【獨媒報導】鄧世禮，社民連成員，被控去年 7.1 舉行或組織一個未經批准集結，罪成被判入獄6個月。少年曾行走江湖，中年搞社運，59歲的鄧世禮在入獄前接受《獨媒》訪問，認為現階段應保留實力，不要作無謂犧牲。「人在就江湖在，政權唔係咁容易消滅到我哋。」
社民連的黨友都叫鄧世禮做「四哥」，他的眼睛不太好，瞇起雙眼，拿著煙斗，有點像武俠小說中的丐幫長老。每逢有社民連成員上庭的案件，四哥早上都會坐頭班巴士過海，排隊旁聽審訊，「希望令佢哋唔好覺得孤單」。
8年前和梁國雄第一次交談，長毛便問鄧世禮是否會功夫：「你保護吓我呀，我成日畀人打。」說鄧世禮是長毛「保鑣」，其實絕不為過。
讀書不多，鄧世禮的少年時代一直在江湖混，食過夜粥做過放數。他記得有一次，在尖沙咀金輪酒家，即柯士甸道及彌敦道交界的麥當勞現址，親眼目睹一名江湖大佬被人用筷子插死。
後來有親人被尋仇，浪子回頭去了做運輸。「哈哈哈哈，要脱離個圈好易，換個傳呼機，不去從前去的地方，不搵從前搵的人，已經無人搵到你。」
做了近二十年貨車司機，鄧世禮眼睛退化，跑了去學全身按摩，儲了些客，還開起店來。後來生意不好，他索性結業，2012年成為人民力量立法會選舉義工，「係囉，跟住就好似食咗鴉片咁，哈哈，覺得有責任去爭取普選」。
在遊行集會期間，總是站在梁國雄身旁的鄧世禮。
28年前首遇長毛 可望而不可及
那是1993年，鄧世禮在街上首次遇上長毛，可望而不可及，他連打招呼都不敢，「覺得佢係街頭戰士、革命家，真係好少香港人會咁做」。到了真正認識梁國雄，已是20年後的事，正正是長毛問他會不會功夫。
在2013年 7.1 遊行後，民主倒梁力量在中環遮打花園發起絕食50小時，爭取雙普選兼要求梁振英下台。「我哋麻甩佬，傾兩句佢已經知道我係好尊重佢。嗰陣時覺得佢高高在上㗎，佢可以放棄一切去做任何嘢。仰慕吓佢，捐吓錢就有。」
後來，雨傘運動期間替社民連做義工，至2017年年底正式入會。鄧世禮在5年前開始留起長頭髮來，其實都是效法長毛。如果說鄧世禮是長毛的保鑣，梁國雄其實更是鄧世禮的偶像。
2017年黑紫荊行動，鄧世禮首次被捕。
2017年6月28日，香港眾志、社民連和人民力量發起「黑紫荊行動」，一度「佔領」灣仔金紫荊廣場，鄧世禮是其中一員，那是他首次被捕。鄧世禮和長毛被抓到北角警署，二人在會議室內面對面，一起扣留了三十多小時，這亦是他印象最深刻的一次行動。
《港區國安法》下，《蘋果日報》停運，民陣、教協、612人道支援基金、石牆花、支聯會、職工盟相繼退場。黨友吳文遠、黃浩銘和岑子杰目前皆在囚，鄧世禮想到這些便感到難受，「都幾孤單，《國安法》過咗之後，係過一日等一日」。
「好難過，睇住一個𡃁仔（梁國雄）扎扎跳，到依家喺監房、垂垂老矣。如果《國安法》入到，到時出返嚟都70幾，佢健康又唔好。」前年反送中運動期間，鄧世禮看到年輕人上街，再想到昔日年輕時，在江湖胡混的日子，「嗰種難受，我無辦法用把口同你講到」。
前年 8.31 太古廣場內，有市民看到年輕人更衣離開，便拍手鼓掌，在場的鄧世禮便不禁老淚縱橫，「其實應該係我哋去，而唔係鼓勵年輕人暴力」。
社民連總部內的長毛書室
這名丐幫長老，最喜歡看的是古龍小說《邊城浪子》，尤其喜愛殺人的刀手葉開。風塵之中，必有性情中人。在社民連總部中，有一個「長毛書室」，書架上有五顏六色的書籍，齊齊整整地分門別類，這些都是長毛多年來的典藏。自從被 DQ 立法會議員後，梁國雄將物品寄存在別人處，後來對方移民便搬回位於長沙灣工廈的總部。
四哥便一展所長，給長毛砌了這幾個書架，中間還有一個酒櫃。「佢做咗十幾年議員，無車無樓，靚啲嘅衫都無，住公屋，就係得呢啲資產，呢個就係佢個家，咪整靚佢囉。」
長毛看到製成品後，笑得合不攏嘴，縱使嘴上還是說「整咩呀，嘥時間」。梁國雄對鄧世禮來說，再準確一點說，其實是領袖。鄧世禮苦笑說，曾幻想警方國安處破門掃場，指控社民連干犯《國安法》，並搬走所有書籍及物品。「你見到賢學思政咁好難唔諗，對吧？欲加之罪。」
鄧世禮認為，社民連解散未嘗不是其中一個選項，「我講多一次，人在就江湖在，留喺度同佢頂有乜意思，人哋勢強，（社民連）解散可能係其中一步。起碼保留到啲心血，唔係我啲心血呀，係佢啲書。」
訪問當日，鄧世禮穿上印有長毛頭像的 T 恤，他哈哈大笑，「佢見到實話我搞個人崇拜。」訪問當日，同正值雨傘運動 9.28 七周年，七年前的 9.28 是鄧世禮第四次吃到催淚彈，他當年在金鐘佔領區用木塊製作樓梯、大雨傘。「人大 8.31 落閘已經係普選無望，但無希望還無希望，都要話佢知，你話無就無？我要同你 fight。」
人生歷經五次催淚彈
「基層人士，無乜成就，唔會發達。」「做過嘅嘢一定要記住，唔係好易瀨嘢。」鄧世禮的記性很好。1967年暴動，5歲的他第一次吃催淚彈，住在深水埗福華街的他，有警察用槍射催淚煙，喚他立刻關窗。
1984年的士加價，司機發起罷駛，演變成暴動。還在浪蕩江湖的鄧世禮，有一晚和兩名女子上餐廳，在西洋菜南街的美而廉餐廳吃晚飯。店舖匆匆拉閘，他看到警察使用盾牌推進，並投擲催淚彈，「其實嗰陣時都係打手手腳腳。」
八九六四，天安門屠城之後，司徒華發起三罷，已「轉行」的鄧世禮，響應泥頭車司機工會的行動，駕駛貨車到上海街及豉油街交界聲援。他眼見有貨車撞向超級市場再縱火，防暴警察出動，並投擲催淚彈。
「2014年前對警察的印象好一點，唔係亂咁嚟，警告無效先打你，唔會有跪頸。」「有咩所謂呀，當人生歷練，要坐咪坐囉，無得避。以前都話可以打，依家不如早早地坐完咪算。」
去年七一當日，梁國雄、陳皓桓、鄧世禮在遊行隊伍前。
「作為參與抗爭嘅政黨都唔出嚟頂，講唔過去」
《港區國安法》去年 6.30 晚上生效，朱凱廸、梁國雄、陳皓桓、胡志偉、曾健成、陳榮泰、徐子見、鄧世禮在翌日發起反惡法遊行；他們分別被控煽惑他人參與、組織及明知而參與未經批准集結3罪。「出得嚟行，預咗要還。《國安法》立咗，就預咗會殺到埋身。」
四哥自言，多年來參與遊行，一直都拒絕行頭和拉橫額，「案發」當日陳皓桓將橫額交給長毛，他再接過長毛手中的橫額。「出來行就係覺得要有人頂，作為參與抗爭嘅政黨都唔出嚟頂，講唔過去。」
除了要頂，鄧世禮更關心的是長毛的安全。在去年4月，長毛到中聯辦抗議時，遭一名八旬老翁刺傷右腰。「如果當日我喺現場，我可以擋一擋，我寧願插到嗰個係我。」長毛在 7.1 前一日曾叫他不要參與：「你都係唔去啦，今日無不反（不反對通知書），會拉呀。」「毛哥咁講啫，但我諗吓諗吓，又有個阿伯隊你一刀點搞呀。」
對於被捕，鄧世禮形容是打了個突，「落到街上警車，我仲話個天咁光嘅」。可能自小眼睛不好，鄧世禮很早已學會調整心理接受不幸。「去面對佢，唔好怨天怨地，我起碼好過莊陳有，至少睇嘢都仲有色彩嘛。」「保留實力，唔好放棄、灰心。今日雖然好似乜都無晒，但其實唔係。負隅頑抗無乜意思，留返火種就好。」
2017年東北案8人獲准保釋，陳皓桓和黃浩銘舉行勝利手勢，連同鄧世禮，三名社民連成員均成階下囚。
記者：麥馬高