2019年6月15日，35歲的梁凌杰身穿「林鄭殺港 黑警冷血」的黃色雨衣從太古廣場墮下不治。當日在現場嘗試接觸他不果的立法會議員鄺俊宇，在聆訊第五日現身西九龍法院作供。
身穿招牌白裇衫、袖捲起至手踭的鄺俊宇坐在證人欄，說起當日收到市民求助說：「有人做傻事，鄺議員請救救佢」，於是作為註冊社工的他，從立法會一口氣跑到太古廣場。他當時並不知悉梁凌杰的身分，「盡最大能力」趕過去，「只係有一個諗法，想佢唔好做傻事」，「我唔想任何一人因為呢件事（反送中）而掉失佢嘅生命」。
鄺俊宇到場後，曾要求接觸梁凌杰但不果，理由是「談判專家嚟緊」（但按警察供詞，他們至少一個半小時後才抵達）。他亦曾走到地面叫梁凌杰「落返嚟」但不獲回應，其後一直在四樓平台逗留，「我預等到通宵達旦（獲准見面）」。
墮樓一刻，他看到人群跑落地面說「好似跳咗落去」，他跟隨跑去地面，看到五米外的行人路上躺着一個男子，「跟住我⋯⋯係囉，頭腦空白。」
他跪在地上痛哭。
鄺俊宇隨即搭的士跟隨去醫院，但不久後得悉梁凌杰不治。他憶起時不柰哽咽：「我以前處理過呢類案件，我未試過失手，我真係試過勸掂好多人返來」，「我只係想每個人都可以平安，但原來嗰日係做唔到，係我一個好大嘅遺憾」。
「抱歉，我一直都唔想回憶呢件事。」
在梁凌杰的喪禮，鄺俊宇一見到梁媽媽就「喊到收唔倒聲」，倒是梁媽媽向他說：「你做得好好㗎啦鄺議員」。鄺俊宇說：「我係一個好老土嘅人，我覺得冇嘢比條命緊要」，他當時想的是：「如果嗰日可以同佢傾偈，可唔可以避免悲劇發生到呢？但係冇，冇，發生唔到啦。」
「因為呢個世界冇如果。」
鄺俊宇在庭上多次說，他並不知悉梁凌杰的身分，「但喺我腦入面，佢係一個企圖輕生嘅香港人囉，而佢唔應該輕生」。
此前的死因庭，只是以「身穿黃色雨衣的男子」稱呼梁凌杰，而今日，在鄺俊宇的口中，首次出現了「凌杰」兩個字。
「呢個係我可以為凌杰做嘅最後一件事。」鄺俊宇離開法庭時，輕輕說了這句。