【獨媒報導】2019年7.21元朗事件中，前立法會議員林卓廷與6男被控暴動罪，今（19日）踏入第32天審訊。林卓廷已完成作供及傳召辯方證人，現時由第二被告庾家豪作供。庾供稱7.21下午在港島遊行後打算回屯門，期間想到元朗吃糖水。他抵達元朗站後見白衣人開始襲擊，自覺有責任保護老弱婦孺，故站人群最前抵擋。庾稱當時白衣人持棍，向他說「出嚟呀！打你呀！」，庾遂回應：「過嚟啦！Come on! 」他解釋：「佢（白衣人）恐嚇我，話要打我，我扮唔驚，大返佢『夠膽咪過嚟囉』。」其後白衣人行入閘朝庾招手，庾表示自己向對方招手，表達「我哋唔係弱過你，我唔可以向佢哋示弱嘅姿態」。其後閘外有黑衣男遭圍毆，庾稱希望引白衣人注意，故拾水樽用力擲地，並扶男子入閘。
另外，庾表示其後救護到場，「見到救護員嚟到，我相信警察就到或者到咗，我相信頂多一陣、捱多一陣，就有人救我哋。」及後閘內人持消防喉向白衣人射水，庾表示曾將拉喉者拉後免受襲，亦曾協助捉住水喉。庾稱見救護員出閘時遭白衣人打，「嗰班白衣人痴晒線，連救護員都打，完全離晒譜。」直至庾進入車廂，他協助頂住白衣人。法官陳廣池指片見有白衣人「揸住車門兩邊扶手，擋住外面白衣人」，並問：「可唔可以推論佢係白衣人其中一個成員？」庾回答：「有機會係。」
庾稱任職1823熱線主管 因本案被停職
首被告林卓廷已完成作供及傳召辯方證人，現時到第二被告庾家豪作供，由辯方大律師李百秋主問。庾供稱現年39歲，案發時34歲。他自6至7歲起住屯門，案發直至現時居於兆康苑。庾稱中學會到元朗吃飯或補習，因此對該區熟悉。
庾表示案發時任職香港政府1823熱線中心，職位為客戶服務主管，屬合約制非公務員，他在2020年8月因本案被捕被停職。庾指有市民遇緊急情況如受傷會致電1823，但職員會建議打999，若市民不願自行報警，職員會協助。法官陳廣池問：「打999都要講對方嘅身份位置，做中間人幫佢打咪好怪？」庾同意，但有時未能說服對方。陳官追問：「如果說服唔到就幫佢？你哋有咁嘅責任？」庾表示：「有咁嘅指引。」
庾稱7.21下午參與港島遊行 晚飯後打算到元朗吃糖水
辯方問庾7月前有否參與合法遊行，他表示曾參與6.9及6.16的遊行。7.21當日，庾參與民陣舉辦的港島區遊行，他依照大會建議穿黑色衫，亦穿黑色褲及鞋，攜黑色背包。庾與當時女友於下午4時45分到達維園。庾表示沒有留意遊行終點，最終在上環離開，辯方提到遊行終點是灣仔盧押道。陳官留意到庾的答案顯示他或超出合法集會的範圍，有參與非法集會的風險，於是向他發出毋須回答損害權益問題的警告，免招致入罪。陳官又解釋，庭上證供比警署內的警誡供詞重要，因為「法庭唔會打人恐嚇，唔會有咁嘅控訴」。
庾稱，當晚與女友在尖沙咀晚飯後，一同乘搭西鐵回家，途中打算前往元朗又新街及雞地一帶吃糖水。庾表示於10時45分到達元朗站，辯方問他在車程途中有否從電話看遊行消息，庾稱沒有，「同女朋友一齊，咁樣撳電話真係唔得。」庾亦指，沒有看到林卓廷在 Facebook 發出的帖文，同時不知元朗發生衝突。
庾稱月台有人籲換衫 官：佢哋鼓吹人換衫？有免費衫送，（平時）冇咁好福利？
庾稱下車後見月台長凳附近有人停留，凳上亦有十多件衣服。他因「八卦」觀察情況，聽到有人說：「下面有人會打黑色衫嘅人」，並呼籲人換衫。陳官問說話的人是甚麼衣著，庾表示「乜色都有」。陳官再問：「佢哋鼓吹其他人去換淺色衫？」庾稱：「我唔會用鼓吹，係建議。」陳官問：「有人叫你換衫，有免費衫送，相信（平時）元朗月台冇咁好福利？」庾同意情況與往常有別。雖然他聯想到可能與有人穿黑衫遊行有關，但自己卻沒有換衫。
庾起初不覺危險 相信港鐵已報警 施襲者「冇理由返轉頭等畀人拉」
庾在月台玻璃圍欄向下望，未見有特別情況，故與女友經扶手電梯到大堂。他抵達大堂後見地上有血漬及斷棍，圍觀的人說：「啱啱有個女人畀一班人打穿頭，流晒血，匿埋喺女廁等救護員。」庾表示當時不覺得害怕或危險，因相信港鐵或市民已經報警，且認為施襲者已離開，「班人冇理由返轉頭，等畀人拉。」陳官確認其意思「即係話冇咁蠢返嚟？」，庾同意：「返嚟現場都唔合理。」庾其後聽到林卓廷大聲告知市民，現場很多黑社會，又表示已報警。陳官問他聽到林說話後有何感覺，庾表示：「我消化緊，係黑社會尋仇，定係好誇張咁幾百個人打人，我一片空白唔知咩事。」陳官追問：「見到林卓廷，你冇特別感覺？」庾表示：「佢都會搭地鐵，我唔知佢係專登嚟，定搭車經過。」
庾稱白衣人光明正大持武器：睇戲先見到黑社會咁做
其後庾聽到閘機附近嘈吵，見有20至30名白衣人手持藤條木棍，部分拿着國旗及區旗，他相信「黑社會同呢班人，係同一班人」，並指：「突然一班人拎住武器衝入嚟，港鐵站係公家地方，佢哋好似有制服咁著晒白色衫，有啲口罩都冇戴，光明正大，睇戲先見到黑社會咁做啫。」
庾稱白衣人兇神惡煞「好似大佬走埋嚟講數嘅態度」
庾形容自己站在「人群中嘅最前」，並目睹一名穿白色恤衫的人兇神惡煞，「好似大佬走埋嚟講數嘅態度」，向閘內人士說：「打你哋，夠膽就出嚟！」，他感覺「好似付費區內嘅人都要畀佢打咁」。他認為白衣人不會衝入閘打人，因閘機及圍欄「好似有無形嘅牆隔住佢哋」，不過若出閘的話很大機會被打。其後白衣人增至過百人。
庾稱見白衣人襲擊後「唔會表現出好驚」
不久後，白衣人開始伸手用藤條及木棍，襲擊閘內近欄杆的人。庾稱閘內人見狀害怕，越縮越後，亦有人幫忙抵擋，部分人叫「唔好打」、「停手」，但不見有作用。庾表示自己亦害怕，但「唔會表現出好驚」，他又認為逃跑的話，「容乜易追住我嚟打？」，因此選擇留在原地。陳官不解問：「我唔明，你話跑或者走會打你？」庾解釋害怕被追。陳官再問：「你喺閘入面應該好安全，使乜驚？」庾表示：「好難唔驚，佢揸住木棍可以衝入嚟。」
庾稱有責任保護老弱婦孺 故站人群最前抵擋
庾認為閘內相對安全故沒有離開，同時覺得閘內「越多人越好，互相保護」，若閘內人數比白衣人多，他們就不會得寸進尺。庾自覺有責任保護老弱婦孺及女友，因此站在人群最前抵擋。庾聽到林卓廷說已報警，故相信警察很快到。期間他聽到有市民報警，但部分人說未能接通，即使接通對方亦很快掛線。他不見現場有港鐵職員，辯方問是否覺得奇怪，他指沒有這樣想，因「佢哋都係普通人，相信都驚」。
庾：白衣人稱「過嚟呀」自己為表現出無懼及反抗 故回應「come on」
辯方播放片段，顯示庾對白衣人說話。庾稱當時白衣人持棍，向他說「過嚟呀！出嚟呀！打你呀！」，庾遂回應：「過嚟啦！Come on! 」他解釋：「佢（白衣人）恐嚇我，話要打我，我扮唔驚，大返佢『夠膽咪過嚟囉』。」他又補充，行為是希望與白衣人保持距離，「如果我跪低話唔好入嚟，佢扑我一下都唔出奇，而家我係話畀佢聽我唔驚。」辯方問庾實際上是否感害怕，他同意：「一定驚，我兩隻手咩都冇，佢打落嚟我用手擋都係受傷。」庾再次強調：「我哋表現到會反抗，佢哋未必夠膽衝入嚟。」陳官質疑，既然庾不認識身旁的人，又如何反抗？他解釋部分人均會表現出不害怕。
庾稱推跌指示牌 免白衣人再搖晃
另一片段顯示庾用手推跌指示牌，他解釋較早時白衣人搖晃指示牌，站在附近的女友差點被撞到手，庾於是將指示牌推跌，以免有人再搖晃。片段又顯示庾作出招手動作，他指當時白衣人不斷說「出嚟打」，雖然他驚慌但選擇向對方招手，「需要逞強，要扮唔驚，話畀佢聽我唔驚佢哋，唔係亂咁嚟。」
庾稱將水樽擲地為引白衣人注意 停止向黑衣男施襲
閉路電視片段見白衣人在閘外走廊圍毆一名黑衣男。庾稱希望引起白衣人注意，免令其他白衣人繼續向男子襲擊，於是他拾起地上的水樽，用力擲在地上發出「嘭」一聲，成功引起白衣人注意。庾及後趕至黑衣男附近，見對方未能爬入閘，於是庾連同數人「夾硬扯佢入嚟」，最終男子跌在閘內地上，庾扶起對方。過程中庾差點被白衣人打中，最後他回到人群中。陳官指，從其他片段可見該水樽飛出閘外，庾表示：「睇唔到飛咗去付費區外」，陳官要求翻看片段，並指：「好似係飛咗出去。你當時見唔到？」庾同意。
庾稱向白衣人招手為阻嚇：唔可以向佢哋示弱
其後一名白衣人行入閘內，朝庾的方向招手，他擔心白衣人會繼續衝入，於是自己行前兩步向向對方招手，為表達「我哋唔係弱過你，我唔可以向佢哋示弱嘅姿態，話畀佢哋聽唔驚你哋啲恐嚇，唔可以畀佢哋衝入嚟打」。他強調目的是為了阻嚇，該白衣人最後離開。庾當時感覺有人拉着其背包，回頭發現是林卓廷，他正叫人「唔好出去」。
庾：見救護員嚟到，相信警察就到，捱多一陣就有人救我哋
庾其後見救護員走到輪椅通道打算入閘，一名灰色頭盔記者在附近拍攝時遭白衣人打，因此庾上前拉着該記者，「我捉實佢，攬咗佢一陣。」庾補充：「見到救護員嚟到，我相信警察就到或者到咗，通常佢哋都差唔多時間到，我相信頂多一陣、捱多一陣，就有人救我哋。」庾續指，接着聽到閘機位置有人慘叫，於是他前往了解，並見很多人打開雨傘，閘外有白衣人襲擊何桂藍，數人跳出閘拯救她。庾稱「我冇膽跳出去」，他見其他人跳出去時被白衣人打，於是協助拉回對方。另外，遠處有一名穿白色裙的女士被打至倒地。
閘內人持消防喉向白衣人射水 庾稱曾拉後對方及助捉水喉
片段顯示約11時，閘內人手持消防喉向閘外白衣人射水，庾稱目睹情況，相信對方希望驅趕施襲的白衣人。庾拾起地上消防喉拋走，避免有人絆倒。他其後見白衣人停手，部分則滑到，因此認為射水能夠有效阻止白衣人襲擊。庾表示自己曾將拉喉者拉後，以免他被靠近的白衣人襲擊。其後他見到該人將喉射上天花板，因此庾捉住水喉射回白衣人方向，其後離開。
庾：白衣人痴晒線，連救護員都打
庾稱這時見救護員打算到閘外處理傷者，並見閘內人士打開雨傘保護他們，以抵擋襲擊。惟庾形容：「嗰班白衣人痴晒線，係咁打救護員，連救護員都打，完全離晒譜。佢哋應該想救人，都唔關事，根本冇差別咁打。」陳官質疑有分真實救護員和急救員，庾相信對方是政府救護員。
庾稱逃上月台被打中頭
不久後大批白衣人衝入閘內，庾跟其他人一起逃難前往月台。他見樓梯擠塞，於是經扶手電梯上去，期間卻被打中頭並感覺疼痛。他進入車廂後發現很多人在月台望下方，自己亦前往了解，發現一名黑衫女士在樓梯伸開雙手抵擋白衣人。庾隨即大叫「救人呀」並到樓梯協助女士上來，白衣人緊接追上，於是他跑入車廂。
片見白衣人在車門擋 官：可唔可以推論係白衣人成員？
進入車廂後，庾見前方車門有白衣人襲擊，而車廂內有婦孺，於是庾「行上前幫手頂」。他又指：「好多人喊，有人話：『有細路，有女人，唔好打！』」陳官見片段顯示有白衣人「揸住車門兩邊扶手，擋住外面白衣人，唔畀佢哋入嚟（車廂）」，並問：「你知唔知佢喺付費區內定外？」庾表示：「我唔會認得佢，其實佢一直喺出面同啲白衣人一齊，突然間入嚟擋住。」陳官並問：「可唔可以推論佢係白衣人其中一個成員？」庾回答：「有機會係。」
案件明續審。
7名被告均否認暴動罪，包括：時任立法會議員林卓廷（43歲）、庾家豪（35歲）、陳永晞（37歲）、葉鑫昇（31歲）、鄺浩林（26歲）、尹仲明（48歲）及楊朗（26歲）。
案件編號：DCCC 1106/2020、1132/2022（已合併）
審訊第31日
控方稱「吹雞」指召集人 可用於添丁時叫村民恭賀 官認為屬「黑社會術語」
背部被打廚師首作供：說「好多白衫人」後遭圍毆 解釋「我收工你哋打錯人」仍被追打
審訊第30日
時任區議員黃偉賢稱通知警長「鄉事吹大雞」對方胸有成竹回應「有部署」
審訊第29日
控方質疑林卓廷稱呼市民「兄弟」卻不對白衣人說：兄弟唔好打？
審訊第28日
控方質疑林卓廷無能力：警察未到，你手無寸鐵憑咩保護市民？
控方質疑林卓廷「冇試圖同白衣人和談」 亦無聯絡何君堯平息事件