彩虹道街市面臨關閉，餘下的日子進入倒數階段，新仙出爐採訪了包括街坊及檯商等等不同的持份者，嘗試了解彩虹道街市在他們心中，這個默默屹立在新蒲崗三十二年的街市有著甚麼的意義及印象，而對於往後的發展又有甚麼想像。
文：沸青
攝：沸青、黑羊
從事補習老師的的食客符先生，是頂層熟食中心的常客，他稱讚彩虹道街市價廉物美，而且物超所值。而他每天皆會蒞臨彩虹道街市熟食中心用膳，有時會在街市中的雜貨舖購買日用品。他表示知道街市將會關閉，但坦然對有關詳情掌握不多。對於未來發展，符先生希望可以改善設備至新型街市一樣，並希望「租金唔好太貴」，令價格不至於飆升。他舉例說：「比如話慈雲山街市，佢早前曾經亦重修過，我以為價錢會升高，點知都無乜點升，咁我都好欣慰！」並補充道：「我以為領展咁搞咗之後，又會裝修又會迫遷咁，令啲商戶要走，咁新嘅商戶又要捱貴租！」並重申：「現代化係好嘅！但相應上唔好令價格太離譜，起碼令人流多咗，設備好咗，搞活返個街市。」又提議倘若重建可以在原址改建為包括街市、熟食中心、圖書館、運動室及社會服務中心等設施的市政大樓，使更多人受惠。
另一位街坊黃伯表示關閉也無所謂，但強調千萬不要重啟成為領展街市：「因為咁樣啲街坊係承擔唔到嘅﹙物價﹚。啲租又貴，咁愈食就愈貴，愈食就愈少呀！」他感慨地指出，街市除了是個購物的地方，更是一個聚腳的地方：「希望能夠繼續保留﹙街市﹚！等啲街坊可以上嚟食啲平價嘢，又可以有個聯誼作用，因為正式嘅長者活動場所愈嚟愈少㗎喇！球場係年青人，遊樂場係小朋友，咁老嘢點呢？唔通拎去填海呀？」他續道：「老人中心愈嚟愈少，唔係就收錢！」另外，黃伯認為街市亦是一個可以平價做生意的地方，尢其是老人：「因為個保險制度呀，佢﹙老人﹚幾叻經驗幾豐富都無人請呀！咁不如畀佢哋做吓生意，畀啲街坊享受吓平價嘢。」被問到街市及公園亦能夠作聚腳點，黃伯則笑言區內公園大多有「賭博成分」，所以「好多長者都唔願去」，並補充道：「表面就跳大媽舞，其實就係呃錢！」，因此只剩下彩虹道街市這一片凈土。
