記者：覃志敏、黃采華、謝嘉豪
香港政府自1997年開始，推行融合教育，讓有學習困難的學生和家長，選擇入讀主流學校。教育局稱推行融合教育可以令有特殊教育需要（SEN）的學生，入讀普通學校，與普通兒童相處，從而在教育上充份獲得裨益。根據當局在2017至2018年度的數字，有45,360有特殊學習困難的學生入讀主流學校，佔整體有學習困難的學生的85% ，這代表大部分有特殊學習困難的學生都正在主流學校讀書。
但在香港這個仍以成績競爭的教育環境，有學習困難的學生、家長、教職員是否真的能獲得脾益？ 而家長面對有SEN 的子女又可以如何面對？ 在主流學校任教的中文老師小健：「佢哋唔可能突然高分，但可以令到佢哋有少啲挫敗感。」
家長：混合型的特殊學習困難
不少有SEN 的學生很多時不只患有一種的特殊學習困難，少娟（化名）的兒子正是其中之一，兒子除了被診斷為過度活躍症（ADHD）、專注力不足，還會做出對抗性的行為，同時患有抽動症，現正就讀主流學校。「嗰仔抽動症一發作，試過不停咁講粗口，係訓覺先停，佢雖然知道唔啱，但就完全控制唔到。」抽動症的患者會不由自主地出現一些奇怪的抽動，可主要分為動作型抽動症，如眨眼、擠眉皺鼻，以及像少娟的兒子，屬聲語型抽動症，會不斷說粗言穢語。
以為兒子只是「百厭」 錯過了6歲前治療「黃金期」
兒子三歲前，少娟和丈夫因為工作忙碌，把兒子交了給朋友照顧，到三歲後兒子開始與其他小朋友表現異常後，少娟便辭了職，全職照顧兒子，「而家諗返會有啲後悔，我哋懷疑阿仔經常頂嘴、鬧人都係從我朋友個邊學返嚟，我到而家都時不時見到朋友兩夫婦左一句、右一句咁鬧交，我嗰仔可能細細個陣聽咗，學咗。」
兒子未到兩歲時，當時任教的幼稚園老師就轉介兒子去做讀寫障礙評估，及後再到母嬰健康院接受專科檢查，「嗰時睇咗兩位醫生，有唔同意見，同埋嗰時呀仔太細，冇咩嘢，我就當咗係小朋友百厭。」這樣就錯過了所謂「6歲前治療的『黃金期』」。
遍尋方法育兒 從沒放棄
雖然言談間，少娟不斷訴說兒子不順從自己的意思、經常起爭執、害怕聽學校打來有關投訴兒子的電話等，但她和丈夫卻從來沒有放棄兒子，一直陪同兒子看精神科醫生，期間又接受藥物治療及行為治療等，「我哋家長都會有家長嘅治療小組，之前去過協康會，學吓點同呀仔相處，上緊小組嗰排都會同呀仔相處好咗。」但她表示上完小組後相處情況又打回原形，不夠持續性。
近來，少娟和丈夫有感兒子的情況沒有太大改善，便再尋求私家醫生幫助，現在每兩星期回去覆診，正試用新藥，「雖然價錢貴公立好多，但私家醫生會同我哋、呀仔傾詳細好多，唔似公立咁，主要為咗拎藥，情緒方面唔會點理到。」據她的求診經驗，一般私家醫生不包藥要2000元一次；而看公立醫生，連藥物計算則只需200元一次，相差十倍或以上。
而讀書方面，兒子小學三、四年級時偶會出現對抗性行為，如不讀書，「我哋家長搞佢唔掂，就送咗佢去私人補習，當佢唔想做時，私人補習老師會畀時間佢休息。我預早話咗畀補習老師聽佢嘅情況，唔駛迫佢做啲咩。」對比之下，在主流學校馬不停蹄的學習情況下，很難讓學生們休息。
「我而家只係希望兒子可以做個好人，開開心心」
今年九月，兒子升上中一，入讀新的校園，而學校方面已有兒子過往病情的檔案，但少娟知道兒子擔心別人的標籤，不想老師、同學知道自己的情況，所以少娟暫時沒有與新的班主任傾談，但老師會否主動接觸家長，進而達致家校合作為兒子打造最好的學習環境？面對兒子踏入青春期，少娟表示很擔心：「驚呀仔學其他人嘅行為，做壞事，我而家只係希望兒子可以做個好人，開開心心。」少娟多重視兒子的情緒控制和快樂的成長，甚少提兒子的學習、成績等。
老師：融合教育理念好 但難以實際執行
在葵青區一所小學任教中文科的老師小健（化名），認為融合教育理念很好，但理念和實際卻有很大的距離，太過理想化，「有很多有特殊學習困難的小朋友根本難以融入主流教育既課程，例如是智力遲緩嘅小朋友，他們連自理能力都未學識，已經要跟學校進度，學中、英、數、常，咁喺冇可能。」
學校資源不足 調適制度存矛盾
她亦指出學校資源根本不容許每位有特殊學習困難的小朋友入讀「抽離班」，即一位老師只會教兩至三位SEN 的小朋友，而「入唔到『抽離班』既小朋友只可以選擇參加IEP （個別教育計劃），但計劃只喺教小朋友執功課，唔會喺學習上幫到手。」，並認為教育局調適制度潛藏矛盾，如教育局只豁免他們默書而繼續保留作文部分作為升班或升中的成績。
而她亦曾經遇過有家長投訴為何自己讀寫障礙的小朋友不能獲得更多的調適，「佢問我係咪針對佢小朋友，但有時真係好無奈，唔係我哋唔想，但教育局冇咁既制度提供呢個選項。」但她亦遇過有家長十分接受兒女的情況，那位家長對她說：「我知我嗰仔作文唔掂，我會特別訓練佢其他科，例如默書、口語部分。」而作為老師的她也會盡量協助他們的學習：「佢哋唔可能突然高分，但可以令到佢哋有少啲挫敗感，例如係作文，我有時會畀晒全班作文題目同作文大綱表，等佢哋（有SEN 的小朋友）可以喺屋企先搵資料，再上堂作。」
家長應接受小朋友限制 正向地與小朋友相處
而她亦見過有「抽離班」的家長放棄小朋友，「佢拒絕一切學校嘅幫助，唔聽電話、唔睇我哋錄嘅教學片、又唔睇小朋友功課。」 她寄語家長如果可以做到以下兩點，會令小朋友有更好的學習和成長，「首先喺『接受』，如果家長唔接受自己嘅仔女有特殊學習困難，學校老師點都幫唔到，傾唔到落去㗎，試過有高學歷家長，接受唔到自己小朋友喺有特殊學習困難，唔明點解自己小朋友畀老師教完都做唔到。」她續說：「家長要接受仔女嘅限制，等佢哋慢慢進步，因為小朋友佢哋都知、感受到你對佢嘅期望，強迫佢哋同其他小朋友睇齊只會令小朋友、老師、家長自己有壓力。」她亦建議可減少「彈」小朋友，多用鼓勵和稱讚他們那細少的進步，增強他們自信心。「第二，家長要評估自己嘅小朋友係咪真係適合喺主流學校讀書，唔好因為派咗畀小朋友嗰間學校係名牌學校就堅持入讀。嘗試發掘下小朋友嘅長處，佢未必可以考到第一，但每位小朋友有好大既發展空間，例如體育、畫畫，等佢哋將來至少有自己既長處。」
而她亦希望政府除了未來可以撥多點資源在特殊學習困難學生身上，亦想提升家校合作，早點讓小一的學生提早檢查，趕及在「黃金期」時間幫到小朋友。
社福界：家長不忘要照顧自己 望政府能為他們提供交通補貼
位於石圍角的香港耀能協會石圍角家長資源，為荃灣、葵青SEN 學童的家長和照顧者提供幫助，讓他們和子女都能發揮個人潛能，亦希望社會各界對SEN 人士有多點了解。中心設有會員制，但只要是家中有子女確診有特殊學習困難即可成為會員。
中心主任刁偉瓊表示中心提供多個課程教導家長和他們的小朋友正向教育，「近來我哋都開咗一個來自澳洲嘅3P親子正面管教課程、與『賽馬會喜伴同行計劃』合作的自閉特色學生小組等，參考外國嘅管教課程，幫助家長同佢哋嘅小朋友。」而中心亦強調家長朋輩間的支援，鼓勵他們互相交流育兒的經驗，引起彼此共鳴，「我哋有資深家長會教年輕家長育兒技巧。」
照顧者往往要承受很大的壓力，但她不忘提醒：「家長有時要放鬆啲，行前一步，放開自己，照顧有特殊學習困難嘅小朋友時，不忘照顧自己身心靈，有需要時尋找專業人士嘅幫忙。」同樣她亦提到現在有特殊學習困難人士離校後的轉接階段，以及暫顧服務資源不足，供不應求，「我遇過有位媽媽，丈夫突然要做手術，但又要照顧嗰仔，分唔到身，始終香港多核心家庭，身邊未必有親戚朋友突然幫到手照顧小朋友。」再者，她亦建議政府可以為SEN 人士的家庭提供交通補貼，以助他們減輕生活壓力，如有會員經常要帶兒子從葵青去油塘做訓練，路途遙遠之外，車費亦不菲。
學生
這天下午，穿着校服的大文（化名）剛考完試，與記者相約在他學校附近一間頗受歡迎的餐廳。「頭先份卷有啲『伏』。」大文苦笑着說，和一般的學生一樣，他坐下來便拿起電話玩遊戲，談着學校的二三事。今年讀中六的大文自小學二年級開始被診斷出專注力不足及過度活躍症（ADHD）。記者小心翼翼地打開了話題，本以為情況會略為尷尬，沒想到談起「病情」，大文卻是一副不以為然的模樣。「我記得係小二嗰陣（確診）嘅。」大文輕描淡寫地回答。他憶述小學二年級時因為十分頑皮，經常在課堂上搗亂、離開座位，無法自拔，老師最終忍受不了，因此大文在學校社工的建議下去做檢查，結果便被診斷出專注力不足及過度活躍症。大文告訴記者：「我根本唔知道自己（一直以來）係專注力不足。」
除了過度活躍之外，大文亦深受專注力不足的問題困擾。他形容自己無法長時間集中精神，會頻頻走神，難以專注學習和考試。大文帶着少許不甘的口吻，嘗試向記者解釋他遇到的問題—儘管他的成績不俗，但還是因為專注力不足的問題而令他無法考得更好。升上中學後，大文因為ADHD學童的身份而獲得了考試時間加長和中途小休的特別安排，他明言這些安排確實能幫助到自己。
確診ADHD後，大文很長時間都有服用醫生處方的藥物，儘管這些藥物會使他頭痛和失去食欲。直至到高中，他才自行停了藥，因為他覺得自己的「病情」減輕了—又話者，他其實沒把自己當成病人。
「請當我哋係『正常人』，可能有時要多少少體諒。」
大文形容自己和家人當初得知自己被診斷出ADHD時並沒有感到難以接受。「（ADHD）只係解釋到你嘅行為，而唔係無端端出現咗。即係唔係『確診』，只係多咗個解釋。其實真係冇乜嘢，你原本都係咁，冇變過。」大文說得斷斷續續的，但隨後卻斬釘截鐵，毫不躊躇地回答記者：「（我覺得自己係）正常，（同其他人）冇分別。只不過可能係專注唔到。」
大文很幸運自己的ADHD情況不算嚴重，亦未曾因此而遭歧視，至少他覺得自己擁有正常社交，也感到快樂。他甚至明言若不是記者向其提起，他也不會記得自己是ADHD。除了政府資助藥物費用、考試獲特別安排等支援，大文更渴望「溝通」，亦希望學校能加強教育，讓SEN 學生和其他學生能學會彼此理解，「請當我哋係『正常人』，可能有時要多少少體諒。」，其實他們與一般人無異。
*尊重受訪者意願，少娟、小健及大文乃為化名