圖、文：囂囂
As a 港女，同大多數香港人（甚至地球人）差唔多都鍾意去旅行，好似行開吓先至叫做「充實」、「擴闊視野」、「享受人生」。但打從三年前搬入大嶼山後，感覺自己對周遊列國嘅慾望減低咗，周不時都想留島休息，尤其假日「無咩事我都係返入大嶼山先」。
四月嘅復活節長假期，頭四日港女都係留島等復活。一直聽過大嶼山羌山有兩個地方：鹿湖、靈隱寺，經常幻想呢兩個地方都深幽靜寂、山明水秀，趁住長假期，一於約埋朋友齊上羌山！
由梅窩坐1號嶼巴出發，深屈道口落車然後開始羌山之旅。無耐已經到達1883年建成嘅鹿湖精舍，正門刻有對聯：「緱嶺分踪，雖處天涯皈淨土；嶼山寄跡，獨超塵界峙中流」。精舍外靜謐空地上種有多款植物，空氣清新，放空一流。不過據講今時今日精舍只有一位老法師留守，相信精舍距離「沒落」不遠矣……
繼續上路，路過一座破廟，入內尋幽探秘一番。整座寺廟分兩層同幾個分堂，上上落落進進出出咁就玩咗大半個鐘。港女臨走有少少感慨：一座偌大嘅廟宇靜悄悄變成斷瓦殘垣，到底係「發展」不留人？定係「人」無心改變？
再度前行，行至已廢棄嘅佛泉寺、智積林、悟徹。天花墮落，大門倒下，令人惋惜。
再行，叢林中或路邊出現唔同觀音佛像，同無間斷誦經廣播（我無鬼用，個人覺得有啲驚驚……）據聞延慶寺為興建骨灰龕埸圖利及擴展勢力，霸佔附近官地，所以又佛像又廣播。當政府未有羌山發展計劃時，原來擁有「大智慧」嘅商人已睇中當中嘅潛力。
經過覺修寺同寶蓮室後，Finally見到靈隱寺。未正式踏入靈隱寺前，先經過一間舊屋，一位90幾歲婆婆與一隻體貼唐狗同住，狗狗知道婆婆行動不便，不時停低回頭等埋婆婆，不離不棄，係愛呀！同婆婆打招呼傾兩句，婆婆話我哋知：「呢條斜路係我用石屎鋪㗎！你以為政府做啊？」
正午一點上到靈隱寺，因為交通比較方便，靈隱寺係全羌山人氣最旺嘅寺廟。洗個臉就立即買飯票、搵位坐等醫肚。兩人一檯，四餸一湯白飯任裝，齋菜簡單不過味道清新唔花巧，可以食出本身食物原味道。
食飽飽直落大澳坐3M返梅窩，回程時，港女腦海不停浮現各個破廟影像……
林太自行落實明日大嶼願景計劃，時移世易，明白「重建」、「發展」係有所需要，不過「保留」同「保育」係咪又會被考慮呢？
