【獨媒報導】逾60年歷史的彩虹邨將清拆重建，房委會早前公佈重置第一期清拆商戶安排，擬於2029年4月前清空碧海樓、金碧樓及丹鳳樓商戶。至於補償方案，房委會會向商戶發放每月租金15倍的特惠津貼，並會邀請特色店舖重置於新彩虹邨，中標者可獲三個月免租，放棄參與招標的商戶可獲提供125,000元替代津貼。 邨內的特色店舖之一、逾40年歷史的愛群快餐，負責人蔡文強對安排感滿意，店舖亦獲房委會邀請重置，他有意競投，於新邨重開。
於邨內經營17年的漫畫世界，則會選擇繼續清貨，於搬遷限期前結業。老闆張先生不認為彩虹邨特色能夠保留，「呢種形式就係要喺呢啲咁嘅區裏面，先至有你哋所叫做嘅『特色』。」
愛群快餐擬於新邨重開
《獨媒》於房委會公布方案後再走訪彩虹邨，其中愛群快餐負責人蔡文強認為，房委會「都安排得好好，冇咩問題」，對商戶補償方案感到滿意。
重建期間，他會考慮暫搬至新美東邨，待日後再重置於新彩虹邨。房委會的新聞稿稱「為延續小店情懷」，會透過社區參與活動發掘別具特色和值得保留的商戶，邀請他們競投新屋邨商業單位。蔡文強指愛群快餐已獲邀請，房屋署署長「都喺我哋啲舖頭開過會」，「等佢商場起咗就會邀請我哋（投標），要求我哋呢啲特色店舖去做。」
愛群快餐旁有一間營業了約四至五年的「至尊中日美食」餐廳，負責人同為蔡文強，屬愛群快餐的「分支」。他指當年開設新舖是為了「賣一啲新嘅食品」，惟「兩邊都一樣嘅」，顧客坐在新舖「可以嗌隔離嗰啲（愛群快餐的食物）都得」。蔡文強稱「有啲人鍾意坐呢邊（新舖），有啲人鍾意坐嗰邊（舊舖）」，而新舖「呢邊冇咁多人，嗰邊人多啲」。 他指房委會「都係希望我哋兩樣一齊做啦」，「佢將來會俾間大啲我哋嘅」。
愛群快餐負責人蔡文強
漫畫世界暫未獲邀請
原於九龍城舊啟德機場對面開業，17年前遷入彩虹邨的漫畫世界，老闆張先生亦認為房委會的商戶賠償方案正常及合理。惟他稱該店暫未獲房委會接觸，「我估佢哋都搞緊架喇，但未輪到我哋傾」。不過他亦重申無意重置漫畫店，「如果繼續做就唔會清貨喇」，近幾年漫畫店亦是以清貨為主，「清到七七八八，咁跟住就走架喇」，料於2029年4月限期前便會結束。
目前漫畫世界仍會入新貨，不過張先生指近年變得更謹慎，購入的漫畫主要屬熱門系列，「就唔同以往咁樣，咩都入啲咁，因為你驚賣唔曬又麻煩呀嘛。」
漫畫世界老闆張先生
對於重置能否保留特色？張先生對此則有保留，指舊式小食店「嗰個格調係幾廿年前到而家，去到啲大集團嗰種裝修嘅話，都唔會有咁樣（特色）嘅舖。」他又認為未來的新商場不會有舊邨的風格，「將來就算政府可以優先俾個新嘅商場佢去做，商場都唔會容許佢而家咁嘅格式，一定要你裝修」，「你一裝修就冇咗嗰種味道，咁同開一間便利店，開一間大生、佳寶咁嘅形式係無分別。」
「你就算話保留有特色嘅舖，但去到一個新嘅環境裏邊，你都好難做到架喇」，「呢種形式就係要喺呢啲咁嘅區裏面，先至有你哋所叫做嘅『特色』。」
張生張太認為，即使在完成重建後的新彩虹邨重置特色店舖，亦無法保留舊店鋪原本的「味道」，「你入到新既商場嗰度，嗰個裝修、賣嘢嘅形式已經轉變曬架喇」。對此，張太表示保留店舖特色的唯一方法是不要清拆彩虹邨。