（獨媒報導） 「救佢先啦，我唔走啦！」邱宏達被警員制服時激動地說。2019年10月1日，警員開真槍射中曾志健（健仔）左胸，當時仍是理大博士生的邱宏達上前營救，卻被警察制服，一度被控暴動罪。邱的律師與控方協商，最終邱承認非法集結罪，判囚一年。
在保釋候訊的一年間，邱宏達不時面對家人不理解的目光。父親曾對他說：「你嗰陣時唔走埋去，唔使搞到而家咁啦。」邱卻說，自己從不後悔：「本身救人呢件事，係人性嚟㗎嘛」。
如今人人都稱他做「博士」，但不為人知的是，案件及疫情奪去了他半年的研究時間，論文進度亦受盡影響。只是邱宏達沒有放棄，終在今年5月獲頒理大物理學系博士學位。他早已料到認罪後會入獄，11月的畢業禮鐵定無法出席，可是他豁達地說：「親手拎到畢業證書已經好開心」。
事發一刻 因父親一句話打消恐懼
憶述事發前的一刻，邱宏達說最先是在衝突期間，聽到有示威者挑釁叫警員「開槍」。他於是心想，警員應該真的會開槍，「嗰刻心理上同對死亡嘅恐懼好強烈，之後諗『如果真係死喺呢一度，我屋企人點呢？』」
但恐懼的念頭不久便被打消。他憶起與他立場截然不同的父親，有次從新聞中見到被警察制服的示威者，衝口而出說：「如果呢啲咁嘅仔，有得揀一槍打死佢就算數啦，費事大家生勾勾等痛苦，出返嚟半殘廢又要養住你」。
於是他放下恐懼，繼續往前跑。正當他轉頭向右望時，卻聽到「嘭」一下槍聲。早有心理預備的他一度以為警員只是擎槍，但在散開的人潮中，他看到只有一人躺在地上。
那個倒地的人便是健仔。邱宏達起初感到奇怪：「點解佢瞓咗喺地，應該一瞬間就彈返起身啦，走啦？」邱因此判斷，健仔該是中了實彈。此時他再感到疑惑：「如果中咗槍受傷，通常都會按住痛處然後叫，但佢又唔會喎。」於是他猜，健仔是被射中致命的部位。
2019年10月1日，荃灣（資料圖片）
用10秒決定救人 憶起南韓民主運動身亡學生
由看見健仔受傷，到決定跑過去救他，過程只有約10秒。但短暫的瞬間裏，邱宏達腦海中已經歷了一連串思考，「反正我走埋嚟個陣都預咗開槍、預咗係現場會俾人射死，雖然我將生命嘅價值睇得好似好低，但嗰刻我諗：『如果最後佢真係要喺呢個地方死，佢都想死得有啲意義同價值』」。
此外，邱宏達當時還憶起一個歷史性畫面：在南韓民主化運動時期，學生李韓烈被警方發射的催淚彈擊中，倒臥地上死亡；李韓烈的同伴上前托起他的身體，畫面被鏡頭拍攝下來，最終引起極大關注，令南韓民主化進程行前一大步。邱宏達說，自己當時是打算將健仔移到較安全的地方等候救援，同時想著：若果在呼喚緊急救援的途中，有人拍攝到這一幕，起碼其他人會知道傷者被救起。
事過境遷，雖然只有十多秒，如今逐格回想當時的思路，邱宏達形容猶如經歷了一個漫長的過程。他無奈笑言：「當刻我覺得時間好長，但係睇返片，『咦，點解我可以咁短時間内諗到咁多嘢？』」他如此總結道：「可能當人臨死嘅時候，遇到最後最大壓力嘅時候，個腦筋轉得咁快，讀咗咁多年書就係呢個成果。」
邱宏達被警員制服一刻（城市廣播片段截圖）
曾作最壞打算 感激健仔走出鬼門關
而直至被警員制服的一刻，邱宏達才料想到自己或會被控暴動。可他當刻更擔心的，是健仔有否得到適切救援，於是他不停高呼，要求警員協助健仔。
重看事發當日的片段，可見邱宏達的身體被警員壓著，頭只能仰望着天空。邱當時呼喊：「救佢呀，佢中咗槍呀，受咗傷呀！」，警員反問：「你係正式嘅救護咩？」邱宏達回答：「梗係啦，有First Aid牌，唔通你有咩？」警員淡然回應：「First Aid 我都有啦。」邱於是問：「咁你唔救佢？」換來警員一句：「我而家控制你呀嘛」。最後邱宏達激動道：「救佢先啦，我唔走呀。」
邱宏達知道警員懂得急救時，心想：「好歹你都換個識急救嘅同事睇住個傷者，唔識急救就撳住我啦，我又無掙扎。」他坦言曾作最壞打算：「我其實無諗過健仔會企得返出嚟嘅，嗰陣我有心理準備佢可能會死，到時我又要排期上庭，亦要為佢上死因庭作供，到時就會拎返我庭上供詞入罪，都係咁坐（監）。」
後來上庭時，邱宏達與健仔再次相遇。言談之間，健仔對邱充滿感激，卻難掩內疚：「當時你埋嚟都有個警察攞槍指住你，你都繼續走過嚟。」邱安撫他：「唔關你事，你唔需要內疚嘅」。
去年10月，健仔上庭時（資料圖片）
邱宏達說，他反而想多謝健仔。對於健仔能夠「喺鬼門關走返出嚟」，其實心存感激。
雖然支持政府的父親於事發後未有改變對示威者的看法，更曾稱：「你嗰陣時唔走埋去，唔使搞到而家咁啦」，但邱宏達從來沒有後悔當時的選擇：「本身救人呢件事，係人性嚟㗎嘛」。
望後人回望自己歷史：知道當年香港政府做過乜
入獄對邱宏達而言，是一種考驗。他希望通過考驗過後，自己能繼續前進，亦希望後人可回望自己這段歷史：「如果最後，我依然可以走返學術界，以後嘅香港人睇我嗰Profile，原來有個嚟自香港嘅教授，當年為咗自己社會做呢啲事而坐埋監，出獄之後繼續喺學術界發展都好成功，睇返我段歷史會知道當年香港政府做過啲乜嘢。」很久以前，他不相信入獄是社運的必經階段。直到後來，他發現當底線被人看清，只能先向後退，才可以向前行。
自2019年起，不少年輕人被定罪判囚。在政府眼中犯下「彌天大錯」的他們，在部分人眼中，卻只是在堅持自己認為對的事。熱衷化學研究的邱宏達，又說起一個諾貝爾獎得獎者的故事：2011年獲得諾貝爾化學獎的謝赫特曼（Shekman），起初發表准晶體研究時受盡科學界批評，遭別人質疑研究錯誤；多年之後，他的研究才開始得到重視，最終人們接受他的研究結果，並頒發諾貝爾獎給他。邱宏達記憶最深刻的是，是謝赫特曼每次演講時，都會講述當初身邊人如何批評他，直至他得獎，批評他的人才知道錯的是自己。
夢想成為科學家的邱宏達，經歷過兩次會考及一次高考。成績不如意，他便努力修讀高級文憑，終獲教授推薦修讀物理系學士課程，並以以一級榮譽成績畢業，直接修讀博士。步向教授的道路雖因案件而中斷，邱宏達仍希望未來能在學術界發展。
在庭上，代表律師曾讀出邱宏達親自撰寫的求情信：「當通過種種磨練後最終能夢想成真，我的故事會否也成為日後香港人的逆境奮鬥故事。就算我真的未能成為一位偉大的科學家，期盼和其他科研工作者繼續推動香港科研發展，改變香港科研不入流的刻板印象，渴望日後孕育出一位位偉大的香港科學家，由他們代我實現這個夢想」。
身形高挑 憂獄中無適合衫褲
身高193厘米的邱宏達，站在人群中特別出眾。他笑言入獄後最不適應的，該是沒有適合自己身形的衫褲，以及睡床會不夠長。此外，獄中的膳食出名難吃，邱宏達早聽過別人形容食物菜單，挑食的他未親嚐已不想吃，「平時喺出面食，就算幾難食我都會食哂佢，因為係自己揀，但喺入面無得揀。」至於如何打發時間，他打算繼續透過看書來鑽研科學，若刑期較長的話或會看人生哲理書。
今年7月，多人趕在LOTR限期前離港（資料圖片）
籲保存記憶 勿透過遺忘令心境舒暢
社會急速變化，邱宏達難以預計出獄後，會面對怎樣的景況；但他對香港人仍有信心，因為他相信，大部份人都已認清香港當前發生何事，亦相信堅持追求民主自由的人，能在限制下用僅餘方式去表達自己意見。不過他同時慨嘆，難以避免有部份人會為自己作最好打算，導致為香港堅持的動力減低，「覺得而家接近2014同2016香港低迷嘅情況，但係會多咗種『搞唔掂就移民』嘅諗法。」
那邱宏達自己有否想過離開香港？他坦言在反修例運動前，曾考慮到外國進修博士課程，累積經驗後再在學術界創一番成就，但完成後必定會歸來：「如果到最後有Come Back嘅一日嘅話，我會返嚟嘅。」
問到會否擔心2019年的事被遺忘時，邱宏達引用捷克作家米蘭·昆德拉的名言回應：「人類對抗權力的鬥爭，就是記憶與遺忘的鬥爭。」他認為，人們是否能將記憶保存極為重要，因牽涉到群體進步：「起碼都要記得曾經發生咩事，從中汲取成功同失敗嘅經驗。如果唔記得咗歷史，之後犯返同樣錯誤，令自己再次身陷險境，對於人類社會或群體，係好無效益嘅做法。」有些人因不同原因選擇遺忘，邱宏達卻想提醒眾人，千萬不要嘗試透過遺忘，令自己心境舒暢。正正是在過往社運沉寂的時期，有人很認真地汲取教訓，反送中運動才會出現：「第一次犯咗錯誤，人要繼續向前行，（因為）可能會再跌多一次」。
邱宏達最後寄語留下來繼續堅持的人：「有啲事無辦法一時三刻做得成，係要經過一代人、兩代人，憑佢哋嘅經驗去累積返嚟。」