文：Edward
受訪者A：居於青衣，跨區至觀塘返工
受訪者B：居於沙田，跨區至觀塘返工
問：你每日都用幾多時間嚟返工？
受訪者A：都預一個鐘嘅，包括搭小巴落山、轉車搭地鐵去到觀塘，最後咪行返公司。
受訪者B：我反而預45分鐘左右就夠，同埋住得近巴士站，唔塞嘅唔使半個鐘就去到觀塘。
問：聽講觀塘道成日都會塞，你曾經試過塞幾耐？
受訪者A：的確係經常塞啊，以疫情之前嚟講，一個月都至少塞四、五次車。
受訪者B：大部分時間都淨係塞十五至二十分鐘啦，已經叫做暢順，但都試過嚴重到由市中心去下一個站創紀之城就要用半個鐘。
問：你覺得邊啲係比較嚴重嘅「交通黑點」？
受訪者A：我自己喺法院上車嘅，咁開源道成日都塞，上車去到APM嗰段點都會有影響啦！同埋啱啱提過嘅市中心到創紀之城都算係「黑點」之最。
受訪者B：比起喺車上面塞，最困擾嘅當然係成日要等好耐車。最離譜嗰次係成個鐘都上唔到車，就算上到車都要繼續塞多半個鐘，真係好難受。
問：你有冇覺得觀塘工業區嘅氣溫點？
受訪者A：非常熱、非常焗。周圍都係高樓大廈，成個區基本上都無風，加上人多路窄，返工放人多人嗰時真係相當難頂。
受訪者B：呢種難頂喺等車嗰陣更加明顯。巴士站又多人啲站又近，啲人成日都打晒蛇餅。人多擠迫又要喺馬路邊長時間食廢氣，真係好唔舒服。
問：你喺觀塘食晏嘅體驗係點？
受訪者A：觀塘食嘢都叫做多種類，距離公司都唔算遠嘅。不過講真，啲人真係多過啲位好多。
受訪者B：餐廳係多，但觀塘打工仔更加多，所以成日都要等位，等三個字以至半個鐘都係家常便飯。
受訪者A：我經常都要提早啲去食晏，或者有時要事先訂位先有位。
問：喺觀塘返工有無咩印象深刻嘅不快經歷？
受訪者A：都係要等好耐車。同埋附近馬路都係廢氣，又熱到爆，同人逼住行真係成個人都好躁底。
受訪者B：試過放工撞正落雨，咁觀塘工業區本身啲路都窄，個個都擔住遮，完全行唔郁。焗住要慢慢行，啲遮又要撞黎撞去，真係好難頂。
受訪者A：同意，放工嘅時候落雨真係好頹。同埋啲路一凹一凸搞到周地積水，有時啲人同埋車行過真係會搞到濕晒。
問：最後想問你會點形容喺觀塘返工嘅感覺？
受訪者A：烏煙瘴氣，人又多車又多，有時路太窄連一個簡單嘅轉彎位都幾乎塞到行唔到。唉，觀塘返工就係咁。
受訪者B：除左烏煙瘴氣，我會覺得成個過程好似過關。就算疫情的確令到啲商場人流少左，但係返工嘅都係咁多。大家每日都要逼喺咁窄而密集嘅地方真係好似日日都過緊關咁。
