【獨媒報導】政府上周公布彩虹邨重建計劃，其中擬2028年清拆的第一期範圍，包括碧海樓、丹鳳樓、金碧樓、兩所空置學校以及金碧樓旁的街市檔。金碧樓與彩虹邨街市之間的走廊，是彩虹邨商舖集中地的「商店街」。有店主明言對計劃有「好大意見」，「第一時間拆商舖，講真佢又唔合邏輯，首先就拆咗啲鋪頭，咁啲老人家去邊度買嘢呢？」
目前金碧樓有不少商舖，涉及約26間酒樓或餐廳、超市及糧油食品、藥房或家居百貨、衣履、書報文具、自動櫃員機、診所及個人護理等行業，六十年代老店如金碧酒樓、愛群快餐、華麗理髮，以及日常生活商店如7-11、惠康、759阿信屋等皆位於金碧樓。街市檔位亦有逾20間，售賣鮮果糧食及乾貨等。
根據房屋署的文件，僅提及會在清拆現時位處金碧樓的商舖前，確保未清拆的住宅樓宇地下的餘下商舖能夠滿足住戶日常所需。
楊先生
位於彩虹邨街市的興隆寶燭紙紮，60多歲老闆楊先生與太太經營30多年，他明言對重建計劃有「好大意見」，不明白為何政府選擇首先拆除金碧樓及彩虹邨街市，「第一時間拆商舖，講真佢又唔合邏輯，首先就拆咗啲鋪頭，咁啲老人家去邊度買嘢呢？」他認為會對餘下的居民構成不便，「區議員都唔係做嘢嘅，一係你哋區議員幫吓啲街坊買餸啦！」他更直言：「呢個係唔知咩計劃嚟嘅，唔知咩政府嚟嘅，點解要拆晒啲鋪頭呢？啲人唔使食飯，乜都唔需要做，坐喺到等死咩？即係我好大意見囉。」
彩虹邨街市屬露天攤位設計，是六七十年代公屋的特色，與其他同年代屋邨街市相似。日後即便重置，楊先生亦明言：「重建最唔捨得係彩虹邨唔會再有返呢啲位俾我哋。」
分三期清拆的彩虹邨，第一期居民將被遷至新美東邨，楊先生認為安排不妥，居民期望能原區安置，「你一係就全部（一、二、三期）一齊拆就最好，公平呀嘛！而家對一期好唔公平喎，我諗九成嘅居民會唔鍾意搬去（新）美東邨。」
紙紮技藝是「香港非物質文化遺產」之一，但近年隨著民間信仰淡化，紙紮舖的生存變得困難。楊先生坦言「而家呢個行業越嚟越差架喇，執笠嘅執笠，唔做嘅唔做」，店舖也沒有子女承接，打算隨著彩虹邨清拆而結業。
紙紮店內有一些新式祭品，例如紙紮跑車、點心拼盤、名貴首飾等。楊先生指每年皆會推出新式紙紮製品，價錢亦相宜，新式祭品亦「唔一定後生先買」，惟疫情之後，紙紮舖的生意也大不如前，「後生冇乜接觸過（紙紮），始終唔係生活必需品。」