大小團體紛紛被「壓力」逼至自行解散，此時宣佈成立一間與「手足」同行的公司，林進承認是反其道而行。他也知道，這個時勢要「衝入去監倉其實好快」。
但作為僥倖逃過紅線的人、尚有一點影響力的政治人物，林進覺得留下來還有意義與責任。他盼望親身做好榜樣：「原來仲有咁多可能性，仲有啲嘢可以做」。
不只是冷冰冰的生意
一個平日的下午，在繁囂的街市旁，數名青年以封箱膠紙包好大小傢具，合力抬上貨車，有講有笑。在一旁幫忙打點的，是前元朗瑞華區議員林進。
大學就讀工程系，畢業後任職銀行，再做區議員，林進笑言自己較瘦，與「搬搬抬抬」本來大纜都扯唔埋。直至今年7月，他辭去區議員的職位，嘗試繼續社區工作，並於8月尾，機緣巧合下到了一間黃店搬運公司任「一日搬運工」。
三張訂單、12小時的工作，不僅換來身水身汗，也有窩心鼓舞的時刻。林進難忘那天久違地「見到好多同路人」，亦難忘有客人大熱天時買來西瓜讓他們消暑，也有客人問現場「有幾多個手足有官司喺身？」，隨即掏出銀包每人給予一千元。
「原來當大家知道係同路人時，有啲關係會唔同咗。」這種並非「冷冰冰」的商業模式，啟發林進與朋友成立「同行搬屋」。他解釋，不少同路人有案在身，看不到長遠的事業發展，最需要彈性的工作維持生計。設立一間聘請「手足」的搬運公司，正正能照顧他們的需要，也能讓處境相近的同路人，互相照應、互相勉勵。
其中一名員工牛仔（灰衫），以前做過倉務搬運，形容在這裡工作特別開心，與同事熟絡，也有相近話題
社會崩壞之時 一起同行
《國安法》通過後，多人被捕、入獄，許多公民團體也逐漸解散。林進承認，的確會感到灰心，也覺得越來越少人同行。但他強調，正因如此，更希望透過開設同行搬屋，「建立返一個小小嘅空間畀我哋同啲客，大家起碼知道原來仲互相support緊大家」。
他舉例說，曾於專頁替有需要的年輕人作工作配對，瞬即獲很多黃店和街坊聯絡。一些社區連結或因社會變化而逐漸隱匿，但林進親身體會到，「其實個力量好大，仲有喺度，我哋都希望在可行情況下話畀大家知，仍然有好多人選擇繼續一齊同行」。
「同行」，是搬屋公司的名字，也是林進經常掛在口邊的說話。取名「同行」，不僅是希望與受助的「手足」連結、同行，更是強調當中的「行動」，故公司亦會預留盈利幫助有需要的人。面對社運低潮、移民潮湧現，不少人都說要先「保存自己」，但對林進而言，「我唔希望大家退到我哋只要留住條命就足夠，因為其實呢刻仲有好多人喺水深火熱之中」。
「612冇咗、石牆花又冇咗，好多支援組織都陸續倒閉。咁佢哋（因社運入獄的人）點算呢？」當一切似是無力，大家紛紛詰問「仲有咩可以做？」時，林進的答案是：「起碼我哋可以保護住嗰班最需要保護嘅朋友，去支援多啲呢班同路人。」而他說，希望透過行動，感染更多人行出一步。
不過，在一片解散風潮中成立新公司，可會擔心被針對、被打壓？林進坦言，「佢哋要扣我帽子都冇辦法，冇得驚咁多」，只能盡量小心行事。何況，「佢捉咗我，我哋都可以繼續做㗎，係咪先？」，他輕輕一笑，頓了頓再說：「重點係個精神。」
林進在手推車上噴上「721 831 101」
不會過期的承諾
社會形勢急速變化下，高調宣揚抑或「靜靜雞」都各有利弊，林進坦言正拿捏平衡，「但我哋暫時都未話想唔講嘢，都繼續仲諗吓可以講到咩咪講咩」。他接着笑說：「而家要衝入去監倉其實好快，嗌句口號，打個尖我就入咗去」，但在坐監前的這段有限時間，如何保留有用之軀去做最多的事，林進說，是「留下來」的他要堅負的責任。
說是「留下來」，乃因林進曾於民主派初選參選人伍健偉的名單上排名第二，最終卻沒有被捕被控。他坦言想不到有此結果，說起仍有點難以置信：「好似條危險線啱啱斬唔死我咁，喺我面前cut開咗」。他當然很清楚，自己其實「肉隨砧板上」，隨時都可能被「剁」，「但我冇理由驚佢剁我而去跪地求饒，或者純粹垂頭喪氣」。老土講句，「佢哋（坐牢的人）未必仲做到，但我仲有能力、仲可以喺出邊嘅時候，做到幾多咪幾多。」
正如訪問的第二天，林進便會繼續「做區」，幫街坊處理強積金戶口和教老人家用電話。辭職之後，他位處屋邨的議辦被房署收回，失去了聚腳點，接觸街坊的確困難了。但林進始終堅持不找全職工作，盡量保留自由身兼顧社區：「因為一返（工），你同個社區嘅連結好易斷咗」。他想找方法維繫以往建立的連結。
今年6月，林進舉行「最後一次居民大會」，與街坊討論「DQ在即，社區工作何去何從」，吸引200人參加（資料圖片）
現在的林進，自言比以往更忙，除了一如以往接收街坊求助，嘗試繼續舉辦環保街站、團購外，也要處理「同行搬屋」的工作，並嘗試在社區建立新的聚腳點。
有不少人問他，這份「區議員」的工作，會定一個限期給自己嗎？林進笑說覺得奇怪：「我本身做社區工作唔係因為當選區議員，而係真係想為社區帶來改變」。競選前已辭去銀行全職決心服務街坊，「個承諾唔應該伴隨畀人DQ而失去」。
但無償做區，如何維持？林進先笑說同行搬屋的工作都有出糧，繼而認真道：「其實你本身做義工都唔會set限期，你見到有需要嘅人就去幫，唔會話幫埋今年就以後唔做義工啦、要返返去正常嘅生活，咁樣其實唔make sense。」何況，短短兩年間與街坊的關係，早已遠超供求，更多是變成朋友，林進不想讓信任他的街坊失望。
曾不止一次被捕，身邊戰友也相繼身陷囹圄，林進苦笑自己和受助的「手足」一樣，「睇唔到好遠」，也有灰心無力的時刻。但他語帶佩服地數算起，到現在仍堅持到法庭旁聽、送車，還有堅持搭巴士罷港鐵、餐餐食黃店的朋友，「其實好多呢啲故事仲喺香港發生，好多人都仲係用緊自己方法嘗試幫緊身邊人」。
所以每次見到這些臉孔，「會覺得，唔係㗎，我哋唔應該放棄，我哋都冇資格講放棄」。一個人或者難捱，但或許像47人案，旁聽師拿着幾張籌輪流入法庭，只為當面跟圍欄內的人說聲加油， 「原來大家行出一步，係會見到仲有咁多人仲堅持緊。」林進的眼神充滿誠摯。
「而呢樣嘢就係令到你喺依個咁荒謬嘅時代下，支撐住嘅一點點力量。」
記者：黃蕊獻
攝影：馮曉彤
