「被退休」之後有啲時間，所以我再出翻呢個系列，可能會講啲無人睇嘅政治理論，可能會講啲市政嘢或者哲學嘢，利申：唔係好專業，但會講下我嘅睇法同埋歡迎大家一齊討論。今次想講下公園同埋唔同地方凳上面嘅所謂「扶手」。
好似幅圖咁樣，睇落有個「扶手」好似好合理咁，但其實呢個所謂嘅扶手真正嘅作用係啲咩？真係純粹畀啲人起身用？其實都唔係佢真正嘅作用，真正嘅係防止啲露宿者同埋其他人訓上去。呢啲係叫敵意建築（hostile architecture），即係一啲「在城市空間中故意使用一些要素來引導或限制某些行為，以此為預防犯罪或維持秩序的形式的一種設計手法。它針對的往往是更常用或依賴公共空間的人，例如露宿者和青年人，設計上更多地限制他們進行的行為。」。
香港有唔少地方都有呢啲咁嘅敵意建築，最多出現嘅係喺公園入面，好似啲尖刺啊扶手咁，為嘅就係要求啲人都要「坐好」，唔畀躺臥，更加唔想你喺到瞓覺，好似濁水漂流套戲咁，加啲尖刺係橋底同不斷咁洗地，為嘅就係趕走啲露宿者去一啲佢哋睇唔到嘅地方，避免人哋去投訴。呢啲都係牽涉到究竟大家只係視無家者係「滋擾」吖，或者大家覺得眼不見為淨，趕走咗去第二到就得，定係只要唔影響到他人就會包容；定係覺得應該要制定一啲「露宿者友善政策」呢？
其實凳本身嘅作用就係要用嚟休息，但點解休息就唔包括訓係到休息？點解覺得凳上面加咗扶手就可以趕絕啲無家者？如果佢哋要露宿嘅話都可以訓喺凳隔籬嘅地下嫁。香港所有嘅敵意建築一共用咗幾多錢同埋霸佔咗幾多公共空間？而呢啲咁嘅資源其實係可以用翻喺支援無家者身上。
之前「濁水漂流」呢套基於真實故事改編嘅電影引起大家嘅對無家者嘅關注，而呢個議題其實一直存在。當然大家都可以有唔同嘅睇法，歡迎大家一齊討論。