【獨媒報導】2019年7.21元朗事件中，前立法會議員林卓廷與6男被控暴動罪，今（20日）踏入第33天審訊，第二被告庾家豪作供，由控方高級檢控官岑頴欣盤問。控方指片見庾招手向白衣人說「嚟啦，come on」。控方指他說話時「睜大眼？」，庾不同意。控方問：「你隻眼平時都係咁？」庾回應：「我對眼嘅大細不嬲係咁。」控方指庾情緒激動、表現兇惡，他回應「扮兇惡啲」，以表達「唔係怕事」。法官陳廣池質疑：「你面容笑緊，外人睇係興奮狀態？」庾不同意。庾早前稱留站內與其他人互相保護，控方追問：「你唔會一個人對抗閘外20至30個白衣人？」庾回應：「如果得我一個，就轉身跑啦，因為當時有女朋友、老弱婦孺、廁所有受傷女人。我唔可以轉身跑囉，我要做返一個男人應該做嘅嘢！」陳官聞後表示：「你有少少性別歧視，你見唔見到有個不是你女朋友嘅人保護緊你？唔係淨係男人保護到人，女人都保護到人。」
白衣人在車廂襲擊 庾稱感覺「好絕望」：走都冇得走，好似恐襲咁
第二被告庾家豪繼續作供，由辯方大律師李百秋主問。庾昨供稱當日到元朗想吃糖水，下車後發現白衣人在大堂開始襲擊，其後他逃上月台進入車廂，白衣人隨後在車門襲擊車廂的人。辯方問庾當時的感受，他表示「我感受係好絕望」，「困住喺車入面，（白衣人）塞住嗰門口，佢哋係咁打車入面嘅人，避都冇得避，走都冇得走，感覺好似恐襲咁」，他又指車廂內有婦孺，有人不斷叫「唔好打」。
辯方指，直至11時13分列車開出。庾稱車上有人安撫哭泣的婦孺，亦有人為傷者包紮，另有元朗居民討論如何回家。庾在兆康站下車，雖然自己曾被打中頭，但因無流血，故沒有去醫院並直接回家。
庾稱出車廂救女子 官質疑：你話非常危險，點解離開車廂？
代表林卓廷的大律師黃錦娟問到，在白衣人到場前，元朗站閘內有沒有人戴豬嘴、眼罩、護膝、持盾牌或橫額，庾表示不見有。法官陳廣池問，車廂內有沒有人像庾一樣在港島遊行完入元朗，庾表示無法得知。辯方再問到庾跑上月台的情況，庾同意見到白衣人凶神惡煞衝入閘，他感覺非常危險，於是與很多人一樣轉身跑。庾昨稱，進入車廂後見有人在樓梯口圍觀，於是步出車廂了解，最後協助女子上樓梯。陳官今問：「你話覺得非常危險，但係你入車廂之後又行返去月台樓梯，你未見到嗰個女人，點解離開車廂？」庾表示車廂內相對平靜，白衣人沒有追上，同時見十多人圍觀。
辯方問，白衣人襲擊車廂人士時，他們是否只抵擋無還手。庾回答：「一定係，完全冇辦法還手，無可能還手，佢哋係咁打，只可以擋。」陳官最後問，庾有否看過林卓廷當晚的直播，他表示沒有。
控方指庾睜大眼對白衣人說話 庾：我對眼嘅大細不嬲係咁
其後到控方高級檢控官岑頴欣盤問。片見庾站閘內人群最前，邊招手邊向白衣人說：「嚟啦，come on。」控方問：「你擘大眼？」庾表示：「當然有。」控方澄清：「係睜大眼？」庾不同意。控方問：「你隻眼平時都係咁？」庾回應：「我對眼嘅大細不嬲係咁。」控方追問：「你嘅眉毛向上挑起？」庾表示說話時面部會有郁動。控方續指，庾當時亦有雙手放胸前，作出招手動作；他同意。
控方指庾情緒激動表現兇惡 庾：扮兇惡啲
控方指出：「你講嘢嘅時候情緒比平常激動？」庾回應：「唔係平常傾計，白衣人恐嚇閘內嘅人，我唔想畀佢哋知道我驚佢哋、弱過佢哋，唔係咁怕事嘅樣。」控方再指：「你表現兇惡啲？」庾回答：「扮兇惡啲。」控方問：「你睜大眼兇惡啲？」庾表示：「冇咁嘅諗法，冇話睜大眼兇惡啲，講嘢個樣有變化。」
官質疑庾「面容好似好興奮」
陳官問庾的手部動作，即雙手拍手、掌心向內，代表甚麼意思。庾表示招手指「叫佢夠膽過嚟」，但拍手無刻意作用。陳官問：「你面容好似好興奮？興奮到你女朋友推開你，你隻手撥開佢？」、「你面容笑緊，外人睇係興奮狀態？」；庾不同意，「表情興奮睇落可能係，但係表達緊我唔驚」，他又澄清推開自己的女子並非其女友。陳官說：「唔好意思呀」，庾回應：「唔緊要。」辯方一度反對陳官的提問，因「興奮」意思覆蓋範圍大，並問：「係咪咁樣 lead（引導）佢？咁嘅方式？」陳官不同意是引導：「我唔同意你話我 lead 佢，我係法官角色問緊佢，畀證人解釋糾正」，他又對辯方指：「你似乎係律人寬己，你自己都成日 lead 人哋。」
控方問到，庾是否處於「好興奮好開心，叫人入嚟嘅狀態？」，他不同意。控方又問：「你要大聲嗌，先可以有扮唔驚嘅效果？」庾同意比平常大聲。控方指其表現是對立及反抗，庾強調是想阻嚇白衣人衝入。
庾稱不能轉身跑因「要做返男人應該做嘅嘢」官：你有少少性別歧視
庾早前稱留在站內與其他人互相保護，控方追問：「你唔會一個人對抗閘外20至30個白衣人？」庾回應：「如果得我一個，就轉身跑啦，因為當時有女朋友、老弱婦孺、廁所有受傷女人。我唔可以轉身跑囉，我要做返一個男人應該做嘅嘢！」陳官聞後表示：「你有少少性別歧視，你見唔見到有個不是你女朋友嘅人保護緊你？唔係淨係男人保護到人，女人都保護到人，雖然你呢個概念唔係第一次講。」
庾不同意與其他人留守以互相壯膽
控方另問，庾是否與其他人一起對抗，庾表示：「我唔會用對抗，你話係咪有共同目的，因為我哋都係受害者，需要大家保護大家，後面市民都不停打999。」控方指出，庾依賴閘內人成為一個群體，一同行動。庾稱：「我唔認為我哋有合作。」控方最後指，當時庾跟閘內人有群體行動，一同留守並互相壯膽，以增加聲勢，庾不同意。
7名被告均否認暴動罪，包括：時任立法會議員林卓廷（43歲）、庾家豪（35歲）、陳永晞（37歲）、葉鑫昇（31歲）、鄺浩林（26歲）、尹仲明（48歲）及楊朗（26歲）。
案件編號：DCCC 1106/2020、1132/2022（已合併）
審訊第32日
被告稱有責任保護婦孺「相信捱多陣有人救我哋」、向白衣人招手因不能示弱
審訊第31日
控方稱「吹雞」指召集人 可用於添丁時叫村民恭賀 官認為屬「黑社會術語」
背部被打廚師首作供：說「好多白衫人」後遭圍毆 解釋「我收工你哋打錯人」仍被追打