圖、文：囂囂

搬咗嚟梅窩差唔多三年，港女始終改變唔晒本身嘅港女性格，仲係鍾意行街、買包包、同姊妹食好西然後打卡。上年，大嶼朋友plan咗12月24日平安夜朝早上大東、夜晚喺山上過夜、第二日食埋lunch先落山。大東山係香港第三高，仲話山頭有無盡芒草，今次打死都要上山一轉！

港女一向遠行只會拖篋住洒店，遠足裝備欠奉，上大東前問人借大背囊、借睡袋，真係未出發已經搞餐懵。24號上山之日，一行30幾人浩浩蕩蕩，沿途見到大蛇、見到羊咩咩，雖然大家都係大嶼人住慣鄉下，個個加埋過千歲，不過見到小動物又立即變返細路咁。

經過幾個鐘行吓、玩吓、笑吓、摸吓花、督吓草，終於成功登頂。眼前二東同大東上一間間石屋，由下而上十幾二十間。導遊介紹石屋群嘅歷史，而且每間都各自有業主，其中一間石屋後園更有座「愛犬威仔」墓碑，所以佢哋並唔係一堆爛鬼石屋。百年歷史，而且日久失修，瞀俚們咪再爬上屋頂扮那些年！

其實孭住大背囊，連大家嘅早午晚三餐上大東，對於個個禮拜操幾次體能嘅港女完全無難度，但喺大東山過夜最大鑊莫過於去！廁！所！我哋住嘅石屋外，有個人攞筒水落去冲廁嘅廁所，但必先經過一條野草高過我嘅小直路（直路意思：斜度同直跌落去無分別）。由於去一次廁所，港女內心深處會多次爆粗，而且深感懊惱、無助及後悔（點解我要上大東～～～）為免搞到自己提早更年期，豐富晚餐過後，港女決心滴水不沾。

臨瞓，大家走出屋外，對住星空大開演唱會，唱咩？中、英、日文歌乜都唱吓。最記得一齊高唱「國貨城精選大碟」嘅《狂武之城》同《棍的呼喚》，歌詞笑中又有淚。

第二朝聖誕日，大家齊齊5:30am起身直上最高點，港女一向早起，不過未試過喺山上。原來日出可以咁靚，原來大東上可以遠眺IFC，原來大嶼山真係可以咁美好……此時，我終於無悔上大東。

高山、薄霧、雲霞、地平線上嘅旭日初昇、微風中一望無際嘅芒草，我哋各自佔據一個山峯，騰雲駕霧感覺仿如無人之境。當時港女想向山下大叫，想叫醒所有熟睡嘅大嶼人，想同佢哋講：「我哋好Ｘ幸福！我好Ｘ鍾意大嶼山！」

早前林太表示興奮嘅「明日大嶼願景」計劃喺交椅洲、喜靈洲附近填海興建1700公頃人工島，當中包括北大嶼山周邊水域嘅近岸填海工程。到底填海後嘅大嶼山，會確實如政府初心「有助達至更均衡的人口和就業空間佈局」，定要20年後嘅香港人共同埋單？Hey！港女真係識條Iron咩，不過未到最後一刻，我哋都未知結果，大嶼山人加油and Merry Christmas！