（左起）Wayne、Gigi、Titus
（獨媒報導）垃圾徵費推行在即，市民除了依賴「綠在區區」，是否有其他方法減廢？在大埔，有前區議員助理聯同街坊每月定期在廣福邨平台舉辦「不是垃圾站」（不站），教人進行分類回收之餘，也互相交換物品。
前議助Gigi笑說，舉辦不站原先是「入職要求」，卻在失去「議助」身份之後延續了下來：「班街坊已經喺度，我哋認識咗，又好似有落不站嘅習慣⋯⋯如果淨係因為議員唔喺度就唔做不站，好唔合理。我哋同班街坊仲喺度，有人可以做咪做落去囉。」
「喺宜家呢個時候，可以令一啲嘢唔消失都係一個壯舉。就算好唔華麗咁存在緊，都係一件事嚟。」前議助Titus則形容，不站是「社區意義大過環保意義」：「At least我可以證明，不站呢樣嘢唔係唔可以做，咁你都可以諗吓有咩可以做。」
＊＊＊＊＊
始於2019年 倡共享資源抗衡地產霸權
曾幾何時，「不是垃圾站」 遍佈全港多個社區，但如今在網上搜索，大部分「不站」專頁經已沒更新。不過，始於上屆大埔區議員連桷璋的廣福邨不站，至今仍每月舉辦一次，由前議助Titus、Gigi、Wayne及一班街坊共同運作。
首次出現廣福邨不站，是在2019年7月。連桷璋當時強調：「我哋唔係義工，亦唔係服務提供者，大家都應該係一個參與者。」在最早期的不站，已經分為「回收」和「地攤」兩個部分：除了把金屬、各類型的塑膠、玻璃等可回收物品帶過來，街坊也可以將家中無人使用、但未至於要扔棄的物品帶到不站，讓有需要的街坊取去。攜帶物品到場的街坊要幫忙看守地攤，若無人取走就要自行帶走。
「不是垃圾站」的英文名是「waste no mall」，Titus和Gigi解釋這帶點抗衡地產霸權的意味。故意選址在商場外擺地攤，「對撚住佢啲舖頭」，讓街坊能共享資源並意識到：「原來我哋可以唔入商場買嘢。」
作為議員助理，Gigi笑說最初是以「打工仔心態」來看待不站。Titus則記得，他剛開始參與不站時較冷清：「試過得一個人擺（物品），冇人嚟攞。」但他當時覺得「冇乜所謂」：「冇人都係照擺，冇乜人咪行住入去休息囉。」
辭職潮與DQ過後 與街坊同商討「仲有咩想做？」
2020年連桷璋當選後，不站成為固定的社區活動。Titus和Wayne記得最初是兩星期舉辦一次，時間通常是周末的中午，位置是議員辦事處對出：「唔洗book場嘛。」雖曾因疫情暫停一段時間，不站在連桷璋辭職後仍延續下來，參與的街坊有增無減。
2021年4月，連桷璋在區議員須強制宣誓前辭職。2022年6月，廣福邨另一名區議員姚鈞豪参與宣誓後被取消議員資格。這意味著廣福邨將有一段時間沒有區議員。議辦結束前，兩名前議員與相熟的街坊在辦事處內聚首，討論未來的打算。
上屆大埔區議員姚鈞豪的辦事處，現成為民建聯黃碧嬌的辦事處。
他們談過要否繼續在節日舉辦活動——連和姚當選後，曾與街坊合力舉辦木球場聖誕市集、巨型月球巡遊林村河等「節慶活動」，引起不少關注，有街坊甚至形容是「顛覆對區議員的想像」。不過，Wayne說若要做到之前的程度，難度太高：「太多框架，要好多人力物力先成就到。」想來想去，不是垃圾站似乎是較為容易延續下去的活動。
前議助們對當時的印象不一。Gigi記憶中的連桷璋較積極：「好多嘢都就快要消失，大家仲有咩想做？如果有就開始要孭起。」而Titus印象中的連則較「頹」：「 原來所有嘢都keep唔到，我（連桷璋）都諗唔到（做乜好）喎。」
共同看檔、介紹、收拾
對於如何延續，Titus最初有點迷惘：「我係咪當自己係街坊嚟呢？定純粹做返議員以前做的角色？」相比「叫佢哋嚟不站、叫佢哋嚟幫手」，他們更望街坊能成為搞手，一同提出意見、討論和決策。
幸好，這一切確實自然地發生了。例如下一次不站的日期，通常是在現場與街坊一起決定的：「街坊會話，你幾時搞我咪幾時嚟囉！但對我哋嚟講，得我哋三個都搞唔到落去。因為佢哋（街坊）係支撐緊件事。」
有些恆常來的街坊，參與度越來越高，除了會幫忙看守地攤，也會叫其他街坊一同參與。Titus說：「就係呢啲事令我冇咁頹，覺得呢件事幾有意義喎。啲街坊會自己Connect喎，有嘢會自己solve。」Wayne同意：「啲街坊可以自己搞掂。以前要keep住同人解釋個玩法係點，但宜家唔洗嚕。」「都有嘅，但唔一定係我哋（解釋）。」
「可能有個街坊行埋嚟問，下次幾時吖？答返佢嘅係另一個街坊而唔係我。」
不少開檔的架生都是街坊帶來，例如衣架、回收袋、手拉車⋯⋯「本身有個架，但只晾到兩三件衫；有街坊見到，就拎咗屋企嘅架嚟。」街坊也會自動自覺去看守晾掛著的的衣服，向路過的人介紹。
回收之餘也做教育 連繫街坊延續塑膠分類
除了開設社交媒體專頁「不是廢邨」更新不站資訊，三人亦開設了「不是垃圾站」群組，有参加過不站的人都能加入。據他們觀察，來地攤的人「尋寶」的多數是附近街坊，但亦有不少住在其他社區的大埔人會特意把家中無用之物帶來，放在地攤任人拿取。
見到新面孔時，Gigi會嘗試與他們聊天。通常先問對方是否廣福邨街坊，如果答案為否，她會進一步打聽：「你嗰邊有冇不站？」有時街坊回答「沒有」之餘，還會加一句：「我都想自己條邨有。」Gigi笑說，這時有個標準答法：「咁啱啦，你哋其實可以自己搞㗎！好簡單咋，最緊要有個地方！」
在Gigi眼中，不站具「回收」功能之餘，也提供了空間和時間讓街坊聚頭。近月，「綠在區區」經已進駐廣福邨，但Titus形容「綠在」更像是純粹的「服務提供者」，大家放下回收物品、儲分後就會離開：「員工未必會同你解釋，潔淨回收係咩、點解要分唔同膠⋯⋯但喺呢度，我哋就係有空間、時間傾呢樣嘢，而佢哋係會同你傾，甚至佢哋都會有問題想問。」
另一與綠在區區不同之處，是不站仍舊會將塑膠按編碼進行分類。點解要分到咁細？Gigi解釋，香港很多品牌都正在推動升級循環（upcycle），例如按顏色將塑膠分類，再製成新產品。同時，Titus不太同意環保署以「複雜」為由取消塑膠分類：「其實街坊冇咁蠢，佢哋係有能力分類。我哋睇到㗎嘛，佢第一次嚟唔識分類，分多兩次咪知囉，我哋都係街坊教。CD明明係最靚嘅膠，我哋唔想因為環保署取消咗呢樣嘢而失去培養出嚟嘅習慣。」
除了老人家和師奶，也有父母會帶同小朋友前來。Gigi想像，未來或者能將部分玩具、繪本、書留起來，設立「玩具corner」：「父母喺度free嘢，小朋友喺隔離玩。」
唔消失已是壯舉、戇鳩的傳承、從制度解放出來
離開還是留下、留下來的人又該如何自處，幾年出現的爭論至今尚未止息。隨著區議會被「完善」，三人先後卸下議員助理身份，投身其他行業。為什麼要在全職工作以外，抽時間做這些別人眼中可能無太大影響的「小事情」？Gigi率先回答：「我哋做嘅時候冇諗到，但原來對一啲人嚟講，keep到不站呢件事係有意義嘅。」
她坦誠，有時也會自覺「好頹」，卻又因聽到別人說「哇，你仲做緊不站！」而想堅持下去：「或者我想同嗰個人講：你頹頹哋做一啲嘢，你都係做緊一啲嘢。每一次就算唔係話好轟烈、好多人嚟，對於我嚟講已經好有價值。」
對Wayne而言，「搞不站」更像是在延續當初成為議助的原因：「我係做議助後先開始接觸回收、環保，我想將呢樣嘢教返俾街坊，當係⋯⋯『戇鳩嘅傳承』？都可以係話俾自己聽，我仲想做社區project，只係未諗到點run其他project，咪一直做住呢個囉。一路做一路諗，到其他都可以run啦，咁咪一齊run囉，好過停喺度。」
Titus就形容現時是「部分延續」當初的信念，同時拓寬了一些空間：「做議助時會跌入一個trap，想喺制度內改變一啲嘢，覺得『講到少少都好吖』。但宜家完全唔諗，反而睇到制度外嘅可能性。」
記者：梁皓兒